Nte Mmọ Ẹkeme Ndinọ Fi Ufọn?

ẸTỊM magazine oro afo akamade mi ke ubọk ndidi ebiet nsịnudọn̄, odụride ekikere owụt mme ndausụn̄ oro Bible ọnọde ndida nnam mme ubon ẹnyene iwụk nnyụn̄ mmụm nsọn̄ọnda idemowo n̄kama. Enye owụt nte ke ẹma ẹbemiso ẹtịn̄ ẹban̄a mme ini ndutịme oro odude mfịn ke Bible, ndien enye owụt usọbọ​—⁠kpa ukara Obio Ubọn̄ Abasi. Nte afo emekeme ndibọ ufọn nto Enyọn̄-Ukpeme ye nsan̄a magazine esie, Awake!?

Ke Philippines n̄wan kiet ekerede Vilma ekewet ete: “Edieke ikọ okpodude ndida ntịn̄ nte mme n̄wed mbufo ẹtiede, n̄kere ke ami n̄kpada ‘utịbe.’ N̄kokụt nnyụn̄ n̄kot Awake! ye Enyọn̄-Ukpeme mbufo akpa ini ke esịt bọs ke ini n̄kotode ke Manila nnyọn̄ ufọk. Nsiwak ndikama mme n̄wedmbụk n̄kpọntịbe ke ini n̄kade isan̄, edi isan̄ enyeemi n̄kakamake ndomokiet.

“Akwaowo kiet emi akakamade n̄wed mbufo ama etie ekpere mi ke ini isan̄ emi. Ke enye ama okokot Awake! okụre, enye ama osio magazine efen, Enyọn̄-Ukpeme. Mma nda ifet oro ndibuọt Awake! Ke ofụri akpanikọ, mma nnen̄ede n̄kop inem ndikot mme magazine oro koro kpukpru ibuotikọ ẹma ẹnem, ẹdi ekemini, ẹnyụn̄ ẹdemede owo udọn̄.”

N̄wan oro ama eberi ete: “Mmoyom ndibọ mme magazine mbufo. Mbọk ẹnam mi mfiọk nte n̄kemede ndibọ mmọ.” Ọfis n̄kọk itieutom eke Mme Ntiense Jehovah ke Philippines ama okop inemesịt ndikụt nte ke ẹsịn n̄wan emi ke udịm unọ n̄wed mmọ.