Mbụk Obio Ubọn̄ Nọ. 36

Obufa Tọsịn Isua—Nso ke Ini Iso Akama ọnọ Fi?

Obufa Tọsịn Isua—Ntọn̄ọ Obufa Emana?

KE UFỌT okoneyo December 31, 1999, ọyọhọ isua ikie 20 ama esịm utịt.a Enye ekedi isua ikie oro ekese ndutịme okodude. Edi mbufa ifiọk ubotn̄kpọ, n̄wọrọnda n̄kọri ke ibọkusọbọ, n̄kọri ke usuanetop, ye usọp usọp n̄kọri ke ndutịm uforo ofụri ererimbot ẹma ẹdu n̄ko. Ke ntre ediwak owo ẹdara obufa tọsịn isua emi nte idiọn̄ọ idotenyịn ye ukpụhọde. Nte ekeme ndidi enye ayada utịt ọsọk ekọn̄, ubuene, usabade n̄kann̄kụk, ye udọn̄ọ?

Ediwak owo ẹkere ntre. Edi didie ke ekeme ndidi nte ke obufa tọsịn isua ayada mme ukpụhọde edi oro ẹdinyenede ufọn inọ fi—mme ukpụhọde oro ẹdinamde uwem fo ye eke ubon fo enyene ifụre? Kere ban̄a adan̄a nte ibat ibat kpọt ke otu mme mfịna oro nnyịn isobode ẹkponde.

Usabaden̄kpọ

Mme idụt oro ẹnyenede ediwak itie usiakifia ke “ẹbiat n̄kann̄kụk ke udomo ofụri ererimbot ndien ke ẹnam usabade n̄kpọ atara asuana, ke ẹnyụn̄ ẹtịmede n̄kann̄kụk.” Edieke edu idahaemi akade iso, “ẹyedọdiọn̄ ẹtịmede n̄kann̄kụk.”—“Global Environment Outlook—2000,” Ndutịm N̄kann̄kụk eke Edidiana Mme Idụt.

Udọn̄ọ

“Etisịm isua 2020, ẹdori enyịn ndikụt nte mme udọn̄ọ oro mîkemeke ndibe owo ẹdide ntak n̄kpa owo itiaba ke otu owo duop oro ẹkpan̄ade ke mme ikpehe oro ẹtọn̄ọde-tọn̄ọ ntatenyịn, ke ẹmende ẹdomo ye se isụhọrede ikan mbahade iba mfịn.”—“The Global Burden of Disease,” Harvard University Press, 1996.

Ndusụk ntaifiọk ẹkere ẹte ke “etisịm 2010, owo miliọn 66 kpọt [ẹdidu uwem] ke idụt 23 oro ẹnyenede ata ndiọkn̄kan ntatara udọn̄ọ [AIDS].”—“Confronting AIDS: Evidence From the Developing World,” ntọt otode N̄ka Europe ye Itie Unịm Okụk Ofụri Ererimbot.

Unana

“Se ikperede ndisịm owo biliọn 1.3 ẹda se isụhọrede ikan dollar kiet ẹdu uwem, ndien se ikperede ndisịm biliọn owo kiet ikemeke ndinyene akpan udia oro mmọ ẹyomde.”—“Human Development Report 1999,” Ndutịm N̄kọri eke Edidiana Mme Idụt.

Ekọn̄

“Afai ke [nsio nsio idụt] ekeme ndisịm anana-mbiet udomo. Sia [ubahade] eke ekpụk, orụk, ye eke ido ukpono edemerede, . . . utọ afai oro ayada . . . ata ọsọ orụk en̄wan edi ke isua 25 efen oro edide . . . , owotde ediwak tọsịn owo ke mme itie ikie ke isua kiet kiet.”—“New World Coming: American Security in the 21st Century,” N̄ka United States Kaban̄a Ukpeme Idụt/Ọyọhọ Isua Ikie 21.

Ke ntre, ukpọk ukịbe ye nduaidem ke ntak obufa tọsịn isua ofụk akpanikọ oro nte ke usabaden̄kpọ, udọn̄ọ, unana, ye ekọn̄ ẹkponi ẹkan nte akanam edide. Idiọkitọn̄, eyịghe, ye ibụk ẹdi ntak mme mfịna ẹmi—mme edu oro ndụn̄ọde ifiọk ntaifiọk, ifiọk ubotn̄kpọ, m̀mê mbre ukara mîkam ikemeke ndisio mfep.

Tọsịn Isua Emi Edidade Edidiọn̄ Ọsọk Ubonowo

Ewetn̄wed eset kiet ama ọdọhọ inikiet ete: “Usụn̄ owo idụhe owo ke ubọk: owo eke asan̄ade inyụn̄ ikemeke ndinen̄ede ikpat esiemmọ.” (Jeremiah 10:23) Owo inanake ukeme kpọt edi anana unen n̄ko ndikara isọn̄. Jehovah Abasi, Andinam nnyịn, ikpọn̄îkpọn̄ enyene unen ye ifiọk ndikọk mme mfịna ubonowo.—Rome 11:33-36; Ediyarade 4:10b.

Edi ini ewe? Didie? Uyarade owụtde nte ke nnyịn imekpere utịt “ukperedem ini” ẹdi barasuene. Mbọk, kụbọde Bible fo, nyụn̄ kot 2 Timothy 3:1-5. Enye etịn̄ in̄wan̄în̄wan̄ aban̄a mme edu oro mme owo ẹdinyenede ke “ndiọk eyo” emi. Matthew 24:3-14 ye Luke 21:10, 11 ẹtịn̄ n̄ko ẹban̄a “ukperedem ini” emi. Do ẹwụk ntịn̄enyịn ke mme n̄kpọntịbe oro ẹkemede ndikụt ke enyịn, utọ nte ekọn̄ ofụri ererimbot, idiọk udọn̄ọ, ye ntatara akan̄, oro ẹdade itie toto ke 1914.

