Mbụk Obio Ubọn̄ Nọ. 34

Ntak Emi Uwem Ọyọhọde Ntem ye Mme Mfịna?

Nte paradise oro afanikọn̄ mîdụhe ekeme ndidu?

IKPỌ MFỊNA ẸDỌDIỌN̄ ẸDIỌK—NTAK-A?

Mme owo ẹsinyene mfịna kpukpru ini. Okposụkedi ediwak owo ẹkekerede ke ifiọk ubotn̄kpọ eyomfịn ekeme ndikọk mmọ, ikpọ mfịna ke ẹdọdiọk ẹkan.

Ubiatibet: Ibat ibat owo ẹnyene ifụre ndisan̄a ke mme efak m̀mê idem nditie ke ufọk mmọ. Ke idụt Europe kiet, se ikperede ndidi owo 1 ke otu owo 3 ekedi owo unọmọ ubiatibet ke isua ndondo emi.

N̄kann̄kụk: Edisabade ofụm, isọn̄, ye mmọn̄ ọdọdiọn̄ atara. Ke mme idụt ẹmi ẹtọn̄ọde-tọn̄ọ ntatenyịn, mbahade owo kiet ke itie inan̄ inyeneke eti mmọn̄.

Unana: Mbon ubuene ye mbon ọbiọn̄ ẹwak ẹkan nte akanam edide. Mme owo ẹbede mbahade 90 eke ikie ke ndusụk idụt ẹdu uwem unana; mbonutom ke ererimbot ẹdide mbahade 30 eke ikie, n̄kpọ nte owo miliọn 800, inyeneke utom m̀mê inyeneke eti utom—ndien ibat oro ọkọkọri.

Biọn̄: Idem edieke afo ke idemfo enyenede ekese n̄kpọ ndidia, ediwak miliọn owo oro ibat akade-kaiso ndikọri inyeneke. Ke mme idụt oro ntatenyịn mîdụhe, isua kiet kiet miliọn owo 13 ke nsụhọde n̄kaha, akpan akpan nditọwọn̄, ẹsikpan̄a ke ntak ọbiọn̄.

Ekọn̄: Ẹmewot ediwak tọsịn owo ke mme itie ikie ke afai eke ekpụk ke ndondo emi. Ndien ke ọyọhọ isua ikie 20 emi, ekọn̄ ẹmewot se itịmde iwak ibe miliọn owo ikie.

Mme Mfịna Eken: Dian n̄wụre ubon oro ọdiọkde-diọk akan, mme eka efen efen oro mîdọhọ ndọ, unana ufọk oro ọkọride-kọri, ntatara edida n̄kpọsọn̄ ibọk ke idiọk usụn̄, oburobụt ido oro atarade asuana ke se idude ke enyọn̄ emi. Nte enende, akani owo esop ukara United States kiet ọkọdọhọ ete: “Ata ediwak uyarade ẹkam ẹdu ke nte . . . ntatenyịn abiarade.” Ke ikpehe isua 30 eke ndondo emi, ibatowo United States ama ọkọri ke mbahade 41 eke ikie, edi afai afai ubiatibet ama ọkọri usọp usọp okosịm mbahade 560 eke ikie, nditọ akpara mbahade 400 eke ikie, usiondọ mbahade 300 eke ikie, mme uyen ndiwot idem ọkọri ebe mbahade 200 eke ikie. Idaha odude edi ukem ke mme idụt efen.

Ntak Emi Mme Mfịna Ẹdiọn̄de-diọn̄ Ẹdiọk?

Andibot nnyịn ọnọ ibọrọ. Ikọ esie okot eyo emi ọyọhọde ye mfịna mi “ukperedem ini,” kpa ikpehe ini emi “ndiọkeyo” ẹdude. (2 Timothy 3:1) Ukperedem ini nso? Ọfọn, Bible etịn̄ aban̄a “utịt ererimbot.”—Matthew 24:3, King James Version.

