Ibuot 64

Ukpepn̄kpọ Edifen Nnọ

NTE an̄wan̄ade Jesus osụk odu ye mme mbet esie ke ufọk oro ke Capernaum. Enye ke eneme ye mmọ aban̄a nte ẹkpebierede mme mfịna ke otu nditọete, ntre Peter obụp ete: “Ọbọn̄, ikafan̄ ke eyenete mi edidue mi, ndien ndahado nnọ enye?” Sia mme andikpep ke ido ukpono mme Jew ẹdọhọde ẹfen ẹnọ owo utịm ikata, ekeme ndidi Peter ekere ke enen̄ede edi mfọnido ndinọ ekikere nte “tutu osịm utịm ikatiaba?”

Edi ofụri ekikere ndisịn utọ ibat ntre ke esịt inenke. Jesus enen̄ede Peter ete: “Ndọhọke fi nte, tutu osịm utịm ikatiaba, edi tutu osịm ikatiaba ke itie ata-ye-duop.” Enye owụt ete ke Peter ikpenyeneke ndinịm adan̄a ke ibat ndudue oro enye efende eyenete esie.

Man anam mme mbet ẹtịm ẹdiọn̄ọ mbiomo mmọ eke edifen nnọ owo, Jesus otop n̄ke ọnọ mmọ. Enye aban̄a edidem oro oyomde ndinam ibat ye ifụn esie. Ẹda ofụn kiet emi akamade enye akpakịp isọn oro osịmde denarius 60,000,000 ẹsọk enye. Usụn̄ ndomokiet idụhe nte enye edikemede ndikpe. Ntre, nte Jesus anamde an̄wan̄a, edidem ọnọ uyo ete ẹnyam enye ye n̄wan esie ye nditọ esie ẹnyụn̄ ẹda ẹsio isọn oro.

Ke okopde oro, ofụn oro ọduọ eteufọk esie ke ukot onyụn̄ ekpe ubọk ete: “Ọbọn̄, me ime ye ami, ndien nyesio kpukpru nnọ fi.”

Ke owụtde enye esịtmbọm, eteufọk oro abiat akpakịp isọn ofụn oro efep. Jesus akaiso ete, edi ibịghike nte eteufọk esie akadahadedo ọnọ enye, owo oro adaha ọwọrọ onyụn̄ okokụt ekemmọ ofụn emi akamade enye denarius 100 kpọt. Eren oro omụm ekemmọ ofụn onyụn̄ ọtọn̄ọ ndifịk enye itọn̄, ete: “Sio se akamade mi.”

Edi ekemmọ ofụn oro inyeneke okụk oro. Ntre ke enye ọduọ ke ukot ofụn oro enye akamade isọn onyụn̄ ekpe enye ubọk ete: “Me ime ye ami, ndien nyesio nnọ fi.” Ofụn oro inyeneke esịtmbọm nte eteufọk esie, onyụn̄ anam ẹda ekemmọ ofụn ẹketop ẹsịn ke ufọk-n̄kpọkọbi.

Nte ededi, Jesus akaiso ete, ke ifụn eken ẹmi ẹkekụtde se ikotịbede ẹdaha ẹketịn̄ ẹnọ eteufọk oro. Enye ke iyatesịt ọdọn̄ ẹkekot ofụn oro edi. Enye ọdọhọ ete: “Afo idiọkowo, n̄kadahado ke kpukpru isọn oro nnọ fi, sia eben̄ede mi. Nte afo nde ukpatuaha eyenete fo mbọm, kpa nte n̄katuade fi mbọm?” Ke iyatesịt, eteufọk oro ayak ofụn anana-esịtmbọm oro esịn mme anditụhọde owo ke ubọk tutu enye osio kpukpru se enye ­akamade.

Ekem Jesus eberi ete: “Kpasụk ntre ke Ete Mi ke heaven edinam ye mbufo, ke mbufo kiet kiet mîfenke eyenete mbufo ke ofụri esịt.”

Nso eti ukpepn̄kpọ edifen nnọ! Ke ẹmende akwa isọn idiọkn̄kpọ oro Abasi efende ọnọ nnyịn ẹdomo, sededi idiọkn̄kpọ oro eyenete Christian akpanamde nnyịn edi ata ekpri. Akande oro, Jehovah Abasi emefen ọnọ nnyịn utịm ike ediwak tọsịn. Ediwak ini, nnyịn isikam ifiọkke mme idiọkn̄kpọ oro inamde enye. Mmọdo, nte nnyịn ikemeke ndifen nnọ eyenete nnyịn utịm ikafan̄, idem edieke nnyịn ikpenyenede ntak ndisio usiene? Nte Jesus ekekpepde ke Ukwọrọikọ oro ke Obot, ẹti ẹte ke Abasi ‘edidahado ke isọn eke ikamade Enye, nte emi nnyịn idahadedo inọ mmọemi ẹkamade nnyịn isọn.’ Matthew 18:​21-35; 6:12; Colossae 3:⁠13.

▪ Nso inam Peter obụp mbụme aban̄a edifen nnọ eyenete esie, ndien ntak emi enye ekemede ndida nte ke ekikere edifen nnọ owo oro imọ inọde iban̄a utịm ikatiaba edi ediwụt mfọnido?

▪ Didie ke usụn̄ nte edidem oro anamde n̄kpọ aban̄a n̄kpeubọk ofụn esie kaban̄a mbọm okpụhọde ye se ofụn oro anamde aban̄a n̄kpeubọk ekemmọ ofụn?

▪ Nso ke nnyịn ikpep ito n̄ke Jesus oro?