Mma N̄kụt Akakan N̄kpọuto

NTE FLORENCE WIDDOWSON OBỤKDE

Nte okoneyo ekekperede, nnyịn ima ibiere ndinam nna n̄kpere n̄kpọdiọhọ mmọn̄ unụn̄. Ikedịghe mfọnn̄kan itienna inọ iban iba, edi nnyịn ima ikere ke enye eyefọn ke okoneyo kiet. Ke adan̄aemi n̄kesịnde ukeme ndiwụk ataya, Marjorie ke eketem udia mbubịteyo nnyịn.

N̄KOSỤK n̄kụre ndikọn̄ akpatre eto ataya ke ini n̄kokụtde n̄kpọ asan̄ade ekpere obubịt etak eto. Mma mbụp Marjorie nte, “Omokụt nte etak eto oko asan̄ade?”

Enye ama ọbọrọ ye esisịt n̄kpaidem ete, “Baba.”

Mma mfiori nte, “Kamse, enye ke asan̄a ke akpanikọ. Nnọ mi kettle!”

Ke mbọde enye, ye ekụri ke afara mi, mma nsan̄a n̄ka n̄kpọdiọhọ mmọn̄ unụn̄ oro. Ke ini n̄kekperede etak eto oro, eren kiet ama ọwọrọ ke edem esie!

Mma n̄n̄wana mbụp ye nyekidem nte, “Ndi mmọn̄ n̄kpọdiọhọ mmọn̄ unụn̄ emi ọfọn ndin̄wọn̄?”

Enye ama ọbọrọ ntre ntre ete, “Baba, ifọnke, edi edieke oyomde edin̄wọn̄ mmọn̄, nyenọ fi esisịt.”

Mma nsọsọp nsịn enọ esie, ndien ke ndinọ mi akwa ifụre, enye ama ọwọn̄ọde inikiet inikiet asan̄a adaha. Ke nyekidem, mma mfiak nnyọn̄ usọp usọp nnyụn̄ n̄ketịn̄ nnọ Marjorie se ikotịbede. Nnyịn ima isọsọp ikpọk ataya oro, itan̄ n̄kpọ, inyụn̄ idan̄a. Ke ukperedem ẹma ẹsian nnyịn nte ke ibịghịke ẹkesio owo emi ke ufọk n̄kpọkobi.

Okposụkedi mme oyom n̄kpọuto ẹkesinamde nna do ke an̄wa gold Australia ediwak ini ke edem ko ke 1937, nnyịn ikedi isio isio orụk mme oyom n̄kpọuto. Nnyịn ikoyom mme owo ẹmi ẹkedide mme ọsọn̄urua n̄kpọuto ẹnọ Abasi.

Idaha Ubon Mi

Isua ikie ẹmi ẹkebede, ete mi ekedi odomutịm ke ekpri obio-in̄wan̄ Porepunkah ke stet Victoria. Ami n̄kamana do ke 1895, ndien n̄kọkọri ye nditọeka iren inan̄ ke ekperede Akpa Ovens, ke isọn̄ isọn̄ Obot Buffalo. Ete ye eka mi ẹkedi mme andibuana ofụri ini ke Ufọkabasi Union, ndien mma nsika ederi nditọwọn̄, emi ete mi ekedide esenyịn.

Ke 1909, Mama ama enyene udọn̄ọ esịt ke ini afai afai oyobio onyụn̄ akpa ke afara ete mi. Ekem, ke ntọn̄ọ ntọn̄ọ 1914, kiet ke otu nditọeka mi iren ama ọkpọn̄ ufọk, ndien ke hour ifan̄ ke ukperedem, ẹma ẹfiak ẹda enye ẹsọk nnyịn​—⁠obukpo. Enye ama owot idem. Mfụhọ nnyịn ama ototịm okpon oto ke ukpepn̄kpọ ufọkabasi oro nte ke enye aka hell, sia ẹkedọhọde ke uwotidem edi idiọkn̄kpọ oro edifen mîdụhe.

Nte ini akade ke isua oro Ekọn̄ Ererimbot I ama asiaha, ndien nditọeka mi iren iba ẹma ẹsịn enyịn̄ ndikanam utom ekọn̄ ke esenidụt. Enyene-ndịk etop uduọkiyịp ye ufen ama anam nnyịn n̄kaiferi itiokiet, ọkọrọ ye ete mi, itọn̄ọ ndikpep n̄wed John eke Bible.

