Aleke Nàdo Gbe Ða Be Mawu Nasee?
Yehowa Mawue nye “Gbedodoɖasela.” (Psalmo 65:2) Míate ŋu ado gbe ɖa nɛ ɣesiaɣi, le afi sia afi. Míate ŋu ado gbe ɖa le ta me alo adoe ɖa wòaɖi. Yehowa di be míayɔ ye be “Fofo,” eye le nyateƒe me la, eyae nye Vifofo nyuitɔ kekeake. (Mateo 6:9) Esi Yehowa lɔ̃ mi ta la, efia ale si míado gbe ɖa ale be yeasee la mí.
DO GBE ÐA NA MAWU LE YESU ƑE ŊKƆ ME
“Ne miebia nane Fofo la la, ana mi le nye ŋkɔ me.”—Yohanes 16:23.
Yesu ƒe nyawo na eme kɔ ƒãa be Yehowa medi be míado gbe ɖa na ye to kpetatawo, ame kɔkɔewo, mawudɔlawo alo tɔgbui kukuwo dzi o, ke boŋ to Yesu Kristo dzi. Ne míedo gbe ɖa na Mawu le Yesu ƒe ŋkɔ me la, ke míele eɖem fia be míede dzesi akpa vevi si wɔm Yesu le. Yesu ŋutɔ gblɔ be: “Ame aɖeke mevaa Fofo la gbɔ o, negbe to dzinye ko.”—Yohanes 14:6.
ƑO NU TSO DZI ME
“Mitrɔ miaƒe dzi ƒo ɖe eŋkume.”—Psalmo 62:8.
Ne míele gbe dom ɖa na Yehowa la, ele be míaƒo nu nɛ abe ale si ko míaƒo nu na mía fofo si lɔ̃ mí ene. Le esi teƒe be míanɔ gbedodoɖa xlẽm tso agbalẽ aɖe me alo anɔ esiwo míelé ɖe susu me gblɔm nɛa, ele be míaƒo nu nɛ bubutɔe tso dzi me.
DO GBE ÐA WÒAWƆ ÐEKA KPLE MAWU ƑE LƆLƆ̃NU
“Nu sia nu si míabia wòawɔ ɖeka kple eƒe lɔlɔ̃nu la, aɖo to mí.”—1 Yohanes 5:14.
Yehowa Mawu gblɔ nu siwo wòdi be yeawɔ na mí kple nu siwo wòdi be míawo hã míawɔ na ye la na mí le Biblia me. Be míaƒe gbedodoɖawo nadze Mawu ŋu la, ele be míado gbe ɖa “wòawɔ ɖeka kple eƒe lɔlɔ̃nu.” Be míate ŋu awɔ esia la, ele be míasrɔ̃ Biblia ale be míanya Mawu nyuie. Ne míewɔe alea la, míaƒe gbedodoɖawo adze eŋu.
NU KAWOE MÍATE ŊU ADO GBE ÐA ABIA?
Do Gbe Ða Tso Wò Nuhiahiãwo Ŋu. Míate ŋu ado gbe ɖa na Mawu be wòana míaƒe nuhiahiã veviwo abe nuɖuɖu, nudodo kple mlɔƒe ene la mí. Míate ŋu ado gbe ɖa hã be wòana nunya mí míawɔ tiatia nyuiwo alo wòado ŋusẽ mí míado dzi le xaxawo me. Míate ŋu ado gbe ɖa abia xɔse, tsɔtsɔke kple kpekpeɖeŋu.—Luka 11:3, 4, 13; Yakobo 1:5, 17.
Do Gbe Ða Ðe Ame Bubuwo Ta. Dzila siwo tsɔ ɖe le eme na wo viwo la kpɔa dzidzɔ ne wo viwo lɔ̃ wo nɔewo. Yehowa ƒe viwo míenye, eya ta edi be míatsɔ ɖe le eme na mía nɔewo. Esɔ be míado gbe ɖa ɖe mía srɔ̃, mía viwo, míaƒe ƒometɔwo, kple mía xɔlɔ̃wo ta. Nusrɔ̃la Yakobo gblɔ be: “Mido gbe ɖa ɖe mia nɔewo ta.”—Yakobo 5:16.
Do Gbe Ða Nàda Akpe Na Mawu. Biblia gblɔ tso mía Wɔlaa ŋu be: “Ewɔa nyui na mi, enaa tsidzadza mi tso dziƒo eye wònaa nukuwo wɔna le wo wɔɣi, eye wòtsɔa nuɖuɖu kple dzidzɔ yɔa miaƒe dziwo me fũu.” (Dɔwɔwɔwo 14:17) Ne míebu nu siwo katã Mawu wɔ na mí ŋu la, aʋã mí míado gbe ɖa ada akpe nɛ. Ele hã be míato ale si míenɔa agbee dzi aɖee afia Mawu be míekpɔa ŋudzedze ɖe nu siwo wòwɔna na mí la ŋu.—Kolosetɔwo 3:15.
