Ndisịn Idem Ọkpọsọn̄ Ọkpọsọn̄ ke Eti Mbụk
APOSTLE Paul okodu ke ọkpọsọn̄ idaha emi Mme Ntiense Jehovah ẹmi ẹdide mme asan̄autom uyọhọ-ini ẹfiọkde—enye ikenyeneke okụk. Ntre ke Corinth enye ama anam usụhọde utom udọk ufọkọfọn̄ oro enye ekekpepde nte uyen. Utom oro ama ọsọn̄, ndien ke ndusụk ini ekeme ndidi iyịp ama esiwọrọ enye ke ubọk ọnọ edikama nsọsọn̄ ọfọn̄ ufọkọfọn̄. Ọkọsọsọn̄ okụk oro ndidep udia ye edisịnen̄kpọ esie, edi enye ama oyụhọ ke oro, koro ke ini utom idịbi udia esie eke usen ke usen okụrede, enye eyeyak mme n̄kpọutom ubọkọkọ esie onịm onyụn̄ anam se enye ekedide Corinth ndinam ke akpa ifet—enye ama esikwọrọ eti mbụk!—Philippi 4:11, 12.
Ke mme usen Sabbath, Paul ama esika ke synagogue. Ke akpanikọ, Paul ke akpa okosobo mbon oro enye eketịn̄de ikọ ọnọ ke Corinth “ke mmemidem, ye ndịk, ye akwa nyekidem.” (1 Corinth 2:1, 3) Edi ke nte ndusụk owo ẹkenamde n̄kpọ ẹban̄a etop esie onụkde, Paul ama akaiso “ebuen ikọ ke synagouge kpukpru sabbath, an̄wana ndinam mme Jew ye mme Greek ẹnịm ke akpanikọ.”—Utom 18:1-4.
Ke ekpri ini, okposụkedi, Paul ikekemeke ndinam n̄kpọ n̄kan ndikwọrọ ikọ ke ibio ini. Ekem Silas ye Timothy ẹma ẹto Macedonia ẹsụhọde ẹdi ye etịbe ntatubọk oro ‘ọkọnọde se inanade enye.’ (2 Corinth 11:9; Philippi 4:15) N̄kpọ nsịnudọn̄, n̄ko, ekedi etop oro nte ke nditọete ke Thessalonica ke ẹkesọn̄ọ ẹda kpa ye ukọbọ.—1 Thessalonica 3:6.
Nso ikedi utịp ke idem Paul? “Paul ama ọtọn̄ọ ndisịn idem ọkpọsọn̄ ọkpọsọn̄ ye ikọ [“ndisịn ofụri ini esie ke ndikwọrọ ikọ,” The Jerusalem Bible; Today’s English Version], ọnọde mme Jew ikọ ntiense ndiwụt nte ke Jesus edi Christ.” (Utom 18:5, NW) Ke ẹfịgherede enye mfịghe okụk ke ekpri ini, Paul ikọduọkke odudu tutu enye afiak ọtọn̄ọ ukwọrọikọ uyọhọ-ini. Enye ama afiak ọtọn̄ọ utom esie ye odudu, ikụreke ke ndikwọrọ ikọ nnọ mme Jew ikpọn̄îkpọn̄ edi idem adade ini oro ndiwet akpa leta esie eke odudu spirit—kpa n̄wed ewetde ọnọ ẹsọk mbon Thessalonica!
Uwụtn̄kpọ Ẹnọde Nnyịn Mfịn
Ẹma ẹtịm mbụk ọkpọsọn̄ utom Paul ke Corinth ẹnịm man ẹsịn udọn̄ ẹnọ kpukpru mme Christian ndisịn idem ọkpọsọn̄ ọkpọsọn̄ ye eti mbụk. Paul ama ọfiọk ete ke Ọbọn̄ Jesus ke idemesie ama ayak n̄kokon̄ ukpono edidi “un̄wana ererimbot” ọnọ mme mbet esie. Ikanaha mmọ ẹdịp un̄wana emi. Jesus ama asian mmọ ete: “Yak un̄wana mbufo ayama ke iso owo, man mmọ ẹkụt nti utom mbufo, ẹnyụn̄ ẹtoro Ete mbufo emi odude ke heaven.” (Matthew 5:14-16) Emi ọkọwọrọ ndinyene ọyọhọ ebuana ke utom ukwọrọikọ oro Jesus ekebemde iso etịn̄ aban̄a. (Matthew 24:14; 28:19, 20; Utom 1:6-8) Edikwọrọ eti mbụk Obio Ubọn̄ emi ekedi akpan ntak ọnọ edidu esop Christian.