Ndikụt Ata N̄kpọuto

Ellen Hudson ama enyene n̄wed oro, The Time Is at Hand, oro Charles Taze Russell ekewetde. Ifiopesịt oro enye ekenyenede aban̄a n̄wed emi ama otụk nnyịn eken ke otu emi. Ke ini enye ọkọfiọkde ete ke n̄wed oro ekedi kiet ke otu udịm udịm eboho itiokiet oro ẹkotde Studies in the Scriptures, enye ama ọnọ leta ẹsọk N̄ka Nditọ Ukpepn̄kpọ Bible eke Ofụri Ererimbot ke Melbourne onyụn̄ eben̄e oyom mmọ eken. Otu nnyịn ama onyịme ndikama akpa eboho oro, The Divine Plan of the Ages, ke ukpepn̄kpọ nnyịn eke urua ke urua.

Kere ban̄a idatesịt mi ye eke Papa ndidiọn̄ọ nte ke hell ikan̄ idụhe. Ẹma ẹmen ndịk oro nte ke ẹkesịn eyeneka mi ke hell ikan̄ ẹfep. Nnyịn ima ikpep akpanikọ oro nte ke mme akpan̄kpa ifiọkke n̄kpọ, nte n̄kpọ eke ẹdede idap, ye nte ke idụhe uwem ke ebiet efen ibọ ufen ke ndutụhọ. (Ecclesiastes 9:​5, 10; John 11:​11-⁠14) Ndusụk owo ke otu ukpepn̄kpọ Bible nnyịn ẹma ẹbiere ndika mbịne mme mbọhọidụn̄ nnyịn n̄kọkwọrọ akpanikọ oro nnyịn ikekpepde. Nnyịn ima ika mme ufọk oro ẹkedude ẹkpere, edi ima ida mme enan̄ukwak ye ukpatn̄kpọ emi enyenede wheel iba oro enan̄-mbakara kiet odụride man isịm mbon emi ẹdude ke obio-in̄wan̄.

N̄kọtọn̄ọ unọ ikọ ntiense eke ufọk ke ufọk ke Usen Armistice, November 11, 1918. Nnyịn owo ita ke otu ukpepn̄kpọ nnyịn ima isan̄a ke kilomita 80 (itiat 50) ika obio Wangaratta ndikasuan tract oro, Peoples Pulpit. Ediwak isua ke ukperedem, ke adan̄aemi n̄kodude ke utom ukwọrọikọ ke kiet ke otu mme obio ẹmi ẹdude nsannsan, mma nnyene ifiọk n̄kpọntịbe oro n̄ketịn̄de ke ntọn̄ọ ntọn̄ọ do.

Ke 1919, mma ndụk mbono Nditọ Ukpepn̄kpọ Bible ke Melbourne. Do, ke April 22, 1919, mma nyarade uyakidem mi nnọ Jehovah ke mmọn̄ baptism. Akwa usọrọ eke spirit emi ama anam esịtekọm mi kaban̄a n̄kpọuto eke spirit eke Obio Ubọn̄ heaven ye kaban̄a esop Jehovah eke isọn̄, okpon.​—⁠Matthew 13:44.

N̄kafiakke nnyọn̄ ufọk ke mbono ama akasuana edi mma nnyịme ikot edisan̄a ye Jane Nicholson, ọkwọrọikọ uyọhọ-ini, ke utom unọ ikọ ntiense ọfiọn̄ kiet. Itieutom nnyịn ekedi mme obio utọ-in̄wan̄ ye ubọk enan̄ ke ikpehe n̄kan̄ Akpa King. Ke isua ifan̄ oro ẹkebede, obot obot ikpehe emi ekedi itie ẹkesisiode senima oro ẹkekotde The Man From Snowy River.