KPƆ MAWU SINU EYE NÀNƆ GBE DOM ÐA
Dzi ate ŋu aɖe le mía ƒo ɣeaɖewoɣi ne Mawu meɖo gbe siwo míedo ɖa nɛ tso dzi me la ŋu enumake o. Ðe ema fia be Mawu metsɔ ɖeke le eme na mí oa? Kura o! Bu nu siwo me ame aɖewo to le agbe me, siwo ɖee fia be ɣeaɖewoɣia, ɖeko wòahiã be míayi edzi anɔ gbe dom ɖaa ŋu kpɔ.
Steve, si ƒe nya míegblɔ le nyati gbãtɔ me la, lɔ̃ ɖe edzi be: “Ne ɖe nyemeyi edzi nɔ gbe dom ɖa oa, anye ne agbenɔnɔ tim xoxoxo.” Nu kae na wòva kpɔe nenema? Wova nɔ Biblia srɔ̃m kplii, si na wòkpɔe be gbedodoɖa hiã ŋutɔ eye ele be yeayi edzi anɔ gbe dom ɖa. Egblɔ be: “Medo gbe ɖa na Mawu da akpe nɛ ɖe ale si xɔ̃nye veviwo kpe ɖe ŋunye lɔlɔ̃tɔe la ta. Mele dzidzɔ kpɔm fifia wu tsã.”
Ke Jenny, si susu be yemedze be Mawu nase yeƒe gbedodoɖawo o ya ɖe? Egblɔ be: “Gbe ɖeka esi dzi ɖe le ƒonye vevie la, meɖe kuku na Mawu be wòana mase nu si tae mesena le ɖokuinye me be viɖe aɖeke mele ŋunye o la gɔme.” Aleke esia kpe ɖe eŋui? Egblɔ be: “Gbedodoɖa kpe ɖe ŋunye meva kpɔe be ne nye dzi bua fɔm hãa, Mawu ya mebua fɔm o. Ekpe ɖe ŋunye hã be nyemena ta o.” Vi kae esia ɖe nɛ? Egblɔ be: “Gbedodoɖa kpe ɖe ŋunye meva kpɔ Yehowa be enye nye Mawu, Fofonye kple Xɔ̃nye si lɔ̃m eye wòtsɔ ɖe le eme nam ŋutɔŋutɔ. Eli nam, eye akpe ɖe ŋunye ɣesiaɣi zi ale si mele agbagba dzem be mawɔ nu si wòdi tso asinye.”
Esi Isabel kpɔ via Gerard wòle dzidzɔ kpɔm ŋutɔ togbɔ be enye nuwɔametɔ hãa, egblɔ be: “Mekpɔe be Yehowa ɖo nye gbedodoɖawo ŋu nam vavã.”
Bu nu si me Isabel hã to ŋu kpɔ. Esi wòfɔ fua, ɖɔktawo gblɔ nɛ be vi si dzi ge wòalaa, anye nuwɔametɔ. Esia gbã dzi nɛ ŋutɔ. Ame aɖewo ɖo aɖaŋu nɛ gɔ̃ hã be wòaɖe fua. Egblɔ be: “Mexa nu ale gbegbe be ɖeko wòwɔ nam abe ɖe mele kuku ge ene.” Nu kae wòwɔ? Egblɔ be: “Medo gbe ɖa na Mawu enuenu be wòakpe ɖe ŋunye.” Esi ɣeyiɣia de la, edzi ŋutsuvi si nye nuwɔametɔ hã vavã, eŋkɔe nye Gerard. Ðe Isabel kpɔe be Mawu ɖo yeƒe gbedodoɖawo ŋua? Ɛ̃! Le mɔ ka nu? Egblɔ be: “Vinyea xɔ ƒe 14 fifia eye ele dzidzɔ kpɔm ŋutɔ togbɔ be enye nuwɔametɔ hã. Mekpɔe be yayra gã aɖee wònye nam tso Mawu gbɔ. Yehowa ɖo nye gbedodoɖawo ŋu nam vavã.”
Nyateƒenya siawo nana míeɖoa ŋku nya si hakpalaa gblɔ dzi be: ‘Oo Yehowa, àɖo to ame fafawo ƒe dzimedidiwo. Àdo ŋusẽ woƒe dzi, eye wò to anɔ wo ŋu.’ (Psalmo 10:17) Nuteƒekpɔkpɔ siawo na míekpɔ susu siwo tae wòle be míayi edzi anɔ gbe dom ɖa.
Woŋlɔ Yesu ƒe gbedodoɖa geɖe ɖe Biblia me. Esi ame geɖe nya wue nye Aƒetɔ ƒe gbedodoɖaa. Nu kae míate ŋu asrɔ̃ tso eme?