Mme mfịna ẹmi ẹkọride-kọri mfịn ẹdi in̄wan̄în̄wan̄ uyarade nte ke utịt editịm n̄kpọ emi ekpere, esịnede utịt idiọkido ye mbon oro ẹdide ntak esie. (Matthew 24:3-14; 2 Timothy 3:1-5; Ediyarade 12:7-12) Idibịghike Abasi eyesịbe odụk onyụn̄ okụt ete ke ẹkọk kpukpru mfịna ẹmi ẹdude mfịn ofụri ofụri.—Jeremiah 25:31-33; Ediyarade 19:11-21.

MME IDO UKPONO ERERIMBOT EMI ẸMEKPU

Utu ke ndin̄wam ndikọk mme mfịna ẹdude mfịn, ndutịm ido ukpono ererimbot emi ananam mmọ ẹtọt. Ke mme ini ekọn̄, mbon Catholic ẹsiwot mbon Catholic, mbon Protestant ẹwot mbon Protestant—ke ediwak miliọn. Ndondo emi ke Rwanda, emi ata ediwak owo ẹdide mbon Catholic, mme owo ẹma ẹwot kiet eken ke ediwak tọsịn ke mme itie ikie! (Se ndise odude ke ubọk ufien.)

Nte Jesus akpakama ikan̄ m̀mê ofụt aka ekọn̄ onyụn̄ owot mme mbet esie sia idụt mmọ edide isio ye eke esie? Ke akpanikọ ikpanamke oro! “Owo emi amade Abasi,” Bible ọdọhọ, “edima eyenete esie n̄ko.” (1 John 4:20, 21) Mme ido ukpono ererimbot emi ẹmekpu ndinam oro. “Mmọ ẹdọhọ ẹte, mmimọ ifiọk Abasi; edi mmọ ẹkan̄ Enye ke ido mmọ.”—Titus 1:16.

N̄ko-n̄ko, ke editre ndinen̄ede nsọn̄ọ mmụm mme idaha Bible kaban̄a ido uwem n̄kama, mme ido ukpono ererimbot ẹtịp n̄kpọ ẹsịn ke enyene-ndịk n̄wụre eke ido uwem ke ofụri isọn̄.

Jesus ọkọdọhọ ke afo emekeme ndida ‘mfri esie’—se mme andibuana ke enye ẹnamde—ndiọn̄ọ nsunsu ido ukpono ye ido ukpono akpanikọ. Enye ama ọdọhọ n̄ko ete: “Ẹkpi kpukpru eto eke mîn̄wụmke eti mfri ẹduọk, ẹmen, ẹtop, ẹsịn ke ikan̄.” (Matthew 7:15-20) Ikọ Abasi akpak nnyịn ete iwọrọ ikpọn̄ ido ukpono oro on̄wụmde idiọk mfri ndien ke ntem ebetde nsobo.—Ediyarade 18:4.

Ido Ukpono Akpanikọ Ikpụho

Ido ukpono akpanikọ ‘on̄wụm eti mfri,’ akpan akpan ima. (Matthew 7:17; John 13:34, 35) Ewe otu nditọete Christian ofụri ererimbot oro adianade kiet enyene utọ ima oro? Mmanie ẹtre ndiwot mbon ido ukpono mmọ m̀mê owo en̄wen ekededi?—1 John 3:10-12.

Mme Ntiense Jehovah ẹnyene enyịn̄ nte mme andin̄wụm “eti mfri” oro. Ke ofụri ekondo, ke se iwakde ikan idụt 230, ‘mmọ ẹda ofụt mmọ ẹdom n̄kpọ ufụn̄isọn̄.’ (Isaiah 2:4) Ẹwụt ima oro mmọ ẹmade mme owo n̄ko ke edinam oro mmọ ẹnamde ewụhọ Christ ndikwọrọ “gospel” Obio Ubọn̄ Abasi ke ofụri ererimbot. (Matthew 24:14) Mmọ n̄ko ẹnam ẹnyụn̄ ẹtoro n̄kokon̄ ido uwem oro ẹkpepde ke Bible.—1 Corinth 6:9-11.