Ke 1921 nnyịn ima ibọ ediye un̄wam ukpepn̄kpọ Bible oro The Harp of God. Ke ini Papa ọkọtọn̄ọde ndikama enye nte n̄wed ukpepn̄kpọ ke ukpepn̄kpọ ederi nditọwọn̄ esie, ediwak ete ye eka ẹma ẹfan̄a ẹnyụn̄ ẹdọhọ enye ọkpọn̄ utom. Enye ama anam ntre ye unana ubiatini. Ekem ima ibọ ekpri n̄wed oro Hell, ye mme edemede-owo udọn̄ mbụme ikpaedem esie, “Nso ke Enye Edi? Mmanie Ẹdu Do? Nte Mmọ Ẹkeme Ndiwọrọ?” Papa ama enen̄ede okop nduaidem ke in̄wan̄în̄wan̄ uyarade eke Bible emi ẹkenọde ke ibuotikọ emi tutu enye ama ọtọn̄ọ ye unana ubiatini ndisuan mmọ to ke ufọk sịm ufọk. Enye ama onịm ediwak ke mme itie ikie ke obio nnyịn ye ke mme obio-in̄wan̄ oro ẹkekperede.

Mme Isan̄ Ukwọrọikọ ye Papa

Ke akpatre, Papa ama edep n̄kpọisan̄ man ada etop Obio Ubọn̄ osịm mme owo ke mme ebiet efen. Nte odomutịm, enye ama otịm emehe ye mme enan̄-mbakara, ntre ami mma n̄kabade ndi awat o-⁠moto. Akpa kan̄a, nnyịn ima idan̄ ke mme ufọkisen. Ke mîbịghike emi ama ọsọn̄ urua akaha, ndien nnyịn ima itọn̄ọ ndidụn̄ ke mme itienna.

Papa ama esịn n̄kpọitie iso moto edi mbatmbat mbatmbat man ami n̄keme ndide ke moto. Nnyịn ima iwụk ekpri ataya inọ Papa ndina ke esịt. Ke ima ikanam nna do ke ediwak urua, nnyịn ima ifiak ika Porepunkah, emi Papa akafiakde eberede itieutom udomutịm esie. Nnyịn ima isikop n̄kpaidem ke emi ediwak mbonurua oro ẹkesikpede okụk oro edikemde ke isan̄ ukwọrọikọ nnyịn efen.

Ediwak mbon esịt akpanikọ ẹma ẹnam n̄kpọ nte odotde ẹban̄a ediwaha nnyịn ndien ke akpatre ẹma ẹnyịme ukpepn̄kpọ Bible. Idahaemi esop itiaba ẹmi ẹnyenede mme Ufọkmbono Obio Ubọn̄ eke mmọ ẹdu ke ebiet oro ekpri otu nnyịn ke Porepunkah akanamde utom ke akpa. Ke akpanikọ, anie ekeme ndisịn “usen ekpri n̄kpọ” ke ndek?​—⁠Zechariah 4:10.

Ke 1931, ami ye Papa ima iwat ke se ikperede kilomita 300 (itiat 200) ke idiọk usụn̄ ndikodụk akpan mbono, emi nnyịn ikọbọde obufa enyịn̄ nnyịn oro, “Mme Ntiense Jehovah.” Nnyịn mbiba ima ikop inemesịt ke san̄asan̄a, enyịn̄ N̄wed Abasi emi. (Isaiah 43:​10-⁠12) Enye ama anam ẹdiọn̄ọ nnyịn ata in̄wan̄în̄wan̄ akan “Nditọ Ukpepn̄kpọ Bible Ofụri Ererimbot,” emi mînen̄ekede idi isio emi ẹkesidiọn̄ọde nnyịn tutu osịm ini oro.

Usen kiet ke ini n̄kọnọde ikọ ntiense ke obio Bethanga, mma nsobo asan̄autom n̄kann̄kụk otode Ufọkabasi England. Enye ama ayat esịt onyụn̄ ọtọn̄ọ ndiyom ediwak ebiet oro ikenịmde mme n̄wed nnyịn, ọdọhọde mme owo ẹmi ẹyak mme n̄wed mmọ ẹnọ imọ. Ke oro ebede enye ama ọfọp n̄wed ke ufọt obio. Edi ndisịme edinam esie ama ada eti utịp edi.

Ke mma n̄kọtọt ọfis n̄kọk itieutom N̄ka mban̄a se ikotịbede, ẹma ẹmịn̄ leta oro okobiomde se ọkwọrọ ederi oro akanamde ikpe. N̄ko, ẹma ẹnam ndutịm ndimen Mme Ntiense oro ẹyọhọde mme moto ndikasuan mme leta oro ke ofụri ikpehe oro. Ke ini ami ye Papa ikafiakde ika obio oro, nnyịn ima inịm uwak n̄wed ikan eke akpa. Mbon obio oro ẹma ẹnyene udọn̄ ẹban̄a se isịnede ke n̄wed oro “ẹkekpande” mi!

