Dụk Mbono District “Mbak Abasi”!

Nte afo amanam kan̄a ndutịm ndidụk Mbono District “Mbak Abasi” eke Mme Ntiense Jehovah eke 1994? Ke akpanikọ, afo eyebọ ufọn ke ndidu ke kpukpru usen ita oro! Ye mbono 99 ẹdiomide ke Nigeria ikpọn̄, eyedi ẹyenịm mbono kiet ẹkpere ebiet emi afo odụn̄de.

Ke adan̄aemi ndusụk ndịk ekemede ndisụhọde uko onyụn̄ abiat idotenyịn, utịn̄ikọ ibuotikọ mbono ke usenubọk Friday eyetịn̄ se mbak Abasi ọwọrọde onyụn̄ anam ediwak ufọn esie an̄wan̄a. Ke akpanikọ, ofụri ndutịm mbono eyesio mme ufọn ẹmi owụt.

Ke uwemeyo Friday afo eyekop nte mbak Abasi ekemede ndisọn̄ọ ndọ ye uwem ubon, ọkọrọ ye nte enye ekemede ndin̄wam n̄kparawa owo ndikaiso nsọn̄ọ nda ke edinam akpanikọ mmọ nnọ Abasi. Ikpehe uwemeyo oro ediberi ye aduai-owo idem utịn̄ikọ oro, “Ndọn̄esịt Ẹnọde Mbon Oro Owo Mmọ Akpade.” Afo eyedara nti ntọt oro ẹdinọde ke ini utịn̄ikọ oro ndin̄wam mbon oro ẹketabade mbon mmọ ke n̄kpa.

Ndutịm Saturday eyewụt nte mbak Abasi ekemede ndisọn̄ọ nnyịn idem ndisọn̄ọ nyịre ye ndausụn̄ Jehovah ke se iban̄ade esop ye utom ukwọrọikọ nnyịn. Ke utịn̄ikọ oro “Kot Ikọ Abasi, kpa Edisana Bible, ke Usen ke Usen” mme andidụk ẹyebọ nti ekikere kaban̄a edikot ye edikpep Bible. Ndutịm Saturday ediberi ye utịn̄ikọ ke edemede-owo udọn̄ ibuotikọ oro “Usen Jehovah Oro Enyenede Ndịk Emekpere.”

Se idude ke ndutịm Sunday edi utịn̄ikọ oro “Nti Owo Ẹyeset ke N̄kpa.” Ke utịn̄ikọ oro editienede, “Ẹnyan̄a ye Uwem Ẹbe Akwa Ukụt,” ẹyenam utịbe utịbe un̄wọn̄ọ Jesus oro kaban̄a mbon oro mîdikpaha tutu amama an̄wan̄a.​—⁠John 11:26.

Ikpehe usenubọk Sunday ediberi ye edemede-owo ekikere drama a-⁠minit 40 oro ọdọhọde Mme Edimek Oro Afo Asakde Iso Ese. Ẹyeda otuowo ẹfiak edem ẹkosịm eyo Joshua ẹnyụn̄ ẹkụt ẹwụtde ọkpọsọn̄ ubiere esie ndinam n̄kpọ Jehovah. Mmọ n̄ko ẹyewụt udomo ikan̄ eke eyo Elijah, ndien ẹyeda ukpepn̄kpọ ẹto n̄kpọntịbe mbiba ẹmi oro edin̄wamde mme andidụk ndiwụt mbak Abasi mfịn. Ke uwemeyo, utịn̄ikọ an̄wa oro, “Ntak Abakde Ata Abasi Idahaemi,” edidi akpan n̄kpọ ntịn̄enyịn mbono.

Nam ndutịm idahaemi ndidụk. Man okụt itie emi ekperede ufọk fo akan, ka Ufọkmbono Obio Ubọn̄ eke Mme Ntiense Jehovah eke n̄kann̄kụk mîdịghe wet mme andimịn̄ magazine emi. Nsiondi Awake! eke June 8 ama esịne adres kpukpru itiembono ke United States, Canada, Britain, ye Ireland. Ke adianade do, nsiondi Awake! eke October 8 ama esịne adres kpukpru itiembono ke Nigeria.

[Ebiet Ẹdade Ndise Ẹto ke page 32]

T. Rosenthal/SUPERSTOCK