Mme akpa Christian, ukem nte Paul, ẹma ẹda utom ukwọrọikọ emi ke akpan n̄kpọ. Ntre, ke ini mme asua Abasi ẹkekerede ke mmimọ ima inịme ata un̄wana emi ebe ke ndiwot “Ọbọn̄ uwem” ke ibak ibak usụn̄, mme mbet esie ẹma ẹkaiso nte un̄wana ererimbot, ẹkwọrọde ikọ odudu odudu. (Utom 3:15) Idem ukọbọ iketreke mme ukeme mmọ. Mbụk Bible ọdọhọ ete: “Kpukpru usen, ke temple ye ke ufọk, mmọ idopke uyo ndikpep nnyụn̄ n̄kwọrọ, ẹte Jesus edi Christ.” (Utom 5:42) N̄kpọ ndomokiet ikekemeke ndikpan mmọ!
Ke eyomfịn, mme Christian ukem ntre ẹmesịn idem ọkpọsọn̄ ọkpọsọn̄ ke utom unọ ikọ ntiense. Ke ekperede utịt ọyọhọ isua ikie-19, mme esịn ifịk nditọ ukpepn̄kpọ Ikọ Abasi ẹma ẹtọn̄ọ ndikụt ufọn edibuana mme akpanikọ Bible ye mmọ en̄wen. Zion’s Watch Tower Tract Society—kpa n̄ka oro ama akakabade edi eke ofụri ererimbot ke udomo—ama akabade edi n̄ka oro ibet onyịmede ke 1884. Nditọ Ukpepn̄kpọ Bible ẹmi, oro ẹdiọn̄ọde toto ke 1931 nte Mme Ntiense Jehovah, ke ata ata usụn̄ ẹmeyọhọ isọn̄ ye ifiọk Ikọ Abasi. Ọkpọsọn̄ utom mmọ omosụn̄ọ ke akwa udịm mme ọsọn̄idem owo ẹwakde ẹbe million inan̄! Ndien eyịghe idụhe ibat mmọ eyekaiso ndikọri ke idak ndausụn̄ Jehovah.—Isaiah 60:22.
Nte Afo ke Anam Udeme Fo?
Jesus ọkọdọhọ ete: “Idọk okpon, edi mme anamutom iwakke.” (Matthew 9:37, 38) Ke 1990 se ikperede owo million duop ẹkedụk Editi n̄kpa Christ. Nso utịbe utịbe idotenyịn idu ntem inọ n̄kọri idọk ofụri ererimbot! Edi ke adan̄aemi idarade ke n̄kaiso n̄kọri emi, ana owo kiet kiet obụp idemesie ete, ‘Ke nso udomo ke ami mbuana ke akwa utom emi? Nte ami ke nnam ntre kpukpru ini—kpukpru urua ke n̄kemede?’
Ana mbiowo ẹda iso ke utom emi nte “uwụtn̄kpọ ẹnọ mme erọn̄.” (1 Peter 5:3) Ke akpanikọ, n̄wakn̄kan mbiowo ẹnyene utom idịbi udia ẹnamde. Ntre ke apostle Paul akanam ke adan̄aemi odude ke Corinth. Edi, enye ama osio ini onịm ọnọ utom ukwọrọikọ ofụri-ini. Ediwak mbiowo mfịn ukem ntre ẹsịn idem ọkpọsọn̄ ọkpọsọn̄ ke mme utom eke spirit ke mme utịturua. Emi ekeme ndinyene okopodudu utịp ye nsịnudọn̄ ke idem kpukpru owo ke esop. Ke ndusụk ọfiọn̄ ke ini ẹsịnde san̄asan̄a ukeme, ediwak esop ẹsinyene uwak mme asuanetop mmọ ẹdụkde utom usiakusụn̄. Nso isidi ndịben̄kpọ? Mbiowo ẹda iso ke ukwọrọikọ ye ke ndidiomi mme ndutịm utom-an̄wautom.
