Mme Esop Ndinam Owo Ẹkọri ke Ima ye Edidianakiet
Ekeme ndidi afo ama odụk ndusụk mbonoesop Mme Ntiense Jehovah oro ẹnịmde ekpere ebiet emi afo odụn̄de. Mme owo ẹtode kpukpru idaha ke uwem—mme otu ubon, mbon oro mîdọhọ ndọ, n̄kpri ye ikpọ—ẹma ẹdu do. Kpukpru mmọ ẹma ẹdiana kiet ke utuakibuot mmọ ẹnyụn̄ ẹnyene udọn̄ ndin̄wam mbon en̄wen.
Ke ndutịm ekededi emi uwak ibat owo ẹyomde ndinam utom ke edidianakiet, oyom edise enyịn odu. Abadi edi Abasi ndutịm; ntem, ẹkpenyene ndiwụt ndutịm emi ke esop ikọt esie. Nte ekedide ke akpa isua ikie, kpasụk ntre ke edi mfịn, ẹsimek irenowo Christian ẹmi ẹdotde, ẹkọride ẹsịm ọyọhọ idaha, ẹnyụn̄ ẹnyenede ifiọk nte mbiowo, m̀mê mme esenyịn. Mmọemi ẹse ẹban̄a esop ẹnyụn̄ ẹkpeme mme udọn̄ n̄kpọ spirit esie. Mme anam-akpanikọ irenowo en̄wen ẹmi ẹkotde mme asan̄autom unamutom ẹsin̄wam mmọ. Irenowo ẹmi ibọhọ okụk ọfiọn̄ m̀mê mme ufọn eken ke n̄kan̄ okụk edi ẹnam utom ke unyịmesịt, ẹbiatde okụk mmọ, emi nte ido edide esitode utom idịbi udia.—1 Corinth 14:33, 40; Philippi 1:1; 1 Timothy 3:8, 9.
Didie ke ẹmek mmọemi? Mmọ ẹnyene ndidi mme anam-akpanikọ asan̄autom Abasi ẹmi ẹwụtde mme n̄kpọ N̄wed Abasi oro anamde mmọ ẹdot. Ndusụk ke otu mmọemi ẹdi: ‘ndifara ke idem, ndinyene eti ibuot, nditịm nsan̄a, ndikama isenowo, ndidot ndikpep owo n̄kpọ, ndinyene sụn̄sụn̄ ido; isịnke esịt ke okụk, otịm akama ufọk esie; idịghe obufa owo ke ido Abasi; enyene eti etop ke otu mmọemi ẹdude ke esien’; ‘ọsọn̄ọ omụm ikọ akpanikọ nte ekemde ye ido ukpepn̄kpọ akama.’—1 Timothy 3:1-15; Titus 1:7-9.
Idịghe esop ẹsimenede ubọk ẹmek irenowo ẹmi, ke ebiet emi n̄wakn̄kan ibat ẹkemede ndidi ata mbufa Christian. Utu ke oro, edi irenowo ẹmi ẹsịmde ọyọhọ idaha ẹnyụn̄ ẹnyenede ifiọk, kpa mbiowo ẹmi ẹnyenede mbufiọk ẹban̄a udomo oro mmọemi ẹkerede ẹban̄a mi ẹsịmde mme n̄kpọ N̄wed Abasi, ẹsitoro mmọ. Ndien ẹsimek mbiowo ye mme asan̄autom unamutom ke idak ndausụn̄ Otu Ukara eke Mme Ntiense Jehovah, ẹnamde emi ẹtiene uwụtn̄kpọ oro esop Christian eke akpa isua ikie okonịmde.
Mbiowo, m̀mê mme esenyịn ẹmi, inamke otu mme ọkwọrọ ederi; mmọ idịghe mme andikara mbon en̄wen. Nte Jesus ọkọdọhọde, ana owo ekededi emi adade usụn̄ odụk ofụn ọnọ kpukpru owo. Ke esop Mme Ntiense Jehovah, mbiowo ke akpanikọ ẹdi ekemmọ mbonutom ẹnọ Obio Ubọn̄ Abasi.—Matthew 20:26, 27; 23:8-11; Rome 12:8; 1 Corinth 3:5; 4:1, 2; Colossae 4:11; 1 Thessalonica 5:12-14.
Nte mme esenyịn, mmọ ẹse ẹban̄a item oro ẹnọde ke mme mbonoesop ẹnyụn̄ ẹda usụn̄ ke utom ukwọrọikọ. Ndikwọrọ eti mbụk Obio Ubọn̄ ke ofụri efakutom oro ẹnọde mmọ edi akpan uduak esop. Mme esenyịn n̄ko ẹsinam utom nte mme ekpemerọn̄, ẹkade ẹkese mme andibuana ke esop man ẹsịn udọn̄ ẹnọ mmọ nte ẹyomde.—Matthew 24:14; Utom 1:8; 1 Thessalonica 2:11, 12; 5:14, 15; 2 Timothy 2:24-26; Mme Hebrew 13:17; James 5:13-16; 1 Peter 5:1-4.
Mbiowo n̄ko ẹnyene mbiomo ndisua nnọ nnyụn̄ ntụnọ owo ekededi emi ekemede ndidi ke etiene ukwan̄ usụn̄ onyụn̄ ekemede ndidi n̄kpọndịk nnọ edisana idaha eke spirit ye eke eti ido uwem ye edidianakiet eke esop.—1 Corinth 5:4, 5, 7, 11-13; Titus 1:9; 2:15; 3:10, 11.
Ndibuana kpukpru ini ye esop eyenam fi enyene nti nsan̄a ye ediwak ufọn eke spirit.—Psalm 35:18; 84:10.
• Mmanie ẹse ẹban̄a mme mbubehe esop kiet kiet?
• Ke nso isọn̄ ke ẹsimek mme esenyịn?
• Nso idi mme mbiomo mmọ?
[Mme ndise ke page 13]
Mme esenyịn ẹnọ esop ukpep, ẹda usụn̄ ke ndikwọrọ ikọ ke ufọk ke ufọk, ẹsịn udọn̄ ẹnọ ke mme isan̄ ubọkerọn̄, ẹnọ item ye nsuannọ ke ini ẹyomde