Edisịn Udọn̄ Nnọ Edikama Bible

UDỌN̄ nnyịn edi ndidụri ntịn̄enyịn kpukpru owo nnọ Ikọ Abasi, kpa Bible. Etop oro nnyịn ikwọrọde ọkọn̄ọ ke edisana n̄wed emi, ndien nnyịn iyom mme owo ẹdiọn̄ọ ẹte ke se nnyịn itịn̄de itoho nnyịn, edi oto Abasi. Oyom mme owo ẹbuọt idem ke Bible.

Ke an̄wautom. Ke ini etịmde idem ndiwọrọ an̄wautom, mek itie N̄wed Abasi kiet m̀mê iba ndibuana ye mme owo oro ẹdimade ndikpan̄ utọn̄. Idem ọkpọkọm odiomi ndida ibio ibio nneme nnọ n̄wed Bible, esifọn ndikot itie Bible oro odotde. Bible enyene n̄kponn̄kan odudu ndinọ mbon mbieterọn̄ ndausụn̄ akan se ededi oro nnyịn ikpetịn̄de ke idem nnyịn. Ke ebiet oro mûkemeke ndikot Bible, afo emekeme ndimek nditetịn̄ se isịnede ke enye. Ke akpa isua ikie, mme ikpan̄wed Abasi iketịmke iwak. Kpa ye oro, Jesus ye mme apostle esie ẹma ẹsitịn̄ se isịnede ke N̄wed Abasi ediwak ini. Nnyịn n̄ko ikpenyene ndisịn ukeme ndimụm mme itie N̄wed Abasi ndọn̄ ke ibuot nnyụn̄ nda mmọ nnam n̄kpọ nte odotde ke utom ukwọrọikọ nnyịn, ndusụk ini itịn̄de-tịn̄ se isịnede ke mmọ.

Ke ini afo ekemede ndikot Bible, kama enye ke usụn̄ oro enyeneufọk ekemede nditiene nse nte afo okotde. Edieke enyeneufọk etienede ese ke Bible esie, enye akam ekeme ndinam n̄kpọ enen̄ede ọfọn mban̄a se enye okotde.

Nte ededi, afo enyene ndifiọk nte ke ndusụk mme akabade Bible ẹmeyụt Ikọ Abasi. Mme edikabade mmọ ẹkeme nditre ndidu ke n̄kemuyo ke kpukpru idaha ye se ikodude ke mme akpasarade usem Bible. Ediwak edikabade Bible eyomfịn ẹsio ọkpọkpọ enyịn̄ Abasi ẹfep, ẹdịp se usem akpasarade uwetn̄kpọ etịn̄de aban̄a idaha mme akpan̄kpa, ẹnyụn̄ ẹdịp se Bible etịn̄de aban̄a uduak Abasi kaban̄a isọn̄. Man ekeme ndiwụt owo mme ukpụhọde emi, afo emekeme ndida mme akpan itien̄wed ẹtode nsio nsio Bible ndomo m̀mê ndida n̄kani edikabade kpa ke ukem usem oro. Reasoning From the Scriptures ọnọ uwụtn̄kpọ ke ediwak ibuot nneme ke mme usụn̄ oro nsio nsio edikabade Bible ẹsịnde mme ọkpọikọ ke mme ufan̄ikọ oro ẹsikotde ndien ndien. Owo ekededi oro amade akpanikọ oyowụt esịtekọm aban̄a ifiọk akpanikọ emi.

Ke Mme Mbono Esop. Ekpenyene ndisịn udọn̄ nnọ kpukpru owo ndida Bible mmọ nnam n̄kpọ ke mme mbono esop. Emi enyene ufọn ke ata ediwak usụn̄. Enye an̄wam otuowo ndikpan̄ utọn̄ ke se enemede. Enye anam ẹkụt se etịn̄de ke adianade ye item oro etịn̄ikọ ọnọde. Ndien enye anam mbufa mbon oro ẹnyenede udọn̄ ẹnen̄ede ẹnịm nte ke Bible edi ebiet emi mme edinịm ke akpanikọ nnyịn ẹnen̄erede ẹto.

Otuowo ndinen̄ede ntiene nse nte afo okotde itie N̄wed Abasi ke Bible mmọ edinen̄ede ọkọn̄ọ ke nsịnudọn̄ oro afo ọnọde. Ndidọhọ mmọ nnennen nnennen ẹkụbọde Bible mmọ edi mfọnn̄kan usụn̄.

Edi utom fo, nte etịn̄ikọ, ndibiere itien̄wed oro afo oyomde ndidori nsọn̄uyo ebe ke ndinam otuowo ẹkụbọde ẹka do. Ọfọn ndikot mme itien̄wed oro ẹdin̄wamde fi nditat mme akpan n̄kpọ. Ekem, nte ini ayakde, dian ibat ibat efen oro ẹsọn̄ọde se afo etịn̄de.

Nte ededi, ikpîkpu edisiak itien̄wed m̀mê ndidọhọ otuowo ẹkụbọde itien̄wed isikemke. Edieke afo okotde itien̄wed kiet ndien ekem ebe aka efen idem mbemiso otuowo fo ẹkemede ndikụt akpa itie oro, mmọ ẹyesọp ẹkpa mba ẹnyụn̄ ẹtre ndidomo nditiene n̄kụbọde Bible. Nọ ntịn̄enyịn ke se ikade iso. Kot ke ini n̄wakn̄kan owo ẹkụtde itien̄wed oro.

Bem iso kere. Siak itien̄wed oro oyomde ndikot ke anyan ini mbemiso okotde. Emi oyosụhọde ubiat ini oro ekemede ndito edibet otuowo ẹkụt itien̄wed oro. Ke adan̄aemi se edinemede mîdiwakke edieke afo ọnọde otuowo ini ndikụbọde mme itie N̄wed Abasi, mme ufọn emi ẹdinyenede ayanam oro odot.