Akpa owo oro ọkọbọde akpanikọ Bible ke ufọt edem edere ye edem usiahautịn Victoria nte utịp ukwọrọikọ nnyịn ekedi Milton Gibb. Ke ufan̄ ini oro ikesifiakde ika, enye ama ekpep mme n̄wed N̄ka oro nnyịn ikọnọde enye ketket. Ke edifiak n̄waha nnyịn kiet, enye ama anam idem akpa nnyịn ke ndidọhọ: “Ami ndi kiet ke otu mbet fo idahaemi.”

Okposụkedi ubiere esie ekenemde mi esịt, mma nnam an̄wan̄a nte: “Baba, Milton. Afo ukemeke ndidi kiet ke otu mbet mi.”

“Ọfọn, ndien, ami ndi kiet ke otu mbet Rutherford [etieibuot Watch Tower Society ini oro].”

Mma mfiak nnam an̄wan̄a nte: “Baba, udịghe kiet ke otu mbet Rutherford n̄ko, edi ami ndori enyịn ke eyedi kiet ke otu mbet Christ.”

Milton Gibb ekedi kpa kiet ke otu ọsọn̄urua n̄kpọuto oro n̄kadade ata ediwak isua nyom. Enye ye nditọiren esie iba ẹdi mbiowo Christian, ndien mbon eken ke ubon esie ke ẹsọn̄ idem ke esop.

Ndisobo Nsio Nsio Idomo

Kpa ye ukpan oro ẹkedoride ke utom Mme Ntiense Jehovah ke Australia ke January 1941, nnyịn ima ikaiso ndikwọrọ ikọ, ikamade Bible kpọt. Ekem mma ntre utom ukwọrọikọ, m̀mê utom uyọhọ-ini mi, ke ini ẹkekotde mi ndi ufọk ndise mban̄a ete mi oro ọkọdọn̄ọde n̄kpa n̄kpa. Nte ini akade, ami n̄ko mma ndọn̄ọ onyụn̄ oyom ẹnam mi akamba usiakidem. Ama ada anyanini mbemiso n̄kafiakde n̄kop nsọn̄idem, edi mma n̄kụt akpanikọ un̄wọn̄ọ Abasi oro: “Ndikpuhu fi, ndinyụn̄ n̄kpọn̄ke fi.” (Mme Hebrew 13:5) Christian eyenete an̄wan kiet ama ọnọ mi nsọn̄ọ, ọdọhọde ete: “Flo, ti ete ke tutu amama afo udụhe ikpọn̄. Ndien afo ye Jehovah ẹdi n̄wakn̄kan kpukpru ini.”

Ekem utịt udọn̄ọ urua 13 ete mi ama edisịm. Ke July 26, 1946, enye ama ọbọp enyịn esie ke n̄kpa. Enye ama adara ọyọhọ uwem, ndien eke esie ekedi idotenyịn uka heaven. (Philippi 3:14) Ntre ke ndide isua 51, ami n̄kodu ikpọn̄, ke mma n̄kodu ye Papa ke n̄wakn̄kan isua uyen mi. Ekem mma nsobo ye ebe ini iso mi. Nnyịn ima idọ ndọ ke 1947 inyụn̄ itọn̄ọ utom usiakusụn̄ ọtọkiet. Edi ini inemesịt emi ikebịghike, sia enye ọkọdọn̄ọde akpauben̄ ke 1953 onyụn̄ akabade okop mmemidem.

Ama otụk ukeme utịn̄ikọ ebe mi idiọk idiọk, ndien ekpere ndidi n̄kekemeke ndineme nneme ye enye. Oro ekedi se isọn̄de ikan ke utom edise enye enyịn. Mfịghe ekikere ndidomo ndifiọk se enye akan̄wanade nditịn̄ ama okpon ata etieti. Okposụkedi nnyịn ikodụn̄de ke nsannsan ikpehe emi esop ndomokiet mîkodụhe ikpere, Jehovah ikọkpọn̄ke nnyịn ke n̄kpọsọn̄ isua oro. Mma ndiọn̄ọ kpukpru mbufa ntọt esop, ọkọrọ ye n̄kaiso udia eke spirit oro ẹnọde ke mme magazine Enyọn̄-Ukpeme ye Awake! Ke December 29, 1957, edima ebe mi ama akpa.

