Ibuot 1
Edidianakiet ke Utuakibuot—Nso ke Enye Ọkpọwọrọ Ọnọ Fi?
1, 2. (a) Ọkọn̄ọde ke nso ke ata edidianakiet ke utuakibuot edi edidu ke eyo nnyịn? (b) Didie ke Bible etịn̄ aban̄a se idade itie?
KE OFỤRI ekondo akama-nduaidem edinam odu kaban̄a edidianakiet ke utuakibuot. Enye ke atan̄ mme owo ẹtode kpukpru idụt ye esien ye usem adian ọtọkiet. Edidianakiet mmọ itoho edikpọn̄ mme edinịm ke akpanikọ ekededi. Owo inyeneke enye ke mmọ nditre mme usụn̄uwem oro ẹkụtde ndudue ẹnọ ẹmi ẹdude ke ntuaha ye Ikọ Abasi. Nso ndien inam enye odu? Akpanikọ oro nte ke mme owo oro ẹtode kpukpru idaha ke uwem ke ẹdi ẹdifiọk Jehovah nte ata Abasi kierakiet ndien ke unyịmesịt ke ẹnam uwem mmọ asan̄a ekekem ye ndinen usụn̄ esie.—Men Ediyarade 15:3, 4 domo.
2 Emi osu prọfesi oro prọfet Micah ekewetde ke n̄kpọ nte isua 2,700 ẹmi ẹkebede. Kaban̄a “akpatre ini,” enye ekewet ete: “Ediwak mme idụt ẹyeka ẹkedọhọ, ẹte, Ẹdi, nnyịn idọk ke obot Jehovah, ye ke ufọk Abasi Jacob; ndien Enye eyeda usụn̄ esie ekpep nnyịn, nnyịn iyenyụn̄ isan̄a ke ọkpọusụn̄ esie.” (Mic. 4:1, 2)a Nte afo omokụt oro adade itie?
3, 4. (a) Didie ke edi akpanikọ nte ke “mme idụt” ke ẹwọn̄ọde ẹtiene Jehovah? (b) Mme mbụme ewe ke nnyịn ikpobụp idem nnyịn?
3 Idụhe ofụri “idụt” ẹmi ẹdade idemmọ ẹdiwụt ke ufọk utuakibuot Jehovah eke spirit. Edi mme owo ẹtode mme utọ idụt oro ke ẹnam ntre. Nte mmọ ẹkpepde n̄kpọ ẹban̄a ima ima uduak ye ndiye edu Jehovah Abasi, ẹmi otụk mmọ esịt ntotụn̄ọ ntotụn̄ọ. Mmọ ke nsụhọdeidem ẹyom ndidụn̄ọde mfiọk se Abasi oyomde oto mmọ. Akam mmọ edi ukem nte eke David, owo mbuọtidem emi ọkọdọhọde ete: “Teme mi ndinam se afo amade: koro afo edide Abasi mi.”—Ps. 143:10.
4 Nte afo omokụt idemfo ke otu akwa udịm mme andituak ibuot nnọ Jehovah oro? Ndi nte afo esinamde n̄kpọ aban̄a item oro ọbọde ọnọ uyarade nte ke afo ke akpanikọ ọmọdiọn̄ọ ete ke enye oto Jehovah? Ke nso udomo ke afo ‘asan̄a ke ọkpọusụn̄ esie’?
NTE ẸSAN̄ADE ẸNYENE ENYE
5. (a) Ke nso udomo ke ẹdinyene edidianakiet ke utuakibuot ke akpatre? (b) Ntak edide usọp usọp n̄kpọ ndikabade ndi andituak ibuot nnọ Jehovah idahaemi, ndien didie ke nnyịn ikeme ndin̄wam mbon efen ndinam emi?
