Ibuot 32
Nso Idi Se Inende ke Usen Sabbath?
EDI ke usen Sabbath efen ke Jesus afiak aka synagogue emi ekperede Inyan̄ Galilee. Owo emi ubọk nnasia esie akpade odu do. Mme scribe ye mme Pharisee ke ẹtịn̄ enyịn ẹse m̀mê Jesus eyenam udọn̄ọ okụre enye. Ke akpatre mmọ ẹbụp ẹte: “Nte enen ndinam udọn̄ọ okụre ke usen sabbath?”
Mme adaiso ido ukpono mme Jew ẹnịm ẹte ke enen ndinam udọn̄ọ okụre owo ke Sabbath n̄kukụre edieke uwem odude ke itie ndịk. Ke uwụtn̄kpọ, mmọ ẹkpep ẹte ke inenke ndidụri m̀mê ndibọp ọkpọ ke usen Sabbath. Ntre mme scribe ye mme Pharisee ẹbụp Jesus mbụme man ẹnyene se ẹdade ẹdori enye ikọ.
Nte ededi, Jesus ọdiọn̄ọ ekikere mmọ. Ke ukem ini oro, enye omokụt ke mmọ ẹmenyene ata ebe-ubọk ekikere oro mîkemke ye n̄wed Abasi ke se ibuanade edibiat n̄kpọ oro utre utom ke usen Sabbath oyomde. Ntre Jesus eben̄e idem ọnọ ndyọ ndyọ nneme iso ye iso ke ndidọhọ eren oro ubọk akpade mi ete: “Wọrọ di, da mi ke ufọt.”
Idahaemi, ke ọwọn̄ọrede ese mme scribe ye mme Pharisee, Jesus ọdọhọ ete: “Anie owo ke otu mbufo, emi enyenede erọn̄ kiet, editre ndimụm enye nsio ke obube eke ọduọde ke esịt ke usen sabbath?” Sia erọn̄ adade aban̄a mbubehe okụk, mmọ ikpayakke enye esịne ke obube oro tutu ndan̄nsiere, iso-ọfọn ọdọn̄ọde, onyụn̄ edide ntakurua ọnọ mmọ. Ke ẹsiode oro ẹfep, N̄wed Abasi ọdọhọ ete: “Eti owo ekere uwem unam esie.”
Ke emende odomo nte edide ukem, Jesus akaiso ete: “Owo ọmọsọn̄ urua akan erọn̄ adan̄a didie ndien! Mmọdo enen ndinam ufọn ke usen sabbath.” Mme adaiso ido ukpono ikemeke ndifan̄a utọ esịne-ifiọk, ima ima utịn̄ikọ oro, mmọ ẹnyụn̄ ẹdop uyo.
Jesus ọwọn̄ọde ada ke iyatesịt ọkọrọ ye edifụhọ mban̄a ndisịme itụn itụn edinam mmọ. Ekem enye ọdọhọ eren oro ete: “Nyanade ubọk fo.” Ndien enye anyanarede ẹnyụn̄ ẹnam ubọk esie ọfọn.
Utu ke ndinem esịt nte ke ẹnam ubọk owo oro afiak ọfọn, mme Pharisee ẹwọn̄ọ ẹnyụn̄ ẹsọsọp ẹkedụk odu ye otu mme anditiene Herod man ẹwot Jesus. N̄ka ukara ukaraidem emi nte an̄wan̄ade esịne mme andibuana ke ido ukpono Sadducee. Nte ido edide, mme n̄ka ukara ukaraidem ẹmi ye mme Pharisee ẹsidu ke ata ntuaha ye kiet eken, edi mmọ ẹtịm ẹdiana kiet ke edibiọn̄ọ oro mmọ ẹbiọn̄ọde Jesus. Matthew 12:9-14; Mark 3:1-6; Luke 6:6-11; Mme N̄ke 12:10; Exodus 20:8-10.
▪ Nso ndyọ ndyọ nneme iso ye iso idu ke ufọt Jesus ye mme adaiso ido ukpono mme Jew?
▪ Nso ke mme adaiso ido ukpono mme Jew ẹnịm ke akpanikọ ẹban̄a ukọk udọn̄ọ ke usen Sabbath?
▪ Nso uwụtn̄kpọ ke Jesus ada ndiwụt ke mme ukwan̄ ekikere mmọ inenke?