Ẹwet N̄kpọ ke Ibibene

Nte ini akade, Belshazzar ama edi edidem Babylon. Okoneyo usen kiet, enye ama esịn usọrọ, okot tọsịn ikpọ owo ukara esie, onyụn̄ ọdọhọ mme asan̄autom esie ẹsion̄o cup gold emi Nebuchadnezzar ete esie akatan̄de ke temple Jehovah ẹdi. Enye ye isenowo esie ẹma ẹkama cup oro ẹn̄wọn̄ wine ẹnyụn̄ ẹtoro mme abasi mmọ. Ete ise, ubọk owo ọwọrọ onyụn̄ ọtọn̄ọ ndiwet n̄kpọ emi mîn̄wan̄ake owo ke ibibene ufọk emi mmọ ẹkedọn̄ọde.

Idem ama enyek Belshazzar. Enye ama okot mbiaibọk esie onyụn̄ ọn̄wọn̄ọ ọnọ mmọ ete: ‘Nyanam owo ekededi emi editịn̄de se ikọ emi ọwọrọde akara nte ọyọhọ owo ita ke Babylon.’ Mmọ ẹma ẹtịme, edi owo mmọ ndomokiet ikekemeke. Ọbọn̄ an̄wan ama odụk edidọhọ enye ete: ‘Ete kiet emi ekerede Daniel ama esikabade ndap ọnọ Nebuchadnezzar. Enye ekeme nditịn̄ se ikọ emi ọwọrọde.’

Ẹma ẹda Daniel edi iso Belshazzar. Enye ama ọdọhọ Daniel ete: ‘Edieke ekemede ndikot ikọ emi nnyụn̄ ntịn̄ se enye ọwọrọde, nyọnọ fi n̄kpọitọn̄ gold, nnyụn̄ nnam fi akara nte ọyọhọ owo ita ke Babylon.’ Daniel ama ọdọhọ ete: ‘Mmọn̄ ntịn̄ se enye ọwọrọde, edi nyomke enọ fo. Nebuchadnezzar ete fo ama atan̄ idem etieti, edi Jehovah ama ekpep enye nsụhọdeidem. Afo ọmọdiọn̄ọ se iketịbede inọ enye, edi afo ọsọn̄ọ Jehovah enyịn, ekemen cup gold emi ẹketan̄de ke temple Esie akama ọn̄wọn̄ wine. Oro anam Abasi ewet ikọ emi: Mene, Mene, Tekel, ye Parsin. Emi ọwọrọ ke mbon Media ye Persia ẹyekan Babylon, afo ududịghe aba edidem.’

Eketie nte owo idikemeke ndikan Babylon sia ẹma ẹbọp ikpọ ibibene ẹkanade enye, enye okonyụn̄ odu ke ufọt akamba akpa emi otụn̄ọde etieti. Edi mbon Media ye Persia ẹma ẹda ekọn̄ ẹdụk Babylon okoneyo oro. Edidem Cyrus emi ekedide owo Persia ama asiak isọn̄ ọwọn̄ọde mmọn̄ akpa oro esịn ke usụn̄ en̄wen man mbonekọn̄ esie ẹkeme ndisan̄a n̄kesịm inuaotop Babylon. Usụn̄ inuaotop oro akana in̄wan̄ ini mmọ ẹsịmde do! Mmọ ẹma ẹbụmede ẹdụk, ẹkan obio oro, ẹnyụn̄ ẹwot Belshazzar. Cyrus ama akabade edi edidem Babylon.

Ke ufan̄ isua kiet, Cyrus ama ọdọhọ ete: ‘Jehovah ọdọhọ mi mfiak mbọp temple Esie ke Jerusalem. Owo ekededi ke otu ikọt esie emi oyomde nditiene mbọp temple oro ekeme ndika.’ Ediwak mme Jew ẹma ẹfiak ẹnyọn̄ọ Jerusalem ke isua 70 ama ekebe, kpa nte Jehovah ọkọdọhọde. Cyrus ama ọnọ mmọ cup gold ye silver emi Nebuchadnezzar akatan̄de ke temple Jehovah, ete ẹda ẹnyọn̄ Jerusalem. Ndi omokụt nte Jehovah akadade Cyrus an̄wam ikọt Esie?