5 Uduak Jehovah edi kpukpru enyene-ifiọk edibotn̄kpọ ndidiana kiet ke utuakibuot—owo idaha nsu itụn ndomokiet usụn̄, ndomokiet ifiọn̄ọke-fiọn̄ọ ubọk iyom ke ntak oro mîfiọkke se uwem enen̄erede ọwọrọ. Nnyịn iyom usen emi kpukpru owo oro ẹdude uwem ẹditorode ata Abasi kierakiet didie ntem! (Ps. 103:19-22) Edi mbemiso emi ekemede ndida itie, Jehovah enyene ndinam edibotn̄kpọ esie asana ọbọhọ mbon oro ẹsịnde ima ima itie edidem esie ẹnyụn̄ ẹkọbọde ke ndibiat uwem mbon en̄wen. Ke mbọm enye ọnọ mbemiso ntọt aban̄a se enye edinamde. Mme owo ke kpukpru ebiet ẹnyene ifet ndikpụhọde usụn̄uwem mmọ. Ntem ke eyo nnyịn ẹnam usọp usọp n̄kpeubọk emi ke ofụri ererimbot ẹte: “Mbufo ẹten̄e Abasi, ẹnyụn̄ ẹnọ Enye ubọn̄; koro ekem ini ikpe Esie; ẹnyụn̄ ẹtuak ibuot ẹnọ Enyeemi okobotde enyọn̄ ye isọn̄ ye inyan̄ ye idịm mmọn̄.” (Edi. 14:6, 7) Nte afo ama onyịme ikot oro? Ke edide ntre, edi ifet fo idahaemi ndinam utom ye esop Jehovah ke ndin̄wam mbon en̄wen ẹnam ntre.
6. Ke ima ikekpep mme akpan ukpepn̄kpọ Bible, nso n̄kaiso n̄kọri ke nnyịn ikpodomo ndinam ifịk ifịk?
6 Idịghe uduak Abasi ndida mme owo ẹmi n̄kukụre ẹdọhọde ke mmimọ imonịm Jehovah ke akpanikọ ye nte ke mmimọ imoyom ndidụn̄ ke Paradise edi emi ke ukem ini oro ẹkade iso ndibịne mme udọn̄ ibụk idemmọ, nsịn ke esop esie. Enye oyom mme owo ẹdisịm nnennen “ifiọk uduak Esie,” ndien emi ekpenyene ndiwụt idem ke uwem mmọ. (Col. 1:9, 10) Ke mme owo oro ẹnyenede esịtekọm ẹma ẹkekpep mme akpan ukpepn̄kpọ Bible, mmọ ẹyom ndikọri nsịm ọyọhọ idaha Christian. Udọn̄ mmọ edi ndidiọn̄ọ Jehovah ntotụn̄ọ ntotụn̄ọ, ndinam ifiọk Ikọ esie oro mmọ ẹnyenede atara onyụn̄ otụn̄ọ, nnyụn̄ nda enye nsịn ke edinam ke uwem mmọ ata ọyọhọ ọyọhọ. Mmọ ẹyom nditie nte Ete mmọ eke heaven, ẹwụtde mme edu esie ẹnyụn̄ ẹsede n̄kpọ nte enye esede. Emi onụk mmọ ndidụn̄ọde nyom mme usụn̄ ndibuana ọyọhọ ọyọhọ nte ẹkekeme ke utom emi enye oyomde ẹnam ke isọn̄ ke eyo nnyịn. Nte oro edi se afo anamde?—Eph. 5:1; Heb. 5:12–6:3; 1 Tim. 4:15.
7. Ke mme usụn̄ ewe ke ata edidianakiet ekeme ndidu idahaemi, ndien didie ke ẹnyene enye?
7 Bible owụt ete ke mbon oro ẹnamde n̄kpọ Jehovah ẹnyene ndidi mbon oro ẹdianade kiet. (Eph. 4:1-3) Edidianakiet emi enyene ndidu idahaemi, idem okposụkedi nnyịn idude uwem ke ererimbot emi abaharede inyụn̄ ikade iso ndin̄wana ye mme unana mfọnmma idem nnyịn. Jesus ama ọbọn̄ akam ifịk ifịk ete kpukpru mbet imọ ẹkpedi kiet, ẹdarade ata edidianakiet. Nso ke emi ọwọrọ? Nte ke akpa kan̄a mmọ ẹyenyene eti itie ebuana ye Jehovah ye Eyen esie. N̄ko nte ke mmọ ẹyediana kiet ye eken. (John 17:20, 21) Ke ẹnyene emi idahaemi nte mmọ ẹdade item oro mmọ ẹbọde ke “ufọk” Jehovah ẹsịn ke edinam.
