Ẹmedi-⁠o ke Mbono District “Mbak Abasi”!

IH, INI edisịm ndinyene mbono district eke Mme Ntiense Jehovah eke 1994. Ọtọn̄ọde ke June 1994 tutu ke January 1995, ẹyekop ndutịm mbono usen ita ke ediwak obio ke mme itie ikie ke ofụri ererimbot​—⁠akpa ke North America, ekem ke N̄kan̄ Edem Usiahautịn ye Edem Usoputịn Europe, Asia, Central ye South America, Africa, Australia, ye mme isuo inyan̄ibom.

Nso ibuotikọ oro anamde owo ekere n̄kpọ​—⁠kpa “Mbak Abasi” ke emi edi ntem! Emi idịghe idiọk ndịk oro omụmde owo oro uwem esie odude ke itiendịk edi edi mbak Abasi, mbak oro ọnọde ifụre ekikere ye idatesịt. N̄ke Bible ọdọhọ ete: “Utịp nsụkesịt ye eke uten̄e [“mbak,” NW] Jehovah edi inyene, ye ukpono, ye uwem.” (Mme N̄ke 22:4) Didie ke edibak Abasi osụn̄ọ ke “inyene, ye ukpono, ye uwem”? Oro eyena in̄wan̄în̄wan̄ nte ẹditatde ibuotikọ mbono oro ke mme usen ita oro ẹdiyọhọde ye mme utịn̄ikọ, nneme, nnamn̄wụt, ye drama.

Apostle Paul ama ewet ete ke nnyịn ‘ikpesịnke ndisop idem ọtọkiet.’ (Mme Hebrew 10:25) Mme Ntiense Jehovah ẹnen̄ede ẹda oro ke akpan n̄kpọ, ẹsopde idem ikata ke urua kaban̄a ukpepn̄kpọ esop ye utuakibuot. Nte ededi, mbono district eke isua ke isua esidi san̄asan̄a. Mmọ ẹsisak iso ẹse enye ye ọkpọsọn̄ udọn̄ ẹnyụn̄ ẹsitịn̄ ẹban̄a enye ke ediwak ọfiọn̄ ke oro ebede. Nnyịn imọnọ fi ufiop ufiop ikot, inamke n̄kpọ m̀mê ewe ido ukpono ke afo abuana, ndibuana ye mmọ ke mbono mmọ nnyụn̄ ndara ufiop ufiop ebuana Christian ye akpan ntọt eke spirit. Kiet ke otu mme andibuana ke esop n̄kann̄kụk eke Mme Ntiense Jehovah eyenem esịt ndisian fi ebiet ye ini emi mbono oro ekperede fi akan edidade itie.