Abasi Okobot Akpa Eren ye N̄wan

Jehovah ama osio itie kiet ke isọn̄ emi anam enen̄ede eye. Ẹkekot itie oro In̄wan̄ Eden. Eto, unam, ye flawa ẹkeyọyọhọ in̄wan̄ oro. Ekem Abasi ama ada ntan obot akpa owo emi ẹkekotde Adam, onyụn̄ ọduọk ibifịk esịn enye ke ibuo. Ndi ọmọdiọn̄ọ se iketịbede? Adam ama akabade odu-uwem owo. Jehovah ama ọnọ Adam utom. Enye ọkọdọhọ Adam ese aban̄a in̄wan̄ oro onyụn̄ osio kpukpru unam enyịn̄.

Jehovah ama ọnọ Adam ata akpan ibet ete: ‘Emekeme ndidia kpukpru mfri, edi kûdia mfri eto emi adade ke ufọt in̄wan̄ emi. Edieke adiade, ayakpa.’

Ekem Jehovah ama ọdọhọ ete: ‘Mmọn̄ mbot owo emi edin̄wamde Adam nnọ enye.’ Abasi ama anam Adam ede ata ọkpọsọn̄ idap, onyụn̄ osio ọkpọn̄kan̄ Adam kiet ada obot n̄wan ọnọ enye. N̄wan oro ekekere Eve. Adam ye Eve ẹkedi akpa ebe ye n̄wan. Eketie Adam didie ke idem ndinyene n̄wan? Ama enem Adam tutu enye ọdọhọ ete: ‘Kam se se Jehovah adade ọkpọn̄kan̄ mi anam! Oh, mmenyene owo ndien!’

Jehovah ama ọdọhọ Adam ye Eve ẹnyene nditọ ẹnyụn̄ ẹtọt ẹyọhọ ofụri isọn̄. Enye okoyom mmọ ẹdiana kiet ẹnam ofụri isọn̄ edi Paradise nte In̄wan̄ Eden. Edi oro iketịbeke. Ntak-a? Iyokụt ntak ke Ibuot 3.