MME N̄KPỌ EWE ẸTỊP ẸSỊN KE EDIDIANAKIET?
8. (a) Nso ke nnyịn ikọri ke ini nnyịn ke idem nnyịn idade Bible ibọrọ mme mbụme ẹmi ẹtụkde nnyịn? (b) Ke ndibọrọ mme mbụme ẹmi ẹbụpde ke enyọn̄ emi, nnam mme n̄kpọ oro ẹtịpde ẹsịn ke edidianakiet Christian an̄wan̄a.
8 Ẹbat ndusụk akpan n̄kpọ ẹmi ẹtịpde ẹsịn ke edidianakiet emi ke idak emi. Nte afo ọbọrọde mbụme ẹmi ẹtienede mmọemi, kere nte kiet kiet otụkde ebuana fo ye Jehovah ye ekemmọ mme Christian. Ndikọk ibuot ke mme akpan n̄kpọ ẹmi ke un̄wana itien̄wed Abasi oro ẹsiakde ẹsịn eyetịp n̄kpọ esịn ke afo ndikọri ukeme ukere n̄kpọ ye esịtifiọk oro Abasi ọnọde ndausụn̄, ẹmi ẹdide edu ẹmi kpukpru nnyịn iyomde. (N̄ke 5:1, 2; Phil. 1:9-11) Ntre kere ban̄a n̄kpọ ẹmi kiet ke ini kiet:
(1) Kpukpru nnyịn ituak ibuot inọ Jehovah imonyụn̄ inyịme unen esie ndinịm edumbet ke se idide eti ye idiọk.
Didie ke Jehovah ekpese emi edieke nnyịn ikoide-koi ifụmi item esie ke n̄kpọ oro etiede nte ekpri n̄kpọ ọnọ nnyịn? (Luke 16:10; men Malachi 1:6-8 domo.)
Nte esitụk mbon en̄wen edieke nnyịn kpukpru ini mîsụkke ibuot inọ mme ewụhọ Jehovah? (Men N̄wed Mbon Rome 5:12; Joshua 7:20-26; 1 Ndidem 14:16 domo.)
(2) Ebiet ekededi emi nnyịn idude ke ererimbot, nnyịn imenyene Ikọ Abasi ndida nnyịn usụn̄.
Ke ini nnyịn inamde mme ubiere, nso n̄kpọndịk idu ke ndinam n̄kukụre se nnyịn “ikerede” ke enen? (Jer. 17:9; N̄ke 14:12)
Edieke nnyịn mîdiọn̄ọke m̀mê nso item ke Bible ọnọ ke n̄kpọ, nso ke nnyịn ikpanam? (N̄ke 2:3-5)
(3) Kpukpru nnyịn ibọ ufọn ito ukem ndutịm udia eke spirit.
Mme idaha ewe ẹdu ke otu mbon oro mîwụtke esịtekọm ke mme ndutịm oro Jehovah anamde ndinọ udia eke spirit? (Men Isaiah 1:3; 9:16; 65:14 domo.)
(4) Jesus Christ, inyụn̄ idịghe baba owo kiet, edi Adausụn̄ nnyịn ye kiet emi ebede ke enye nnyịn kpukpru ika ibịne Jehovah ke utuakibuot.
Nte owo nnyịn ekededi enyene eti ntak ndinịm ke akpanikọ nte ke nnyịn nte mme owo imọfọn ikan mbon en̄wen? (Rome 3:23, 24; 12:3; Matt. 23:8-10)
(5) Inamke n̄kpọ m̀mê nnyịn idụn̄ ke m̀mọ̀n̄, nnyịn ise Obio Ubọn̄ Abasi nte n̄kukụre idotenyịn ubonowo.
Didie ke emi ekpeme nnyịn ọbiọn̄ọ mme odudu ẹmi ẹtọde ubahade? (Matt. 6:9, 10; Mic. 4:3)
(6) Edisana spirit osion̄o mme edu ẹmi ẹdide akpan n̄kpọ ọnọ edidianakiet Christian ke idem mme andituak ibuot nnọ Jehovah.
