Anie Enen̄ede Akara Ererimbot?

Ediwak owo ẹda ikọ kiet kpọt ke ndibọrọ mbụme enyọn̄ emi—Abasi. Edi ke edide akpan n̄kpọ, idụhe baba ebiet kiet oro Bible ọdọhọde ke Jesus Christ m̀mê Ete esie ẹdi mme ata andikara ererimbot emi. Ke okpụhọrede ye oro, Jesus ọkọdọhọ ete: “Ẹmọn̄ ẹdisio ọbọn̄ ererimbot emi ẹduọk.” Ndien enye ama adian do ete: “Ọbọn̄ ererimbot emi ke edi, enye inyụn̄ inyeneke baba n̄kpọ kiet ke esịt Mi.”—John 12:31; 14:30; 16:11.

Ntre andikara ererimbot emi ọbọbiọn̄ọ Jesus. Anie ke enye ekpedi?

Usọbọ ke Mme Idaha Ererimbot

Kpa ye ukeme mme owo eti uduak, ererimbot omokụt ndutụhọ idiọk idiọk ke ofụri mbụk. Emi anam mme owo oro ẹkerede n̄kpọ ẹyịk, kpa nte David Lawrence ewet akpan ibuotikọ n̄wedmbụk n̄kpọntịbe oro akakpade ekeyịkde ete: “‘Emem ke isọn̄’—ekpere ndidi kpukpru owo ẹyom enye. ‘Edinyene eti esịt mban̄a mme owo’—ekpere ndidi kpukpru owo ke ererimbot ẹnyene emi ẹnọ kiet eken. Do nso ikwan̄a? Ntak emi ekọn̄ edịgherede owo kpa ye mme ndammana udọn̄ mme owo?”

Etie nte ntuaha odu, nte idụhe? Ke ini ndammana udọn̄ owo edide ndidu ke emem, mmọ kpukpru ini ẹmesua ẹnyụn̄ ẹwot kiet eken—ndien ke utọ ibak ibak usụn̄ ntre. Kere ban̄a mme ebeubọk unana mbọm ibak ibak nsọn̄ido. Mme owo ke unana mbọm ẹmeda mme ubet ofụm n̄kpa, mme itienna ekikere, mme n̄kpọekon̄ ẹmi ẹtopde edemeikan̄, mme bọm edemeikan̄, ye mme enyene-ndịk usụn̄ efen ke nditụhọde nnyụn̄ n̄wot kiet eken.

Nte afo omonịm ke akpanikọ ete ke mme owo, oro ẹyomde emem ye inemesịt, ke idemmọ, ẹkeme ndinam mme utọ ikpọ ndiọi ido oro ye mbon efen? Mme odudu ewe ẹnụk mme owo ẹdọn̄ ke mme utọ etek-owo-esịt edinam oro mîdịghe ọwọn̄ọrede mmọ esịn ke mme idaha ẹmi mmọ ẹkụtde nte ẹnyịkde mmimọ ndinam ibak? Nte akanam afo emeyịk m̀mê ndusụk ndiọi odudu oro enyịn mîkwe onụk mme owo ndinam mme utọ edinam afai oro?

Ẹnam Ẹdiọn̄ọ Mme Andikara Ererimbot

Ufọn idụhe ndikekere n̄kpọ emi, koro Bible owụt in̄wan̄în̄wan̄ ete ke enyene-ifiọk owo, oro enyịn mîkwe akara mme owo ye mme idụt. Enye ọdọhọ ete: “Ofụri ererimbot onyụn̄ esịne ke ubọk andidiọk.” Ndien Bible anam ẹdiọn̄ọ enye, ọdọhọde ete: “[Enyeoro] ẹkotde enye ẹte, andidori ikọt Abasi ikọ ye Satan, andibian̄a ofụri ererimbot.”—1 John 5:19; Ediyarade 12:9.

Ke idaha kiet ke ini ‘Satan okodomode’ Jesus, Jesus ikafan̄ake idaha Satan nte andikara ererimbot emi. Bible anam se ikotịbede an̄wan̄a ete: “Satan ada Enye aka ke ata edikon̄ obot, onyụn̄ owụt Enye kpukpru mme obio ererimbot ye ubọn̄ mmọ; onyụn̄ ọdọhọ Enye ete, Nyenọ Fi kpukpru n̄kpọ ẹmi, edieke ọduọde ke isọn̄ atuak ibuot ọnọ Mi. Ekem Jesus ọdọhọ enye ete, Daha Mi ke usụn̄, Satan.”—Matthew 4:1, 8-10.

