IKPEHE 3
Nte Ẹkpebierede Mfịna
“Ẹnyene ufiop ufiop ima ẹnọ kiet eken, koro ima ofụkde ekese idiọkn̄kpọ.” —1 Peter 4:8
Mbon emi ẹdọde ndọ obufa ẹsinyene nsio nsio mfịna. Se isinamde emi etịbe edi ke irenowo ye iban ẹsikere n̄kpọ isio isio ẹnyụn̄ ẹma n̄kpọ isio isio. Ndusụk ini, mfịna ekeme ndito ebiet en̄wen m̀mê mme n̄kpọ oro mbufo mîkodorike enyịn.
Nnyịn imekeme ndinam nte ke inyeneke se itịbede, edi Bible ọdọhọ isibiere mfịna nnyịn. (Matthew 5:23, 24) Mfọnn̄kan usụn̄ ndibiere mfịna mbufo edi ndinam se Bible ọdọhọde.
1 ẸNEME MFỊNA MBUFO
BIBLE ỌDỌHỌ ETE: “Ẹmenịm . . . ini eke ẹtịn̄de ikọ.” (Ecclesiastes 3:1, 7) Ẹkụt ẹte ke ẹmeda ini ẹneme mfịna mbufo. Ẹtịn̄ ofụri se isịnede mbufo ke esịt ye nte etiede mbufo ke idem. Bible ọdọhọ ‘isitịn̄ akpanikọ’ inọ kiet eken. (Ephesus 4:25) Idem ke ini esịt enen̄erede ayat mbufo, ẹkûtọtọhọ. Sụn̄sụn̄ ibọrọ idiyakke nneme mbufo akabade utọk.—Mme N̄ke 15:4; 26:20.
Idem ke ini mbufo ẹnyenede nsio nsio ekikere, ẹtịn̄ ikọ ukpono ukpono; ẹkûfre ndifọn ido nnyụn̄ n̄wụt ke ẹmema kiet eken. (Colossae 4:6) Ẹdomo ndibiere mfịna usọp usọp nte ẹkekeme, ẹkûnyụn̄ ẹdop kiet eken uyo.—Ephesus 4:26.
SE AKPANAMDE:
Ẹmek ini oro odotde ẹneme mfịna mbufo
Ke ini n̄wan m̀mê ebe fo etịn̄de ikọ, kûbọ enye ikọ ke inua. Bet tutu ekem ini emi editịn̄de okwo
2 ẸNEN̄EDE ẸKPAN̄ UTỌN̄
BIBLE ỌDỌHỌ ETE: “Ẹnyene esịt ima ẹnọ kiet eken. Ẹda iso ke ndinọ kiet eken ukpono.” (Rome 12:10) Ẹnen̄ede ẹkpan̄ utọn̄ ẹnọ kiet eken. Domo ndise n̄kpọ nte n̄wan m̀mê ebe fo esede. Bible ọdọhọ ‘ikere iban̄a kiet eken’ inyụn̄ ‘isụhọde idem.’ (1 Peter 3:8; James 1:19) Kûnam nte amakpan̄ utọn̄ ke ini edide ukpan̄ke. Edieke ekemede, kpọn̄ se anamde nịm nen̄ede kpan̄ utọn̄ nọ n̄wan m̀mê ebe fo, mîdịghe bụp enye m̀mê imekeme ndineme n̄kpọ oro ini en̄wen. Edieke adade n̄wan m̀mê ebe fo nte ata ufan fo, mbufo idisọpke iyat esịt.—Ecclesiastes 7:9.
SE AKPANAMDE:
Ka iso nen̄ede kpan̄ utọn̄, idem edieke mûmaha se okopde
Domo ndifiọk se n̄wan m̀mê ebe fo an̄wanade nditịn̄. Nte enye enịmde uyo etịn̄ ikọ onyụn̄ anamde n̄kpọ edinam ọfiọk
3 ẸNAM SE ẸKEBIEREDE
BIBLE ỌDỌHỌ ETE: “Kpukpru orụk utom ẹnyene ufọn, edi ikọ n̄kpọkinua osụn̄ọ ke unana.” (Mme N̄ke 14:23) Nditetie ntịn̄ se mbufo ẹdinamde ikemke, edi ẹkam ẹnanam se ẹketịn̄de. Ekeme ndiyom mbufo ẹnen̄ede ẹsịn idem ẹnam emi, edi mbufo ẹdidia ufọn ke akpatre. (Mme N̄ke 10:4) Edieke ẹdianade kiet ẹbiere mfịna mbufo, ‘ẹyenyene eti utịp ke ọkpọsọn̄ utom mbufo.’—Ecclesiastes 4:9.
SE AKPANAMDE:
Ẹneme se owo kiet kiet edinamde man ẹbiere mfịna mbufo
Ke ini ke ini, ẹfiak ẹse ebiet emi ẹnamde ọfọn