Didie ke nnyịn iberede usụn̄ inọ spirit Abasi ndision̄o mbun̄wụm esie ke idem nnyịn? (Ps. 1:2; N̄ke 22:4; Edi. 3:6; Utom 5:32)
Didie ke nnyịn ndinyene mbun̄wụm spirit otụk itie ebuana nnyịn ye Jehovah? Ye nditọete nnyịn? (Gal. 5:22, 23)
(7) Kpukpru nnyịn imenyene mbiomo edikwọrọ eti mbụk Obio Ubọn̄ Abasi.
Didie ke nnyịn ndisịn ifịk mbuana ke utom ukwọrọikọ emi ye ekemmọ mme Christian otụk nte nnyịn ikerede iban̄a mmọ? (Men N̄wed Mbon Colossae 4:7, 11 domo.)
9. Nso idi utịp ke ini nnyịn inen̄erede ida mme akpanikọ ẹmi isịn ke edinam ke uwem nnyịn?
9 Ndidiọn̄ọ mme akpanikọ ẹmi edi n̄kpọ kiet. Ndidu uwem ke n̄kemuyo ye mmọ oyom ekese efen efen. Edi ke ini nnyịn inamde ntre, nnyịn imesịk ikpere Jehovah. Ebuana nnyịn ye ekemmọ mme andinịm ke akpanikọ n̄ko akabade edi ebiet nduọkodudu. Nte Psalm 133:1 ọdọhọde ete: “Idụn̄ nditọete ke idem ọtọkiet ọfọn didie! onyụn̄ eye didie!” Nte afo ke idemfo ukwe nte ediwọrọ n̄kpọn̄ ererimbot, ye kpukpru ibụk esie, nnyụn̄ ndu ke mme mbonoesop ye mbon en̄wen emi ke akpanikọ ẹmade Jehovah ekemede ndinọ nduọkodudu?
FEP MME ODUDU ẸMI ẸTỌDE UBAHADE
10. Ntak oyomde nnyịn idu ke ukpeme man ibiọn̄ọ edu nda-ke-idem?
10 Man ikûbiat ọsọn̄urua edidianakiet oro, ana nnyịn ifep mme odudu ẹmi ẹtọde ubahade. N̄wọrọnda kiet ke otu ẹmi edi edu nda-ke-idem. Jehovah an̄wam nnyịn ndifep edu emi ebe ke ndiyarade anditọn̄ọ edu emi, Satan kpa Devil. Enye edi owo emi akabian̄ade Eve ndikere nte ke edidi ke ufọn imọ ndifụmi se Abasi ọkọdọhọde nnyụn̄ nnam mme ubiere idem imọ. Adam ama adiana ye enye ke usụn̄uwem nsọn̄ibuot oro. Utịp ekedi afanikọn̄ ọnọ mmọ ye nnyịn. (Gen. 2:16, 17; 3:1-6, 17-19) Nnyịn idu uwem ke ererimbot emi ọyọhọde ye edu nda-ke-idem oro, ntre ikpakpaha nnyịn idem edieke oyomde nnyịn ibiọn̄ọ edu oro ke idem nnyịn. Ke ima Jehovah an̄wam nnyịn ndinam ntre ebe ke item oro ẹnọde ke esop esie.