Utom ke Adelaide

Mma mfiak ndu ikpọn̄ ini kiet efen. Nso ke n̄kpanam? Nte ẹyefiak ẹda mi nte asan̄autom uyọhọ-ini ke mma n̄ketre utom ke se ikperede isua ition? Ẹma ẹda mi, ntre mma nnyam ufọk mi nnyụn̄ mfiak ntọn̄ọ utom usiakusụn̄ ke Adelaide, ibuot obio Edem Usụk Australia. Ẹma ẹyom mme asiakusụn̄ do ke ini oro, ndien ẹma ẹnọ mi n̄ka Esop Prospect.

Sia n̄kenyenede ndịk mban̄a ediwat uwat ke usụn̄ akwa obio, mma nnyam moto mi nnyụn̄ ntọn̄ọ ndifiak n̄wat enan̄ukwak. Mma nsiwat enye tutu ami nsịm isua 86 ke emana, n̄kabade ndi se ẹdiọn̄ọde ke n̄kann̄kụk oro nte “ekpri eyenan̄wan oro esiwatde blu blu enan̄ukwak.” Nte ini akade mma ntotịm n̄kop ndịk ke usụn̄; etie nte wheel iso enan̄ukwak mi ama esinyen̄e kpukpru ini. N̄kpọntịbe oro ke akpatre akanamde mi ntre ndiwat enan̄ukwak ekedi ke uwemeyo kiet ke ini n̄kọduọde mfaha ke ọkọ. Mma ndọhọ ke esịtidem mi nte, ‘Akpatre edi oro,’ ndien ke ntre mma mfiak ntọn̄ọ ndisan̄a ke ukot mi mbiba.

Isua ifan̄ emi ẹkebede, ke ini n̄kodụkde mbono district, mma ntọn̄ọ ndikop ubiak ke ukot, ndien ke etienede oro mma n̄ka usiakidem ikaba ke ekikoi mi. Mma n̄kop nsọn̄idem ke usiakidem ama okokụre tutu ke ini akamba ebua okonụkde mi ọtọ. Emi ama oyom usọbọ efen efen, ndien ọtọn̄ọde ke ini oro mma nyom ẹsan̄ man an̄wam mi ndisan̄a. Esịt mi ke osụk enyenyene uwem. Enye etie nte ufan kiet ọkọdọhọde: “Etie nte ikpọkidem fo emi ama okodụk usọn̄ ikemeke ndida ekekem ye nsek esịt fo.”

Ke ofụri isua oro, ami mmokụt mme esop ke Adelaide ẹkọride, ẹtarade, ẹnyụn̄ ẹbaharede. Ekem, ke 1983, ke ini n̄kedide isua 88, mma n̄kpọn̄ Adelaide ndikodụn̄ ye ubon kiet ke Kyabram ke stet Victoria, emi ndude ke inemesịt ke isua duop. Ke nsụk ndodomo ndiwọrọ an̄wautom; mme ufan ke esop ẹsiwat mi ẹsan̄a man n̄kese mbon oro ẹsibọde mme magazine kpukpru ini ẹto mi. Mme owo ẹmi ke mfọnido ẹsiwọrọ edi ke itie moto man n̄keme ndinyene nneme ye mmọ.

Ke ndade ekikere n̄ka edem ke se ibede isua 98 oro ndude uwem, ami ke idatesịt mmeti ediwak mme anam-akpanikọ ye mbon mbuọtidem oro ẹketorode Jehovah ye ami, akpan akpan edima ete mi. Etie nte mmodu uwem mbịghi n̄kan kpukpru mbon mbuọtidem oro ẹkedide nsan̄a mi ke utom usiakusụn̄. Edi nso idatesịt ina ibet mi ntem ndifiak n̄kadiana kiet ye mbon oro ẹnyenede idotenyịn edibọ utịp uwem ke Obio Ubọn̄ Abasi eke heaven, akakan n̄kpọuto ke akpanikọ!

[Ndise ke page 28]

N̄kana baptism ke April 22, 1919

[Ndise ke page 31]

Nsụk n̄kokop inemesịt ndinam n̄kpọ Jehovah nte n̄kperede ndisịm isua 100