Ndifiọk S’idude ke Mbụk
Akani Ido?
Nte ekemde ye oku Anglican kiet ke Adelaide, Australia, edikpan ufiọn̄ọ ndido ikpọkidem oro ekemede ndida owo n̄kosịm edinam use ye edisịn efịbe edi akani ido onyụn̄ oto ido oro mîdịghe eke mme Christian. Ke ndụn̄ọde aban̄ade idan̄ oro enye anamde ndondo emi, enye ọdọhọ ke owo iba oro ẹdụkde ediomi ndọ nte odotde inamke idiọkn̄kpọ edieke mmọ ẹkenyenede ebuana idan̄ mbemiso ndọ. Ndụn̄ọde oro n̄ko ọsọn̄ọ etịn̄ ete ke ekeme ndinyịme idan̄ ukem uduot ke ndusụk idaha. Nte ekemde ye Courier Mail eke Brisbane, etịn̄ikọ ke ibuot Uniting Church ke Australia “ama onyịme ye mme akpan ekikere ntọt emi.”
Nte ededi, Bible ọdọhọ ke uduak Abasi edi yak kpukpru owo “ẹbet use” ye nte ke “mbon use, ye mme okpono ndem, ye mme esịn efịbe, ye mmọ eke ẹbietde iban, ye mmọ eke ẹsabarede idem . . . ididaha Obio Ubọn̄ Abasi inyene.” (1 Thessalonica 4:3, 4; 1 Corinth 6:9, 10) Ke akpanikọ, mbon oro ẹnyịmede Bible nte Ikọ Abasi eke odudu spirit ẹdiọn̄ọ ẹte ke ekikere esie kaban̄a idan̄ oto enyene-ọniọn̄ n̄kan Andibot. Utịp emi enyenede ke idem mbon oro ẹdude uwem ekekem ye mme edumbet Bible owụt ke mme ndausụn̄ eti ido uwem ẹmi ẹkotde akani ido mi osụk ototịp n̄kpọ esịn ke nsọn̄ọnda eke ubon onyụn̄ ọnọ ukpeme ọbiọn̄ọ ntotụn̄ọ unan eke ntụk ye ndiọi udọn̄ọ ẹmi otode obukpo ido uwem.
Mfọn N̄kan Ukpan
Uda n̄kpọsọn̄ ibọk ke idiọk usụn̄ osụk edi akpan mfịna. Ntre ndien, nso idi mfọn n̄kan usụn̄ ndikpan uyen ndida n̄kpọsọn̄ ibọk ke idiọk usụn̄? Ke ndụn̄ọde kiet oro ẹkemịn̄de ke n̄wedmbụk n̄kpọntịbe mbon Brazil oro, O Estado de S.paulo, akwa ekpepn̄wed ye abiaibọk udọn̄ọ ibuot oro Claude Olievenstein ama ọsọn̄ọ etịn̄ aban̄a ufọn unyene ndausụn̄ ye ima ima un̄wam. Enye ọkọdọhọ ete: “Ke ini mme owo ẹtịn̄de n̄kpọ ẹban̄a n̄kpọsọn̄ ibọk mfịn, esisọn̄ọ etịn̄ ẹban̄a udeme oro mme borisi, ndutịm ukpeikpe, ye ufọkn̄wed ẹnyenede. Nte ededi, n̄kpon n̄kan n̄kpọ edi ukpan [uda n̄kpọsọn̄ ibọk] oro otode ubon. . . . Ediwak nditọn̄wọn̄ ikam idiọn̄ọke se idide ubiere ete. Ete idụhe; nte an̄wan̄ade enye ama osion̄o idem efep.”
Ke anamde an̄wan̄a ntak emi edikpan uda n̄kpọsọn̄ ibọk ke idiọk usụn̄ edide akpan n̄kpọ ke ndutịm ubon, Dr. Olievenstein ama adian do ete: “Nnyịn idu uwem ke n̄kaowo emi oyomde udori, oro mme owo ẹkopde bụt ẹban̄a nti ido uwem. Ke ini, ke ntak n̄kpọsọn̄ ibọk, nditọ nnyịn ẹtọn̄ọde ndiwụt ndusụk edu, emi edi koro nnyịn inamke ẹdiọn̄ọ ẹban̄a nti ido uwem aba. N̄kaowo nnyịn amakabade etie ọkpọsọn̄ ọkpọsọn̄, anana esịtmbọm, enyene uforo. Mme owo ẹkere ẹban̄a sụk en̄wan ndidu uwem.”
Nte ekemde ye magazine oro, Superinteressante, ndụn̄ọde ẹnamde ke U.S. ọsọn̄ọ ufọn oro odudu ete ye eka enyenede. N̄wedmbụk oro ọdọhọ ete: “N̄kparawa oro ẹsibede udomo ọfọn akan ke ufọkn̄wed, ẹnyụn̄ ẹtịmde ẹnyene nsọn̄ọnda ke ntụk ẹto mme ubon oro mme ete ye eka ẹnyenede odudu unịm in̄wan̄în̄wan̄ mbet ido uwem ẹsinyụn̄ ẹnọde ifụre oro ẹnyenede-nyene adan̄a. Ke ukem usụn̄ oro, ibat n̄kparawa owo oro ẹnyenede mbumehe uda n̄kpọsọn̄ ibọk ye n̄kpọsọn̄ mmịn omosụhọde ke akamba udomo ke utọ ubon ntre.”
Ye eti ntak, Bible ọnọ mme ete ye eka item ete: “Tụnọ eyen fo, ndien enye eyenọ fi nduọkodudu, onyụn̄ adat fi esịt.” (Mme N̄ke 29:17) Ih, nnen̄ede oro ọkọn̄ọde ke Bible ekeme ndin̄wam ete ye eka ndikpan uda n̄kpọsọn̄ ibọk ke idiọk usụn̄ nnyụn̄ nnam uwem ofụri ubon ọfọn akan.