Kere ban̄a emi. Satan okodomo Jesus ke ndinọ enye “kpukpru mme obio ererimbot.” Edi, nte se Satan ọkọnọde ẹkpekedi ata idomo edieke Satan mîkenen̄ekede idi andikara mme obio ererimbot ẹmi? Baba, enye ikpedịghe. Ndien tịmfiọk, Jesus ikafan̄ake ite ke kpukpru ukara ererimbot ẹmi ikedịghe eke Satan, emi enye akpakafan̄ade edieke edide Satan ikenyeneke odudu ke idem mmọ. Ntre, ndien, Satan kpa Devil enen̄ede edi andikara ererimbot oro enyịn mîkwe! Bible, ke akpanikọ, okot enye “abasi eyo emi.” (2 Corinth 4:4) Edi, didie ke utọ idiọk owo oro akakam edi edisịm okopodudu idaha emi?

Enyeemi akakabarede edi Satan ekedi angel emi Abasi okobotde, edi enye ama akabarede ofụbe idaha Abasi. Enye ama amia ata ye unen itie edikara Abasi. Ke ntak emi enye ama ada urụkikọt nte etịn̄ikọ ke ibuot esie ndibian̄a akpa an̄wan oro, Eve, ndien ke ntem ama ekeme ndinam enye ye ebe esie, Adam, ẹnam uyo esie utu ke ndikop uyo Abasi. (Genesis 3:1-6; 2 Corinth 11:3) Enye n̄ko ama ọdọhọ ke imọ imekeme ndiwọn̄ọde kpukpru nditọ Adam ye Eve ẹmi mîmanake kan̄a n̄kpọn̄ Abasi. Ntre Abasi ama ayak ini odu ọnọ Satan man odomo ndisọn̄ọ se enye ọkọdọhọde, edi Satan ikwe unen.—Job 1:6-12; 2:1-10.

Ke edide akpan n̄kpọ, Satan idụhe ikpọn̄ ke itie edikara ererimbot esie. Enye ama okụt unen ke nditap ndusụk angel efen ndidiana ye enye ke nsọn̄ibuot ye Abasi. Mmọemi ẹma ẹkabade ẹdi mme demon, kpa ndiọi nsan̄a esie eke spirit. Bible etịn̄ aban̄a mmọ ke ini enye akpakde mme Christian ete: “[Ẹn̄wana] ye n̄kari Satan. Koro nnyịn mîn̄wanake en̄wan nnyịn ye obụk ye iyịp, edi in̄wana . . . ye mme andikara ekịm ererimbot, ye udịm mme idiọk spirit eke ẹdude ke enyọn̄.”—Ephesus 6:11, 12.

Biọn̄ọ Mme Idiọk Spirit

Mme andikara ererimbot ẹmi enyịn mîkwe mi ẹbiere ndida ofụri ubonowo ntụn usụn̄, ẹwọn̄ọrede mmọ ẹkpọn̄ utuakibuot Abasi. Usụn̄ kiet oro mme idiọk spirit ẹnamde emi edi ke nditoro ekikere oro nte ke owo ẹsikaiso odu uwem ke ama akakpa, idem okposụkedi Ikọ Abasi owụtde in̄wan̄în̄wan̄ ete ke mme akpan̄kpa ifiọkke n̄kpọ. (Genesis 2:17; 3:19; Ezekiel 18:4; Psalm 146:3, 4; Ecclesiastes 9:5, 10) Ntem, idiọk spirit, ke adade uyo owo oro akakpade, ekeme ndinyene nneme ye mme iman m̀mê mme ufan akpan̄kpa oro ẹdude ke uwem, ebe ke enyene-nsan̄a ekpo m̀mê ke “uyo” oro otode ebiet oro enyịn mîkwe. “Uyo” oro etie nte eke owo oro akakpade, edi enye ke akpanikọ edi eke demon!

