Mbono District “Idara Idara Mme Anditoro” Eke Mme Ntiense Jehovah
Akama-utịp usen ita eke item Bible ke ẹna ẹbet fi. Ye se iwakde ikan mbono 90 ẹmi ẹdiomide ke Nigeria ikpọn̄, eyedi ẹyenịm mbono kiet ẹkpere ebiet emi afo odụn̄de. Du ke ini ndutịm ọtọn̄ọde ye ikwọ ke n̄kanika ebede 9 ke minit 20 ke Friday.
Ndutịm usenubọk Friday eyewụt mme ikọ ekọm ọkọrọ ye utịn̄ikọ ibuotikọ mbono oro, “Ẹsio Ẹnịm San̄asan̄a nte Idara Idara Mme Anditoro ke Ofụri Ererimbot.” Ke uwemeyo ndutịm ediwụhọ ke mme uyen, mme ete ye eka, ye ubọ ukpep. “Nte Mmeben̄e Idem Ndidọ Ndọ?” edi ibuotikọ oro n̄kparawa owo mîdiyomke nditaba. Mme ete ye eka ẹkpenyene nditịm nnọ n̄kpan̄utọn̄ ke “Mme Ete ye Eka Ẹmi Ẹkopde Inemesịt Ẹban̄a Nditọ Mmọ.” Ẹdiberi ndutịm uwemeyo ye utịn̄ikọ oro, “Ubọ Ukpep—Da Enye Toro Jehovah.” Se ẹnemede ẹkpenyene ndin̄wam mme uyen ndinam n̄kpọ uforo uforo ke ufọkn̄wed.
Ndutịm usenubọk Saturday eyesịne baptism, ndien ifet eyedu ọnọ mbon oro ẹdotde ndina baptism. Ke uwemeyo ẹyenọ in̄wan̄în̄wan̄ utịn̄ikọ ke nte Satan toto ke ini edem adade udọn̄ idan̄ nditap mme owo. N̄ko, ẹyenọ okopodudu utịn̄ikọ oro, “Ẹkpeme Ẹbiọn̄ọ Mme Afia Devil.” Ẹyeberi ndutịm usen oro ye akpan utịn̄ikọ emi, “Ntak Emi Ubonowo Oyomde Ifiọk Abasi.”
Usenubọk Sunday, nneme emi ibuotikọ ọdọhọde “Idara Idara Mme Anditoro ke Utịt Editịm N̄kpọ Emi” ediwụk ntịn̄enyịn ke mme n̄kpọntịbe oro ẹdinyen̄ede ererimbot emi odude nnyịn nnennen ke iso. Enye eyesọn̄ọ etịn̄ aban̄a nte edide usọp usọp n̄kpọ ndifehe nyom ubọhọ mbemiso “akwa ukụt” oro Jesus Christ eketịn̄de aban̄a ọtọn̄ọde, nte ẹwetde ke Matthew 24:21.
Ẹyeberi ndutịm usenubọk Sunday ye akpan drama oro, “Ndikpono Mmọ Oro Ẹdotde ke Mme Isua Usọn̄ Mmọ.” Ekem, ke uwemeyo, ẹyenọ utịn̄ikọ an̄wa, “Ẹtoro Nsinsi Edidem!” Emi eyesio akpan n̄kpọ owụt ke mbono oro.
Nam ndutịm idahaemi ndidụk. Man ọfiọk ebiet emi ekperede ufọk fo akan, ka Ufọkmbono Obio Ubọn̄ eke Mme Ntiense Jehovah ke n̄kann̄kụk mbufo, mîdịghe wet mme andimịn̄ magazine emi. Kpukpru adres itie mbono ke Nigeria ẹma ẹdu ke nsiondi Enyọn̄-Ukpeme eke May 1, 1995.