Ido ukpono akpanikọ ikpụho. Enye ada mme owo usụn̄ owụt n̄kukụre Owo oro ekemede ndikọk mme mfịna ubonowo. Ibịghike Owo oro eyeda ataata obufa ererimbot edi. Anie idi Owo oro? (Mbọk se ikpaedem.)

PARADISE ORO AFANIKỌN̄ MÎDỤHE EDI ATA IDEM N̄KPỌ

Edieke afo ekpekemede, nte afo ukpọkọkke kpukpru mfịna ẹmi ẹnọmọde ubonowo? Nte ededi afo ọkpọkọk! Nte nnyịn ikpekere ite ke ima ima Andibot nnyịn, emi ikpọn̄îkpọn̄ enyenede odudu ye ọniọn̄ ndikọk mme mfịna ubonowo, eyenam se isụhọde ikan oro?

Bible ayarade ete ke Abasi eyesịbe odụk mme mbubehe owo ebe ke ukara esie eke heaven ke ubọk Jesus Christ. Enye “eyenuak” mbiara ukara ke isọn̄ efep. (Daniel 2:44; Matthew 6:9, 10) Ndien ntak-a? Ke etịn̄de aban̄a Abasi, andiwet psalm ọbọrọ ete: “Ndien owo ẹyefiọk ẹte ke afo emi enyịn̄ fo ikpọn̄ ekerede Jehovah, edi Ata Edikon̄ ke ofụri ererimbot.”—Psalm 83:18.

Ke ini ererimbot emi osịmde utịt, nte mme andibọhọ ẹyedu? Bible ọdọhọ ete: “Ererimbot ke ebebe efep, ye mbumek esie; edi owo eke anamde se Abasi amade ododu ke nsinsi.” (1 John 2:17) M̀mọ̀n̄ ke mme andibọhọ ẹmi ẹdidụn̄ ke nsinsi? Bible ọbọrọ ete: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:9-11, 29; Mme N̄ke 2:21, 22.

Ke obufa ererimbot Abasi, “n̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba.” (Ediyarade 21:4) Ubiatibet, unana, biọn̄, udọn̄ọ, mfụhọ, m̀mê n̄kpa idụhe aba! Kamse, idem mme akpan̄kpa ẹyefiak ẹdu uwem! ‘Ediset ke n̄kpa’ eyedu. (Utom 24:15) Ndien ẹyenam isọn̄ ke idemesie akabade edi ataata paradise.—Isaiah 35:1, 2; Luke 23:43.

Nso ke ana nnyịn inam man idu uwem ke obufa ererimbot Abasi? Jesus ọkọdọhọ ete: “Ndien nsinsi uwem oro edi ndifiọk Fi, ata Abasi kierakiet, ye Enyeemi Afo ọkọdọn̄de, kpa Jesus Christ.” (John 17:3) Ediwak miliọn mbon esịt akpanikọ ke ofụri ererimbot ke ẹkpep ifiọk oro. Emi an̄wam mmọ ndiyọ ediwak ọkpọkpọ mfịna mmọ idahaemi, edi ke edide akpan n̄kpọ akan, enye ọnọ mmọ ọyọhọ mbuọtidem nte ke mme mfịna ẹmi ẹkande ukeme mmọ ndikọk ẹyenyene ọyọhọ ọyọhọ usọbọ ke obufa ererimbot Abasi.

[Ebiet Ẹdade Ndise Ẹto ke page 2]

Foto WHO emi P. Almasy okosiode

[Ebiet Ẹdade Ndise Ẹto ke page 3]

Jerden Bouman/Sipa Press