Mme asan̄autom unamutom ẹkeme n̄ko ndidi eti odudu ke idem esop edieke mmọ kpukpru ini ẹbuanade ke utom an̄wautom. Ti, N̄wed Abasi oyom ete mmọ ẹdi “mbon nsịnifịk, . . . irenowo oro ẹnamde utom ke eti usụn̄.” (1 Timothy 3:8, 13, NW) Edinam akpanikọ ke utom an̄wautom edi akpan n̄kpọ ndinam eyenete odot nte ebiowo m̀mê asan̄autom unamutom.—Titus 1:8, 9.
Ukem nte Paul, ndusụk owo ẹkeme ndisụhọde ubọk ke utom idịbi udia ndien ke ntre ẹsiakde usụn̄. Ibat mme asiakusụn̄ ofụri-ini, mme asiakusụn̄ unọ un̄wam, ye mme akpan asiakusụn̄, ama ọkọri ọtọn̄ọde ke 137,861 ke n̄kpasịp isua duop ẹmi ẹkebede osịm 536,508 ke 1990. Ke akpanikọ, edidiọn̄ ye unyịme Jehovah ikpọn̄îkpọn̄ ekekeme ndinam emi otịbe. Ana mme asiakusụn̄, nte ededi, ẹkpeme ndida ini mmọ nnam n̄kpọ nte ọfọnde, idịghe n̄kukụre ke ndibat ini. Mme asiakusụn̄, nte mbufo ẹmetịm idem mfọn mfọn ẹnyụn̄ ẹkụt unen ke utom an̄wautom? Nte mbufo ẹmedomo ndinam n̄kaiso n̄kọri man utom mbufo okpon̄wụm mfri ke akpanikọ?
Mme Utịp Utom Oro Adade Ukem Ukem
Nte afo omowụt esịtekọm ọnọ ntọt oro omụmde uwem akama oro ẹnọde kpukpru ọfiọn̄ ke Enyọn̄-Ukpeme ye nsan̄a esie, kpa Awake!? Nte eyịghe mîdụhe omowụt. Nte esịtekọm fo onụk fi ndinyene ebuana ke ndisuan n̄wed ẹmi? Eyenete an̄wan kiet ke Botswana ama anam ntre. Enye ke akpa ama ọbiọn̄ọ akpanikọ, edi ebe esie ama esikot mme magazine ẹmi ọnọ enye. Nte ini akade enye ama okpụhọde esịt onyụn̄ akabade edi Ntiense. Okposụkedi mîkemeke ndikot n̄wed, enye enen̄ede okụt unen ke ndinịm mme magazine, ọdọhọde ete, “Ami mfiọkke ndikot n̄wed, edi ebe mi esikot mme magazine ẹmi ọnọ mi. Ami mmadara mmọ, ndien mmonịm nte ke afo eyedara n̄ko.”
Ntak mûnyeneke ebuana eke urua ke urua ke utom unyan̄a-uwem emi-e? Ndondo oro afo enyenede mme n̄kpọ eke spirit oro anamde owo odot, esop Christian eyekop inemesịt ndin̄wam fi nditọn̄ọ. Ndinịm magazine, nte ededi, akam edi ikpehe utom kiet. Owo ekededi oro esịnde idem ọkpọsọn̄ ọkpọsọn̄ ye eti mbụk esidomo ndinam utom oro adade ukem ukem. Ke uwụtn̄kpọ, Watch Tower Society esisio ikpọ n̄wed ke ediwak million, ndien esinọ mbonan̄wa mmọemi nte ebiet emi udia eke spirit oro ebịghide otode. Nte amakabade enyene usọ ekem ke utom ukwọrọikọ fo ndinịm mme n̄wed, utọ nte Afo Emekeme Ndidu Uwem ke Nsinsi ke Paradise ke Isọn̄?
