Ntọt M’ọkwọrọ Obio Ubọn̄

Mmọ Ẹma Ẹbuọt Idem ke Jehovah

JEHOVAH owụk Mme Ntiense Jehovah ete ẹkwọrọ eti mbụk Obio Ubọn̄ ke ofụri ererimbot man mme owo ke kpukpru idụt ekpenyene ifet ndifiọk obufa ererimbot Abasi. Ke ndusụk idụt, awakde ndito ntak oro mme ọkwọrọ ederi Christendom ẹsịnde nsọk, ẹmekpan utom nnyịn. Oro edi ntre ke idụt kiet ke Africa. Edi Mme Ntiense Jehovah do ẹnam se Edidem David akanamde. Enye ọkọdọhọ ete: “Mmọbuọt idemmi ke Abasi: ndịk idinamke mi.” (Psalm 56:11) Mme ifiọkutom nditọete nnyịn ke idụt oro owụt nte ke mmọ ẹbuọt idem ke Jehovah ẹnyụn̄ ẹkaiso ke akpan utom esie.

Ntiense kiet anamde utom nte etubom ke ufọkn̄wed kiet ama ọsọn̄ọ eyịre ke ndikop uyo “Abasi nte andikara n̄kan uyo owo,” owụtde edida san̄asan̄a esie kaban̄a mme mbubehe Ukara. (Utom 5:29, NW) Ẹma ẹmia enye idiọk idiọk ẹnyụn̄ ẹdori enyịn ndibiere ikpe nnọ enye nte owo mbia. Kpukpru owo ẹkekere ke ẹyewot enye. Ntiense oro, nte ededi, ama ọbuọt idem ke Jehovah. Enye ama ọsọn̄ọ odu ke edinam akpanikọ onyụn̄ anam an̄wan̄a mme ntak ẹtode ubieresịt kaban̄a idaha esie. Utịp? Ẹma ẹsana enye ẹyak ndien enye ama afiak ọnyọn̄ obio emana esie, osụn̄ọde ke mme isụn̄utom Ukara oro ẹkemiade enye ndikpe enye ubọk. Ẹma ẹfiak ẹda anam-akpanikọ Ntiense emi ke utom ukpepn̄wed ẹnyụn̄ ẹmenede itie ẹsịm itieutom esenyịn ufọkn̄wed!

Andinam ndutịm ufọkn̄wed kiet ama anam ẹbịne andikpep kiet edide Ntiense ke utom. Ọfiọn̄ kiet ke ukperedem andinam ndutịm emi ama ọbọ n̄wed Afo Emekeme Ndidu Uwem ke Nsinsi ke Paradise ke Isọn̄ oto akpan asiakusụn̄ onyụn̄ onyịme ukpepn̄kpọ Bible. Ke ama okokụre ibuot 6, enye ama ọkpọn̄ utom nte anam ndutịm ufọkn̄wed, ndien enye ye n̄wan esie ẹma ẹtọn̄ọ ndidụk kpukpru mbonoesop Mme Ntiense Jehovah. Ke usenubọk Sunday kiet andikpep oro ẹkesiode ke utom mi ama odu ke n̄kpaidem ndisobo ye eren oro okosiode enye ke utom ndinyụn̄ n̄kụt nte ke enye okodu ke usụn̄ ndikabade eyenete esie eke spirit.

Ifiọkutom efen otode kpa idụt emi anam an̄wan̄a nte Mme Ntiense Jehovah ẹkewụtde ukpono ẹnọ ndutịm Jehovah ẹnyụn̄ ẹnamde n̄kpọ ndinam esop asana. Akpan asiakusụn̄ kiet oro anamde utom ke efakutom emi odude ke nsannsan ebiet ama osobo ọkpọsọn̄ ubiọn̄ọ. Sia enye okotode ekpụk ye ikpehe obio efen, mme asua akpanikọ ẹma ẹyom ndibịn enye mfep ke obio oro. Nte ededi, ọbọn̄ obio oro ama osio eti edu esie owụt ye nti utịp otode utom ukwọrọikọ esie ikonyụn̄ inyịmeke ẹbịn enye ẹfep. Ọbọn̄ oro ama okụt ete ke tọn̄ọ nte akpan asiakusụn̄ emi ekedibehe, mme owo ẹma ẹwụt ukpono ẹnọ odudu oro ẹkarade ke ndikpe tax mmọ nnyụn̄ nnam utom usụn̄ obio ini kiet ke urua.—Rome 13:1, 7.

Ekem, ke okoneyo kiet ẹma ẹmụm Ntiense en̄wen nte esịnde efịbe ye n̄wan kiet oro mîdịghe Ntiense. Ufiet ama asuana, ndien ẹma ẹkot akpan asiakusụn̄ oro ikpe ke iso ọbọn̄, emi ọkọtọkde enye, ọdọhọde ete: “Se eyeneka fo mi ẹmụmde nte esịnde efịbe. Mbufo Mme Ntiense Jehovah ikpụhọkede ye mme ido ukpono efen.” Akpan asiakusụn̄ oro, nte ededi, ama anam an̄wan̄a ete: “Okposụkedi idide mme anana mfọnmma owo, nnyịn imokpụhọde ye mme ido ukpono efen koro nnyịn inyịmeke mme edinam mbon oro ẹnamde akwa idiọkn̄kpọ.”

Ntiense oro ekesịnde efụbe do ama aka n̄kpọkọbi onyụn̄ ekpe isop. N̄ko-n̄ko, ẹma ẹsio enye ẹfep ke esop nte anamidiọk oro mîkabakede esịt. Edinam emi ama otụk ọbọn̄ oro ke idem onyụn̄ okịbe mbon oro ẹkesakde Mme Ntiense Jehovah nsahi inua. Ọbọn̄ oro ama ọdọhọ ete: “Ẹkûtịn̄ idiọk ẹban̄a Mme Ntiense Jehovah. Mmọ ẹnyene akpanikọ. Owo inamke utọ edinam oro ke mme ido ukpono efen.”

Mme anam-akpanikọ Ntiense ke idụt oro ẹtiene item oro ke Psalm 37:3: “Buọt idem ye Jehovah, nyụn̄ nam se ifọnde; dụn̄ ke isọn̄, nyụn̄ dia akpanikọ.” Nte nnyịn iyebuọt idem ke Jehovah nte mme Christian ẹmi ẹkebuọtde?