Ibuot 8

Ẹbọhọ Idiọk Andikara

JOSEPH edemede Mary ke idap man ọnọ enye usọp usọp etop. Angel Jehovah ọmọbiọn̄ọde enye ke iso ndondo oro, ọdọhọde ete: “Daha ke enyọn̄, da nsekeyen ye eka Esie, fehe, ka ke Egypt kodu do, tutu nnọ fi uyo; koro Herod ọmọn̄ oyom nsekeyen oro ndiwot.”

Iwiwa, mmọ mbita ẹfehe ẹbọhọ. Ndien emi edi ke n̄kem n̄kem ini koro Herod ọmọfiọk ete ke mme ọfiọkn̄kpọ owo oro ẹma ẹbian̄a imọ ẹkpọn̄ idụt oro. Ti ete, ke akana mmọ ẹfiak ẹkesian enye ke ini ẹkụtde Jesus. Herod ayat esịt etieti. Ntre ke ndin̄wana ndiwot Jesus, enye ọnọ ewụhọ ete ẹwot kpukpru nditọiren ẹmi ẹdude ke Bethlehem ye ke mme n̄kann̄kụk obio esie ọtọn̄ọde ke eyen isua iba osụhọde. Enye ọkọn̄ ibat isua emana emi ke ntọt oro enye ọkọbọde ke mbemiso oto mme ọfiọkn̄kpọ owo oro ẹtode Edem Usiahautịn.

Ediwot kpukpru nseknditọ iren ẹmi edi n̄kpọ oro enyenede ndịk ndikụt! Mbonekọn̄ Herod ẹsan̄a ke ufọk ke ufọk. Ndien ke ini mmọ ẹkụtde nsekeyen eren, mmọ ẹwamade eka esie ẹbọ. Nnyịn ifiọkke m̀mê nseknditọ ifan̄ ke mmọ ẹwot, edi akwa ntuan̄a ye eseme mme eka nditọ osu prọfesi kiet ke Bible oro Jeremiah, prọfet Abasi eketịn̄de.

Mi kan̄a, Joseph ye ubon esie ẹma ẹfehe ifụre ifụre ẹkesịm Egypt, ndien mmọ ẹdụn̄ do idahaemi. Edi ke okoneyo kiet, angel Jehovah afiak ọbiọn̄ọde Joseph ke ndap. Angel oro ọdọhọ ete, “Daha ke enyọn̄, da nsekeyen ye eka Esie ka ke isọn̄ Israel: koro mmọemi ẹkeyomde uwem nsekeyen oro ẹma ẹkpan̄a.” Ntre, ke edisu prọfesi Bible en̄wen oro ọdọhọde ete ke ẹyekot Eyen Abasi ọwọrọ ke Egypt, ubon emi ẹfiak ẹnyọn̄ isọn̄ emana mmọ.

Nte an̄wan̄ade, Joseph aduak ndidụn̄ ke Judea, ke ebiet oro mmọ ẹkedụn̄de ke obio Bethlehem mbemiso ẹfen̄ede ẹka Egypt. Edi enye okop ete ke idiọk eyen Herod oro, Archelaus edi edidem idahaemi ke Judea, ndien ke ndap efen Jehovah odụri enye utọn̄ aban̄a n̄kpọndịk emi. Ntre Joseph ye ubon esie ẹwọn̄ọ ẹka n̄kan̄ edem edere ẹnyụn̄ ẹkedụn̄ ke obio Nazareth ke Galilee. Edi ke obio emi, emi ọwọrọde ọkpọn̄ iwụk ebiet oro mme Jew ẹdude uwem ido ukpono mmọ, ke Jesus ọkọri okpon. Matthew 2:13-23; Jeremiah 31:15; Hosea 11:1.

▪ Ke ini mme ọfiọkn̄kpọ owo oro mîfiakke idi, nso enyene-ndịk n̄kpọ ke Edidem Herod anam, edi didie ke ẹkpeme Jesus?

▪ Ke otonde Egypt ọnyọn̄ edi, ntak emi Joseph mîdụn̄ke aba ke Bethlehem?

▪ Mme prọfesi Bible ewe ẹsu ke ikpehe ini emi?