Ibuot 65
Ẹnam Ndịbe Ndịbe Isan̄ Ẹka Jerusalem
EDI ini-utọ eke 32 C.E., ndien Usọrọ Mme Ataya ke ekpere. Jesus akanam utom ukwọrọikọ esie akamba akamba ke Galilee toto ke Passover eke 31 C.E., ke ini mme Jew ẹkedomode ndiwot enye. Anaedi, tọn̄ọ ke ini oro Jesus akaka Jerusalem n̄kukụre man okodụk usọrọ ita oro mme Jew ẹkesinịmde ke isua ke isua.
Nditọeka iren Jesus ẹdọhọ enye ẹte: “Daha ke ọtọ emi, ka ke Judea.” Jerusalem edi akpan obio Judea ye iwụk ebiet ido ukpono eke ofụri idụt oro. Nditọeka esie iren ẹnọ ekikere ẹte: “Baba owo kiet itiehe ke ndịbe inam n̄kpọ, ke ini enye oyomde ndidu ke iso owo an̄wan̄wa.”
Okposụkedi James, Simon, Joseph, ye Judas mînịmke ke akpanikọ ite ke akpan eka mmọ, Jesus, enen̄ede edi Messiah, mmọ ẹyom enye ada utịbe utịbe odudu esie okowụt kpukpru mbon oro ẹdude ke usọrọ oro. Nte ededi, Jesus ọfiọk aban̄a n̄kpọndịk oro odude. Enye ọdọhọ ete: “Ererimbot ikemeke ndisua mbufo; edi asua Mi, koro Ami ntịn̄de ikọ ntiense ndian enye nte, se enye anamde ọdiọk.” Ntre Jesus ọdọhọ nditọeka esie iren ete: “Mbufo ẹdọk ẹka usọrọ: Ami ndọkke kan̄a n̄ka usọrọ emi.”
Usọrọ Mme Ataya edi usọrọ usen itiaba. Ẹda enye ẹdisịm utịt ke ọyọhọ usen itiaita ye mme edinam ido ukpono. Usọrọ emi anam ẹdiọn̄ọ ini oro isua utọ-in̄wan̄ etrede onyụn̄ esidi ini akwa idara ye esịtekọm. Ediwak usen ke nditọeka iren Jesus ẹma ẹkesan̄a ẹka ndidụk usọrọ, ẹsan̄ade ye akpan otu mbonisan̄, enye ye mbet esie ẹnam isan̄ ndịbe ndịbe ẹka, iyakke otuowo ẹkụt mmọ. Mmọ ẹsan̄a usụn̄ ebede Samaria, utu ke ndisan̄a enyeoro ata ediwak owo ẹsan̄ade, emi ekperede Akpa Jordan.
Sia Jesus ye mbonisan̄ esie ẹdiyomde itieidụn̄ ke obio-in̄wan̄ mbon Samaria, enye ebemiso osio mme isụn̄utom ọdọn̄ ẹketịm itie. Nte ededi, mme owo inyịmeke ndinam n̄kpọ ndomokiet nnọ Jesus ke ẹfiọkde ẹte ke enye enen iso ndika Jerusalem. Ke iyatesịt James ye John ẹbụp ẹte: “Ọbọn̄, nte omonyịme nnyịn ikot ikan̄ oto ke enyọn̄ osụhọde edita mmọ?” Jesus asua ọnọ mmọ ke ndinọ ekikere mban̄a utọ n̄kpọ ntre, mmọ ẹnyụn̄ ẹnam isan̄ ẹka obio-in̄wan̄ efen.
Nte mmọ ẹsan̄ade ke usụn̄, scribe kiet edidọhọ Jesus ete: “Andikpep, nyetiene Fi n̄ka ebiet eke Afo edikaka.”
Jesus ọbọrọ enye ete, “Ebua-ikọt ẹnyene ndudu, inuen enyọn̄ ẹnyụn̄ ẹnyene mme efọk; edi Eyen Owo inyeneke ọtọ eke odoride ibuot Esie.” Jesus anam an̄wan̄a nte ke scribe oro eyekụt nsọn̄ọn̄kpọ edieke enye akabade edi mbet Imọ. Ndien se idude etie nte ke scribe oro okohode idem akaha ndiyom usụn̄ uwem emi.
Jesus ọdọhọ owo en̄wen ete: “Tiene Mi.”
Owo oro ọbọrọ ete, “Yak mbem iso n̄ka n̄kobụk ete mi.”
Jesus ọbọrọ ete, “Yak mme akpan̄kpa ẹbụk mme akpan̄kpa mmọ; edi afo, ka kọkwọrọ Ubọn̄ Abasi.” Nte an̄wan̄ade, ete owo oro ikakpaha kan̄a, koro edieke ekpedide ntre, eyen esie ikpedehedei idu mi ndikpan̄ utọn̄ nnọ Jesus. Nte an̄wan̄ade, eren emi ọdọhọ ẹnọ imọ ini nditie mbet tutu ete imọ akpa. Enye iben̄eke idem ndinịm Obio Ubọn̄ Abasi akpa ke uwem esie.
Nte mmọ ẹsan̄ade ke usụn̄ ẹka Jerusalem, eren efen nde ọdọhọ Jesus ete: “Nyetiene Fi, Ọbọn̄, edi yak mbem iso n̄ka n̄kọkọm mmọemi ẹdude ke ufọk.”
Ke ibọrọ Jesus ọdọhọ enye ete: “Baba owo kiet emi akabarede ese edem, ke enye ama ekesịn ubọk ke ufụn̄isọn̄, ikemke ndinam utom Ubọn̄ Abasi.” Ana mmọ oro ẹdidide mbet Jesus ẹyak enyịn mmọ ẹwụhọ ke utom Obio Ubọn̄. Kpasụk nte udịm n̄kpụfan̄ ebono ẹkemede ndikabade ndi ukwan̄ ukwan̄ edieke ofụn̄isọn̄ mîsehe iso nnennen, ntre owo ekededi oro ọwọn̄ọrede iso ke edem ke akani editịm n̄kpọ emi ekeme ndituak ukot nduọ mfọn mfọn n̄kpọn̄ usụn̄ adade osịm nsinsi uwem. John 7:2-10; Luke 9:51-62; Matthew 8:19-22.
▪ Mmanie ẹdi nditọeka iren Jesus, ndien mmọ ẹkere didie ẹban̄a enye?
▪ Ntak emi mbon Samaria ẹsọn̄de ido ntre, ndien nso ke James ye John ẹyom ndinam?
▪ Nso nneme ita ke Jesus enyene ke usụn̄, ndien didie ke enye ọsọn̄ọ etịn̄ ufọn ẹyomde utom uwaidem?