Ndien nso kaban̄a mbon oro ẹwụtde udọn̄? Nte afo omonịm eti n̄wetnịm n̄kpọ man afiak aka ebịne mmọ? Utọ edika mbịne oro ekeme ndida nsịm ikpehe utom oro adade n̄kponn̄kan idara edi—kpa utom ukpepn̄kpọ Bible. Ti, Jesus ọkọnọ nnyịn ewụhọ ke Matthew 28:19, 20 ete ‘inam mme mbet, inịm mmọ baptism.’ Oro ọwọrọ ndikpep Bible ye mmọ. Ke akpanikọ, nditọn̄ọ ukpepn̄kpọ esiwak ndiyom nsịnifịk. Ntiense kiet ama osobo ye mme ọdọ ndọ ẹmi ẹma ẹkekponi ke emana ẹmi ke idatesịt ẹkenyịmede ukpepn̄kpọ Bible. Edi mmọ ẹma ẹsio ukpepn̄kpọ emi ẹnịm ke adiana ke adiana ke urua ita. Ke akpatre ẹma ẹtọn̄ọ ukpepn̄kpọ oro. Ekem ke ekpri ini, mme ọdọ ndọ oro ẹma ẹsibiat ukpepn̄kpọ oro ẹfep ke ekperede ndidi ke kpukpru ọyọhọ urua iba. Ke akpatre, nte ededi, n̄wan ama anam n̄kọri okosịm idaha ndina baptism. Eyenete oro eti ete, “Ke ama akana baptism, mmọn̄eyet idatesịt ama asiaha enye ke enyịn, emi akanamde mmọn̄eyet idatesịt asiaha mi ye n̄wan mi ke enyịn.” Ih, ndisịn idem ọkpọsọn̄ọ ọkpọsọn̄ ke eti mbụk ada idatesịt oro inua mîkemeke nditịn̄ edi!
Nọ Idemfo
Jesus Christ ye apostle Paul ẹma ẹnịm nti uwụtn̄kpọ nsinifịk ẹnọ nnyịn ndikpebe. Ndien nnyịn imenyene ediwak nti uwụtn̄kpọ ke otu Mme Ntiense Jehovah eyomfịn. Ini ekem ọnọ kpukpru owo ẹmi ẹdiọn̄ọde eti mbụk ndikabade nsịn ifịk ọyọhọ ọyọhọ ke ndinam mmọ efen ẹdiọn̄ọ enye. Bible ọn̄wọn̄ọ ọnọ nnyịn ete ke kpukpru utọ utom oro “idiwọrọke idi ikpîkpu.”—1 Corinth 15:58.
Ukem nte Paul, n̄wakn̄kan owo ẹnyene mbiomo ke n̄kan̄ eke okụk ndise mban̄a. Ke ntak emi, ekeme ndidi ediwak owo idikemeke ndisiak usụn̄. Edi ye un̄wam Jehovah, kpukpru owo ẹkeme nditiene eti item oro ẹnọde ke Rome 12:11 ẹte: “Ẹkûtek ke ifịk mbufo; ẹnyene ifiopesịt ke spirit; ẹnam utom ẹnọ Ọbọn̄ [“Jehovah,” NW).” Ndien edieke n̄kpọ ẹkpụhorede man ayak ini oro awakde ekem odu ndisịn ke utom Jehovah, owo ekededi oro enen̄erede ama Jehovah, ukem nte Paul, eyeda ifet oro anam n̄kpọ. Sịn idem ọkpọsọn̄ ọkpọsọn̄ ke eti mbụk! Ndinam ntre ididaha mme edidiọn̄ idi idahaemi ikpọn̄îkpọn̄ edi ke ini iso eyesụn̄ọ ke nsinsi uwem ye anana-utịt idara ye inemesịt!—Matthew 19:28, 29.