Ntre edieke edide akanam afo omokop utọ “uyo” oro, kûyak ẹbian̄a fi. Sịn sededi oro enye etịn̄de, nyụn̄ tịn̄ mme ikọ Jesus ẹmi: “Daha Mi ke usụn̄, Satan.” (Matthew 4:10; James 4:7) Kûyak ọkpọsọn̄ udọn̄ oro aban̄ade obio mme spirit anam fi enyene ebuana ye mme idiọk spirit. Ẹkot utọ ebuana oro ubụpekpo, ndien Abasi ọtọt mme andituak ibuot nnọ enye ete ẹfep emi ke kpukpru uduot esie. Bible obiom “abiaidiọn̄ . . . ye obụp idem, ye owo n̄kukụt, ye obụp ekpo” ikpe.—Deuteronomy 18:10-12; Galatia 5:19-21; Ediyarade 21:8.

Sia ubụpekpo adade owo esịn ke idak odudu mme demon, biọn̄ọ kpukpru edinam esie inamke n̄kpọ adan̄a udomo inem, m̀mê nduaidem, oro ekemede nditie nte mmọ ẹkama. Mme edinam ẹmi ẹsịne edise ekara itiat-inụn̄, edikama obukpọk ndomo, ifiọk oro akande ukeme owo, edidụn̄ọde mme udịm ekaubọk owo (udụn̄ọde n̄wed ekaubọk), ye edisiak ntantaọfiọn̄. Mme demon n̄ko ẹsinam uyom ye utịben̄kpọ eken oro enyịn ekemede ndikụt ke mme ufọk oro mmọ ẹnamde ẹdi efakutom mmọ.

Ke adianade do, mme idiọk spirit ẹsikama ntụhọ unamidiọk mme owo ẹnam n̄kpọ ke nditoro mme n̄wed, ndise senima, ye mme edinam television oro ẹwụtde oburobụt ido idan̄ ye idan̄ oro mîdịghe ndammana. Mme demon ẹfiọk ẹte ke edieke owo mîsioho ukwan̄ ekikere ifep ke esịt ntụk oro owo mîkemeke ndisọhi mfep eyedemede onyụn̄ ada mme owo okosịm edidu oburobụt uwem—ukem nte mme demon ke idemmọ.—Genesis 6:1, 2; 1 Thessalonica 4:3-8; Jude 6.

Edi akpanikọ, ediwak owo ẹkeme ndisak ekikere oro nte ke mme idiọk spirit ẹkara ererimbot emi. Edi unana edinịm ke akpanikọ mmọ ikpaha owo idem, sia Bible ọdọhọde ete: “Satan ke idemesie ke oforo angel un̄wana.” (2 Corinth 11:14) Abian̄a esie oro okụtde unen akan edi eke edinam enyịn ediwak owo okịm kaban̄a akpanikọ oro nte ke enye ye mme demon esie ẹnen̄ede ẹdu. Edi kûyak ẹbian̄a fi! Devil ye mme demon esie ẹnen̄ede ẹdu, ndien oyom afo ọbiọn̄ọ mmọ kpukpru ini.—1 Peter 5:8, 9.

Ke inemesịt, ini emi Satan ye mme nsan̄a esie mîdidụhe aba ekpere kemi! Bible ọn̄wọn̄ọ ete, “Ererimbot [esịnede mme andikara esie ẹdide mme demon] ke ebebe efep . . . edi owo eke anamde se Abasi amade ododu ke nsinsi.” (1 John 2:17) Nso ubọhọ ke emi edidi ntem ke ẹsiode idiọk odudu oro ẹfep! Ke ntre, nnyịn ikpakam idu ke otu mbon oro ẹnamde uduak Abasi ẹnyụn̄ ẹdarade uwem ke nsinsi ke edinen obufa ererimbot Abasi.—Psalm 37:9-11, 29; 2 Peter 3:13; Ediyarade 21:3, 4.

Ibọhọke ẹwụt ke usụn̄ efen, kpukpru itie Bible oro ẹkotde ẹto Edisana N̄wed Abasi Ibom.

[Ndise ke page 4]

Nte Satan ọkpọkọnọ Jesus kpukpru ukara ererimbot ẹmi edieke mmọ mîkpekedịghe eke esie?