Edida Bible Nnọ Ibọrọ

KE INI ẹbụpde mbụme ẹban̄a mme edinịm ke akpanikọ nnyịn, usụn̄ uwem nnyịn, ekikere nnyịn kaban̄a mme n̄kpọntịbe ndondo emi, ye idotenyịn nnyịn kaban̄a ini iso, nnyịn imesidomo ndida Bible nnọ ibọrọ. Ntak-a? Sia enye edide Ikọ Abasi. Nnyịn ida mme edinịm ke akpanikọ nnyịn ito Bible. Usụn̄ uwem nnyịn ọkọn̄ọ ke Bible. Enye akara ekikere nnyịn kaban̄a mme n̄kpọntịbe ererimbot. Idotenyịn nnyịn kaban̄a ini iso etịm enyene nsọn̄ọ ke mme un̄wọn̄ọ Bible eke odudu spirit.—2 Tim. 3:16, 17.

Nnyịn imetịm ifiọk mbiomo oro asan̄ade ye enyịn̄ nnyịn. Nnyịn idi Mme Ntiense Jehovah. (Isa. 43:12) Ntre nnyịn ibọrọke mme mbụme itiene ukpepn̄kpọ akwaifiọk owo, edi ibọrọ itiene se Jehovah etịn̄de ke Ikọ esie eke odudu spirit. Edi akpanikọ, nte owo kiet kiet, nnyịn imenyene mme ekikere iban̄a mme n̄kpọ, edi nnyịn iyak Ikọ Abasi akara mme ekikere nnyịn sia itịmde inịm nte ke enye edi akpanikọ. Nte ededi, Bible ọnọ nnyịn ifụre ndinam ọkpọkpọ ubiere ke ediwak n̄kpọ. Utu ke ndinyịk mbon efen ẹma se imade, nnyịn iyom ndikpep mme edumbet oro ẹwụtde ke N̄wed Abasi, ntem iyakde mme andikpan̄ utọn̄ nnọ nnyịn ẹnyene ukem ifụre edimek oro nnyịn inyenede. Ukem nte apostle Paul, nnyịn iyom ndinam mme owo “ẹsụk ibuot ke mbuọtidem.”—Rome 16:26.

Ẹkot Jesus Christ “ata ntiense akpanikọ” ke Ediyarade 3:14. Didie ke enye ọkọbọrọ mme mbụme onyụn̄ anam n̄kpọ aban̄a mme idaha oro enye okosobode? Ndusụk ini ke ndida mme uwụtn̄kpọ oro ẹdinamde mme owo ẹkere n̄kpọ. Ke mme ini efen, ke ndibụp owo oro obụpde mbụme nte N̄wed Abasi an̄wan̄ade enye. Ediwak ini ke ndikot nto N̄wed Abasi, afiakde etịn̄ mmọ ke ikọ en̄wen, m̀mê nditịn̄ mban̄a mmọ. (Matt. 4:3-10; 12:1-8; Luke 10:25-28; 17:32) Ke akpa isua ikie, ẹkesinịm mme ikpan̄wed Abasi ke mme synagogue. Uyarade idụhe nte ke Jesus ama enyene mme ikpan̄wed oro ke idemesie, edi enye ama etịm ọdiọn̄ọ N̄wed Abasi onyụn̄ etịn̄ aban̄a mmọ ediwak ini ke ini ekekpepde mbon en̄wen n̄kpọ. (Luke 24:27, 44-47) Enye ama ekeme nditịn̄ ke akpanikọ ete ke se imọ ikekpepde ikotoho imọ. Enye eketịn̄ se enye okokopde oto Ete esie.—John 8:26.

Udọn̄ nnyịn edi nditiene uwụtn̄kpọ Jesus. Nnyịn ikopke Abasi etịn̄de ikọ nte Jesus okokopde. Edi Bible edi Ikọ Abasi. Ke ini nnyịn idade enye nte nsọn̄ọ ke mme ibọrọ nnyịn, nnyịn iyefep ndidụri ntịn̄enyịn nnọ idem nnyịn. Nnyịn iwụt ite ke utu ke nditịn̄ ekikere anana-mfọnmma owo, nnyịn imetịm ibiere ndiyak Abasi etịn̄ se idide akpanikọ.—John 7:18; Rome 3:4.

Nte ededi, udọn̄ nnyịn idịghe sụk ndida Bible nnam n̄kpọ edi ndinam ntre ke usụn̄ oro editịmde enyene ufọn ọnọ andikpan̄ utọn̄ nnọ nnyịn. Nnyịn iyom enye ada in̄wan̄-in̄wan̄ esịt akpan̄ utọn̄. Etienede edu owo oro, afo emekeme ndimen mme ekikere Bible ndisịn ebe ke ndidọhọ: “Nte afo unyịmeke nte ke se Abasi etịn̄de enen̄ede edi akpan n̄kpọ?” Mîdịghe afo emekeme ndidọhọ: “Nte afo ama ọfiọk ke Bible eneme ukem mbụme emi?” Edieke afo etịn̄de ikọ ye owo oro mînyeneke ukpono inọ Bible, afo emekeme ndida ntọn̄ọikọ oro okpụhọrede esisịt. Afo emekeme ndidọhọ: “Yak mbuana ntịn̄nnịm ikọ eke eset emi ye afo.” Mîdịghe afo emekeme ndidọhọ: “N̄wed oro ẹsuande atara akan ke mbụk owo ọdọhọ ete . . . ”

Ke ndusụk idaha, afo emekeme ndikam mmek ndifiak ntịn̄ itien̄wed ke ikọ en̄wen. Nte ededi, ke ebiet ekemede, mfọnn̄kan n̄kpọ edi ndikụbọde Bible n̄kot se enye etịn̄de. Wụt owo oro itien̄wed oro ke Bible esie ke ini ekededi emi ekemede ndinam oro. Edida Bible nnam n̄kpọ ntem ke nnennen usụn̄ esiwak ndinyene ọkpọsọn̄ odudu ke idem mme owo.—Heb. 4:12.

Mbiowo Christian ẹnyene akpan mbiomo ndida Bible nnam n̄kpọ ke ini ẹbọrọde mme mbụme. Kiet ke otu n̄kpọ oro anamde owo odot nte ebiowo edi eyenete oro ‘ndisọn̄ọ mmụm ikọ akpanikọ n̄kama ke usọ unọ ukpep esie.’ (Titus 1:9, NW) Andibuana ke esop ekeme ndinam akpan ubiere ke uwem ke ebiowo ama ọkọnọ enye item. Ekpedi akpan n̄kpọ didie item emi ndinen̄ede n̄kọn̄ọ ke N̄wed Abasi! Uwụtn̄kpọ oro ebiowo enịmde ke ndinam emi ekeme nditụk usụn̄ oro ediwak mbon en̄wen ẹnọde ukpep.