Ibuot 31
Ndikịbi Ibokpot ke Usen Sabbath
IBỊGHIKE Jesus ye mme mbet esie ẹkpọn̄ Jerusalem ẹfiak ẹnyọn̄ Galilee. Emi edi ini nsehe-ikọn̄, ndien idem ibokpot ẹdu ke mme eto ibokpot ke in̄wan̄. Biọn̄ ọdọn̄ mme mbet. Ntre mmọ ẹkịbi mbuot ibokpot oro ẹta. Edi sia edide usen Sabbath, mme owo ẹkụt mmọ ẹnamde emi.
Mme adaiso ido ukpono ke Jerusalem ẹkesụk ẹyoyom usụn̄ ndondo emi ndiwot Jesus ke ntak edori ikọ oro nte ke enye abiat Sabbath. Idahaemi mme Pharisee ẹda edori ikọ ẹdi. Mmọ ẹdọhọ ẹte: “Sese, mbet Fo ke ẹnam se mînenke owo ndinam ke usen sabbath.”
Mme Pharisee oro ẹbat ẹte ke ndikịbi ibokpot nnyụn̄ mfiak enye ke ubọk nta edi edikpen̄e ye edibek ibokpot. Edi ekikak ekikak usụn̄ oro mmọ ẹkabarede se ẹdọhọde ke edi utom anam Sabbath edi n̄kpọ oro efịkde-fịk owo, ke adan̄aemi akpanade enye edi ini idara, ye ini edinam owo ọkọri ke n̄kan̄ eke spirit. Ntre ke Jesus ada uwụtn̄kpọ ke N̄wed Abasi ọbọrọ emi ndiwụt nte ke Jehovah Abasi akananam iduakke ite ẹda ibet Sabbath Esie ẹnam n̄kpọ ke utọ ukpan ukpan usụn̄ oro mîdotke mi.
Jesus ọdọhọ ete ke ini David ye irenowo esie ẹkekopde biọn̄, mmọ ẹma ẹdụk ataya ẹnyụn̄ ẹkedia uyo iso Abasi. Ẹma ẹmemen uyo oro ẹfep ke iso Jehovah ẹnyụn̄ ẹnịm mbufa efen ke itie mmọ, ndien ẹkesinịm mmọ san̄asan̄a ẹnọ mme oku ndidia. Kpa ye oro, ke utọ mme idaha oro, owo ikobiomke David ye irenowo esie ikpe ke ndidia mmọ.
Ke ọnọde uwụtn̄kpọ efen, Jesus ọdọhọ ete: “Nte mbufo inyụn̄ ikotke ke ibet nte mme oku ẹmi ẹdude ke temple ẹbiatde sabbath ke usen sabbath, ndien mînyeneke ndudue?” Ih, idem ke usen Sabbath, mme oku ẹsisụk ẹwowot unam ẹnyụn̄ ẹnam mme utom eken ke temple ke nditịm mme unam uwa! Jesus ọdọhọ ete, “Edi ndọhọ mbufo nte, Owo emi okponde akan temple odu mi.”
Ke ọnọde mme Pharisee oro item, Jesus akaiso etịn̄ ete: “Edieke mbufo ẹkpefiọkde se ikọ emi ọdọhọde ete, Edi mbọm ke nnyom, idịghe uwa, ọwọrọde, mbufo ikpobiomke mmọemi mîduehe.” Ekem enye eberi ete: “Koro Eyen Owo edi Ọbọn̄ usen sabbath.” Nso ke ikọ Jesus oro ọwọrọ? Jesus etịn̄ aban̄a emem emem ukara Obio Ubọn̄ esie eke tọsịn isua.
Ke isua 6,000 idahaemi, ubonowo ọmọbọ ufen ọkpọsọn̄ ufịk ke idak Satan kpa Devil, ye afai ye ekọn̄ ẹmi ẹdide n̄kpọ ofụri usen. Ke n̄kan̄ eken, akwa ukara Sabbath Christ edidi ini edibọhọ utọ ndutụhọ ye ufịk oro. Matthew 12:1-8; Leviticus 24:5-9; 1 Samuel 21:1-6; Numbers 28:9; Hosea 6:6.
▪ Nso ikọ ke ẹdori mme mbet Jesus, ndien didie ke Jesus ọbọrọ emi?
▪ Nso ndudue mme Pharisee ke Jesus osio owụt?
▪ Ke nso usụn̄ ke Jesus edi “Ọbọn̄ usen sabbath”?