Ibịghike “ukperedem ini” emi eyesịm utịt. Daniel 2:44 ọdọhọ ete: “Abasi enyọn̄ ayanam ubọn̄ eke mîdisoboke ke nsinsi, adaha ada: . . . enye ayanuak onyụn̄ ama kpukpru mme idụt [ererimbot] ẹmi, ndien enye ayada ke nsinsi.” Ntem, ẹma ẹbem iso ẹtịn̄ ẹte ke Abasi oyowụk Obio Ubọn̄, m̀mê ukara, man akara isọn̄. Nte ekemde ye Ediyarade 20:2, ukara emi ayakara ke tọsịn isua! Kere ban̄a ndusụk ke otu usụn̄ oro idaha udu uwem ofụri ubonowo edifọnde ke ubọn̄ ubọn̄ Tọsịn Isua emi:

Ndutịm Uforo. “Mmọ ẹyebọp ufọk ẹnyụn̄ ẹdụn̄ ke esịt: ẹyenyụn̄ ẹtọ in̄wan̄-vine, ẹnyụn̄ ẹdia mfri mmọ. Mmọ idibọpke, ndien owo en̄wen odụn̄; iditọhọ, ndien owo efen adia.”—Isaiah 65:21, 22.

Nsọn̄idem. “Ndien enyịn ẹyen̄wan̄a mme nnan, utọn̄ ẹyenyụn̄ ẹsịrede mbon inan. Ndien mbụn̄ọ eyenek nte edop, edeme imụm oyonyụn̄ ọkwọ.” “Ndien Andidụn̄ ididọhọke ite, ndọdọn̄ọ.”—Isaiah 33:24; 35:5, 6.

N̄kann̄kụk. Abasi ‘oyosobo mmọ ẹmi ẹsobode isọn̄.’—Ediyarade 11:18.

Mme Itie Ebuana Owo. “Mmọ idinamke idiọk, idinyụn̄ ibiatke n̄kpọ ke ofụri edisana obot mi: koro ifiọk Jehovah ọyọyọhọ ke ererimbot.”—Isaiah 11:9.

Ediwak miliọn owo ẹbuọt idem ke mme un̄wọn̄ọ Bible ẹmi ndien ke ntem ẹnyene ata eti idotenyịn ẹban̄a ini iso. Nte utịp, mmọ ẹkeme ndiyọ mme mfịghe ye mme mfịna uwem. Didie ke Bible ekeme ndidi odudu oro adade fi usụn̄ ke uwem?

Ifiọk Oro Adade Esịm Uwem!

Ndusụk ini, ifiọk ntaifiọk ye ifiọk ubotn̄kpọ ẹkeme ndinyene uten̄e! Kpa ye oro, ifiọk owo inamke ata ediwak owo ẹnyene ifụre ẹnyụn̄ ẹkop inem uwem. Ẹtịn̄ ẹban̄a n̄kukụre ifiọk oro ekemede ndinam emi ke Bible ke John 17:3, emi ọdọhọde ete: “Ndien nsinsi uwem oro edi ndifiọk Fi, ata Abasi kierakiet, ye Enye emi Afo ọkọdọn̄de, kpa Jesus Christ.”

Ẹkụt utọ ifiọk oro ke Bible. Okposụkedi ediwak owo ẹnyenede n̄kpọsọn̄ ekikere ẹban̄a edisana n̄wed oro, ibat ibat owo kpọt akanam ẹdụn̄ọde enye. Nso kaban̄a fi? Edi akpanikọ, ndikot Bible oyom ọkpọsọn̄ ukeme. Edi enye odot ye ukeme oro ẹsịnde. Bible edi n̄kukụre n̄wed “eke ẹdade odudu Spirit Abasi ẹwet, ẹnyụn̄ ẹdi se ifọnde ndida n̄kpep owo n̄kpọ, nnyụn̄ nsua nnọ owo, nnyụn̄ nnam owo ẹsan̄a nte enende, nnyụn̄ nteme owo edinen ido.”—2 Timothy 3:16.

Didie, ndien, ke afo ekeme nditọn̄ọ mmehe ye Bible? Ntak mûnyịmeke un̄wam Mme Ntiense Jehovah? Mmọ ẹsinọ ediwak miliọn owo ukpep ke mme ufọk mmọ ke mfọn. Man ẹn̄wam fi ke afan̄ emi, mmọ ẹsikama nsio nsio n̄wed ẹkọn̄ọde ke Bible, utọ nte ediye uduot ekpri n̄wed oro Nso ke Abasi Oyom Oto Nnyịn? Enye ọnọ mbio mbio ibọrọ ke ediwak mbụme ẹmi afo ekemede ndinyene mban̄a Bible, utọ nte: Anie edi Abasi? Nso idi uduak Abasi kaban̄a isọn̄? Nso idi Obio Ubọn̄ Abasi? Didie ke Bible ekeme ndifori uwem ubon fo?

Edieke afo edimade kiet ke otu Mme Ntiense Jehovah awaha ufọk fo, mbọk wet n̄kpọ yọhọ ekebe eke idakisọn̄ emi. Mmọ ẹyedat esịt ndinọ fi ntọt efen efen mban̄a ubọn̄ ubọn̄ Ukara Obio Ubọn̄ Abasi eke Tọsịn Isua!

□ N̄kpama ndibọ ediye uduot ekpri n̄wed oro Nso ke Abasi Oyom Oto Nnyịn?

□ Mbọk ẹsobo ye ami kaban̄a ukpepn̄kpọ Bible mfọn

[Ikọ Idakisọn̄]