11. Nso idiwụt m̀mê nnyịn ke akpanikọ ke iben̄e idem inọ uwem ke edinen obufa ererimbot Abasi?
11 Ebede ke esop oro nnyịn imekpep iban̄a akwa un̄wọn̄ọ Jehovah ndida obufa enyọn̄ ye obufa isọn̄ oro “edinen ido edidụn̄[de]” n̄kpụhọ ye n̄kann̄kụk oro odude kemi. (2 Pet. 3:13) Nnyịn imokop nduaidem ke idotenyịn oro nte ke ibịghike idiọk ererimbot emi eyebe efep ndien ẹyenam isọn̄ akabade edi Paradise. Edi nte usụn̄uwem nnyịn owụt ete ke nnyịn ke esịt-akpanikọ ke itịm idem inọ uwem ke ererimbot emi edinen ido edidide edu oro akarade? Bible asian nnyịn in̄wan̄în̄wan̄ ete: “Ẹkûma ererimbot, ye se idude ke ererimbot. Edieke owo ekededi amade ererimbot, ima Ete idụhe enye ke esịt.” (1 John 2:15) Edi akpanikọ nte ke odu ediwak n̄kpọ oro aban̄ade ererimbot emi owo nnyịn ndomokiet mîmaha. Edi nte nnyịn isua akpan akpan mme n̄kpọ ẹmi ẹdude ke ererimbot ẹmi ẹbiọn̄ọde inemesịt uwem nnyịn idahaemi? Mîdịghe nte nnyịn n̄ko imasua edu esie—edu nda-ke-idem esie, ebeubọk edikere mban̄a idem? Nte nnyịn imenen̄ede inam edi edu oro otode nnyịn esịt ndikpan̄ utọn̄ nnọ Jehovah nnyụn̄ n̄kop uyo esie, kpa ye nsio nsio ntụhọ obụkidem ekededi? Ofụri usụn̄uwem nnyịn—inamke n̄kpọ m̀mê nnyịn idụn̄ ke m̀mọ̀n̄, inamke n̄kpọ m̀mê nso ke nnyịn inam—ọkpọnọ uyarade nte ke ekikere ye uduakesịt nnyịn ẹdi eke Abasi.—N̄ke 3:5, 6.
12. (a) Ntak emi edide akpan n̄kpọ ndida ifet oro odude kemi n̄kpep n̄kpọ mban̄a mme usụn̄ Jehovah nnyụn̄ ntiene mmọ ke uwem nnyịn-e? (b) Nso ke mme itien̄wed Abasi oro ẹsiakde ẹsịn ke ikpehe ekikere emi ẹwọrọ ẹnọ nnyịn owo kiet kiet?
12 Ke ini edikem ini Jehovah edide edisịm ndisobo idiọk editịm n̄kpọ emi ye kpukpru mbon oro ẹmade usụn̄ esie, enye idinamke ubịghi. Enye idisioho ini oro inịm m̀mê ndikpụhọde mme edumbet esie man anam ufan̄ odu ọnọ mbon oro ẹsụk ẹdomode ndisọn̄ọ nyịre ye ererimbot, mbon oro ẹnyenede ubak esịt kpọt ẹban̄a edikpep uduak Abasi nnyụn̄ nnam enye. Ini edinam edi emi! (Luke 13:23, 24; 17:32; 21:34-36) Ke ntre, edi n̄kpọ inemesịt didie ntem ndikụt “akwa otuowo” ẹmi ẹmụmde ọsọn̄urua ifet emi ẹkama, ye ọkpọsọn̄ udọn̄ ẹyomde item oro Jehovah ọnọde ebe ke ima ima esop esie ndien ekem ẹdianade kiet ẹsan̄a ke ọkpọusụn̄ esie!
[Mme Ikọ idakisọn̄]
a Ibọhọke ẹwụt ke usụn̄ efen, mme Itien̄wed Abasi oro ẹkotde ẹsịn ke n̄wed emi ẹto Edisana N̄wed Abasi Ibom, ẹwetde ekekem ye ido uwetn̄wed eyomfịn. Ke ebiet emi NW etienede itien̄wed oro ẹkotde ẹsịn, emi owụt ete ke edikabade oro oto New World Translation of the Holy Scriptures eke Ikọmbakara, Obufa Nsiondi eke 1984.
NNEME NDỤN̄ỌDE
● Nso idi uduak Jehovah kaban̄a utuakibuot?
● Ke ima ikekpep mme akpan ukpepn̄kpọ Bible, nso n̄kaiso n̄kọri ke nnyịn ikpoyom ndinam ifịk ifịk?
● Nso ke nnyịn owo kiet kiet ikeme ndinam, man mme n̄kpọ ẹmi ẹnamde edidianakiet odu oro nnyịn ima ikeneme iban̄a ẹkpetụk uwem nnyịn nte akpanade mmọ ẹtụk?
[Ndise ke page 4]