Dɔwɔnu Sue Aɖe Si Na Amewo Ƒe Asi Kaa Gbɔgbɔmenuɖuɖu

Yehowa Ðasefowo le agbalẽ kple video siwo woda ɖe mɔ̃ dzi zãm fifia wu tsã. Gake ga mele mía nɔvi siwo le xexea ƒe akpa aɖewo si be woazã Internet o. Wo dometɔ aɖewo le teƒe siwo Internet mewɔa dɔ le edziedzi o, eye bubuwo hã le teƒe siwo Internet mele kura o.

Ke hã fifia, mía nɔvi geɖewo ate ŋu ahe míaƒe agbalẽwo kple videowo ɖe woƒe mɔ̃wo dzi Internet manɔmee! Aleke wowɔa esiae?

Wozãa JW Box. Enye dɔwɔnu sue aɖe si wona hame siwo le teƒe siwo Internet zazã ɖea fu le. Habɔbɔa ƒle dɔwɔnu sia eye Kɔmpiuta Dɔwɔƒe si le Betel trɔ asi le eŋu hetsɔ míaƒe agbalẽ kple video siwo le jw.org de edzi. Dɔwɔnu sue sia dometɔ ɖe sia ɖe xɔ abe Amerika dɔlar 75 ene.

Le Fiaɖuƒe Akpata mea, nɔviwo sia woƒe Wi-Fi ale be wohea habɔbɔa ƒe agbalẽwo kple videowo tso JW Box la dzi vaa woƒe mɔ̃wo dzi. Eye wo dometɔ siwo si tablɛt alo fon siwo mede ŋgɔ alo xɔ asi boo o le kura gɔ̃ hã ate ŋu ahe agbalẽawo kple videoawo ava wo dzi. Gake aleke wowɔna daa míaƒe agbalẽ kple video yeye siwo do la ɖe JW Box la dzi na nɔviawo? Tso ɣeyiɣi yi ɣeyiɣia, nɔvi siwo le Betel daa míaƒe agbalẽ kple video yeye siwo le jw.org ɖe USB alo clé si ƒe home ade Amerika dɔlar 4 la dzi ale be woatsɔ wo ade JW Box la me ne nɔviawo nazã.

Aleke JW Box sia zazã kpe ɖe mía nɔviwo ŋu? Nathan Adruandra si nye vifofo le Democratic Republic of Congo, gblɔ be: “Ɣeyiɣi didi aɖee nye esia menɔ agbagba dzem be mahe drama siwo nye ‘Oo Yehowa, . . . Ŋuwòe Meɖo Ŋu Ðo’ kple Miɖo Ŋku Lot Srɔ̃ Dzi ɖe nye mɔ̃ dzi. Gake ɖeko wòglo koe, esia na dzi ɖe le ƒonye ŋutɔ. Gake fifia, mate ŋu ahe video siawo ɖe nye fon dzi, eye esia le kpekpem ɖe mí dzilawo ŋu be míafia nu mía viwo nyuie.”

Nɔviŋutsu aɖe si le Nigeria, si kpena ɖe nɔviawo ŋu be woazã JW Box gblɔ be: “Nɔviawo bua JW Box la be enye nunana tɔxɛ tso Yehowa gbɔ na yewo. Edzɔa dzi na wo ŋutɔ be fifia, yewoate ŋu ahe agbalẽ kple video siwo nye Dɔwɔnu Siwo Míetsɔ Fiaa Nui la bɔbɔe.”

Woɖo dɔwɔnu sia si awu 1,700 ɖe nɔviwo le Afrika, Oceania, kple Anyiehe Amerika, eye wole ɖoɖo wɔm be woaɖo wo ɖe hame bubu geɖewo hã. Aleke wowɔ kpɔ ga tsɔ wɔ ɖoɖo ɖe dɔwɔnu sia ŋui? Nu siwo wodzɔ na xexea me katã ƒe dɔa mee woɖea ga tsoe tsɔ kpea asi ɖe ɖoɖo sia ŋu, wodzɔa ga sia ƒe akpa gãtɔ to donate.jw.org dzi. Míeda akpe na mí ɖe míaƒe lɔlɔ̃nu faa nudzɔdzɔawo ta.