Didie ke Ẹsiwet Ẹnyụn̄ Ẹkabade Mme N̄wed Nnyịn?

Man inam kpukpru se ikemede ke nditan̄a “eti mbụk” nnọ “kpukpru mme idụt ye esien ye usem ye obio,” imosio n̄wed ke se iwakde ibe usem 750. (Ediyarade 14:6) Didie ke isinam ọkpọsọn̄ utom emi? Mme ewetn̄wed ke nsio nsio idụt ye mme akabade n̄wed ẹsin̄wam—kpukpru mmọ ẹdi Mme Ntiense Jehovah.

Ẹsibem iso ẹwet n̄wed nnyịn ke Ikọmbakara. Otu Emi Ẹsede Ẹban̄a Utom Mme Ntiense Jehovah ẹse enyịn ke utom oro ẹnamde ke Itieutom Uwetn̄wed ke ibuot itieutom ofụri ererimbot. Itieutom emi esitịm se mme ewetn̄wed ke ibuot itieutom ofụri ererimbot ye ke ndusụk n̄kọk itieutom ẹwetde. Ndinyene mme ewetn̄wed ke nsio nsio idụt ntem anam nnyịn ikeme ndiwet n̄kpọ mban̄a nsio nsio ibuotikọ emi anamde mme owo ke nsio nsio idụt ẹma n̄wed nnyịn.

Ẹsinọ se ẹkewetde ẹsọk mme akabade n̄wed. Ke ẹma ẹkedụn̄ọde se ẹkewetde ẹnyụn̄ ẹnọ unyịme, ẹsinọ enye ke Intanet ẹsọk mme akabade n̄wed ke ofụri ererimbot; mmọ ẹyekabade, ẹse m̀mê asan̄a ukem ye Ikọmbakara, ekem ẹkot ẹse m̀mê ndudue odu. Mmọ ẹsidomo ndiyom “nnennen ikọ akpanikọ” ke usem mmọ, emi ẹdiwọrọde ukem ukem se idude ke Ikọmbakara.—Ecclesiastes 12:10.

Kọmputa ẹsinam utom emi ọsọp. Kọmputa ikemeke ndinam kpukpru se mme ewetn̄wed ye mme akabade n̄wed ẹnamde. Edi mme n̄wed ukabadeikọ, mme n̄kpọ ẹban̄ade usem, ye mme n̄kpọ oro ẹdade ẹnam ndụn̄ọde, oro ẹdọn̄de ke kọmputa ẹkeme ndinam utom mmọ ọsọp. Mme Ntiense Jehovah ẹsio Ndutịm Kọmputa Oro Ẹsidade Ẹsio N̄wed ke Ediwak Usem (MEPS) ẹdi, emi ekemede ndinam ẹwet ikọ ke ata ediwak usem, ẹdọn̄ mme ndise, ẹnyụn̄ ẹtịm man ẹkeme ndimịn̄.

Ntak emi isịnde ofụri ukeme emi, idem ke mme usem oro tọsịn owo ifan̄ kpọt ẹsemde? Koro Jehovah aduak ete “kpukpru orụk owo ẹnyene edinyan̄a ẹnyụn̄ ẹsịm nnennen ifiọk akpanikọ.”—1 Timothy 2:3, 4.

• Didie ke ẹsiwet mme n̄wed nnyịn?

• Ntak emi isikabarede n̄wed nnyịn isịn ke ata ediwak usem?