Abasi Okobot Enyọn̄ ye Isọn̄

Jehovah Abasi okobot nnyịn. Enye okobot kpukpru n̄kpọ. Idịghe kpukpru se enye okobotde ke ikeme ndikụt. Enye ama obot ata ediwak angel mbemiso obotde mme n̄kpọ emi nnyịn ikemede ndikụt. Mmanie ẹdi mme angel? Mmọ ẹdi mme asan̄autom Jehovah. Nnyịn ikemeke ndikụt mmọ ukem nte nnyịn mîkemeke ndikụt Jehovah. Akpa angel emi Jehovah okobotde ama an̄wam enye ke ini enye okobotde mme ntantaọfiọn̄, mme ekondo, ye kpukpru n̄kpọ eken. Ediye isọn̄ emi idụn̄de mi esịne ke otu mme ekondo oro.

Ekem Jehovah ama anam isọn̄ edi se unam ye mme owo ẹdụn̄de. Enye ama anam utịn ayama ke isọn̄, obot ikpọ ye n̄kpri obot, onyụn̄ anam inyan̄ odu.

Nso efen ke enye akanam? Jehovah ama ọdọhọ ete: ‘Mmọn̄ nnam mbiet ye n̄kpri ye ikpọ eto ẹtịbe.’ Ediwak nsio nsio mfri, ikọn̄, ye mme flawa ẹma ẹtọn̄ọ nditịbe ke isọn̄. Ekem Jehovah ama obot nsio nsio unam, obot mme n̄kpọ emi ẹsifede-fe, mme n̄kpọ emi ẹdụn̄de ke mmọn̄, ye mme n̄kpọ emi ẹsinyọnide-nyọni. Enye ama obot n̄kpri unam utọ nte oyot, ye ikpọ unam utọ nte enen. Ewe unam ke ama akan?

Ekem Jehovah ama ọdọhọ akpa angel oro ete: ‘Yak inam owo.’ Mme owo ẹkpụhọde ye mme unam. Mme owo ẹkeme nditịn̄ ikọ, ndisak imam, ndibọn̄ akam, nnyụn̄ mbot nsio nsio n̄kpọ. Akana mme owo ẹse ẹban̄a isọn̄ ye mme unam. Ọmọdiọn̄ọ akpa owo emi Jehovah okobotde? Yak ise.