Afo Uduyomke Nditaba Enye!
NDITABA nso? Mbono District “Mme Isụn̄utom Emem Abasi” eke Mme Ntiense Jehovah emi asan̄ade ekpere usọp usọp! Ke ata ediwak ebiet mbono emi editọn̄ọ ke n̄kanika ebe usụkkiet ke usenubọk Friday ye ndutịm ikwọ. Ke ama akakpan̄ utọn̄ okop mme ndụn̄ọde oro ẹsọn̄ọde mbuọtidem ke ikpehe oro ọdọhọde “Ndikop Nto Ifịk Ifịk Mme Anditan̄a Emem,” afo eyedara ọnọ-nsịnudọn̄ ibuotikọ oro “Nso ke Abasi Oyom Oto Nnyịn?”
Akpan n̄kpọ udọn̄ ke uwemeyo Friday edidi edemede-owo-udọn̄ utịn̄ikọ ibuotikọ mbono oro “Udeme Nnyịn nte Mme Isụn̄utom Emem Abasi.” Ekem ikpehe oro “Ndin̄wam Mbon En̄wen Ẹkpep Se Abasi Oyomde” ọyọnọ mme ekikere aban̄a ndinọ mbufa owo ukpep. Ekemini nneme oro “Ẹkpeme Ẹbiọn̄ọ Mme Ndedịbe Afia Unọ Idem Inemesịt” editiene emi. Ndutịm Friday editre ye mme utịn̄ikọ ẹmi “Ẹbiọn̄ọ Devil—Ẹkûyọ Ndomoidem” ye “Ndisọn̄ọ Mmụm Akpanikọ Ikọ Abasi N̄kama.”
Ndutịm usenubọk Saturday eyedori nsọn̄uyo ke nte utom edinam mbet edide akpan n̄kpọ ke nneme oro enyenede ikpehe ita emi ọdọhọde “Mme Isụn̄utom Ẹdade Eti Mbụk Emem Ẹdi.” Ẹyeberi ikpehe emi ye mme nneme ẹdọhọde “Edinọ ke Inemesịt ke Esop Jehovah” ye “Uwem ye Emem Ebe ke Uyakidem Nnọ ye Baptism,” ke emi okụrede ifet eyedu ọnọ mbufa mbet ndina baptism.
Utịn̄ikọ uwemeyo Saturday emi ọdọhọde “Kere Ban̄a Ekikere Jehovah ke Mme N̄kpọ” ọyọbọrọ mme utọ mbụme nte ‘Ndi mme Christian ẹtiene ẹbuana ke utom edibahade mfịn?’ ye ‘Nso idi ekikere Bible kaban̄a ubiereikpe n̄kpa?’ Afo n̄ko eyedara inem inem nneme oro enyenede ikpehe iba emi ọdọhọde “Abasi Emem Ese Aban̄a Fi” ndien akpan akpan akpatre utịn̄ikọ oro “Ẹbịne Emem Abasi ke Uwem Ubon.”
Ndutịm usenubọk Sunday eyesịne nneme oro enyenede ikpehe ita emi ọdọhọde “Ndidiọn̄ọ Mme Nnennen Orụk Isụn̄utom” ye utịn̄ikọ oro “Kpan̄ Utọn̄ Nọ Nyụn̄ Nam Ikọ Abasi.” Ẹyeberi ndutịm usenubọk ye drama oro ẹsịnede ọyọhọ ọyọhọ usịnen̄kpọ eset oro edinọde nti ukpepn̄kpọ ke mbụk Bible aban̄ade Gideon Ebiereikpe.
Akpatre ikpehe mbono oro ke uwemeyo Sunday eyesịne utịn̄ikọ an̄wa, emi ibuotikọ edide “Ata Emem ke Akpatre!—Oto Ebiet Ewe?” Ke akpatre, edemede-owo-udọn̄ utịn̄ikọ oro “Ndika Iso Iso nte Mme Isụn̄utom Emem Abasi” eyeda mbono oro osịm utịt.
Nam ndutịm idahaemi ndidụk. Man ọfiọk itie emi ekperede ufọk fo akan, ka Ufọkmbono Obio Ubọn̄ eke Mme Ntiense Jehovah ke n̄kann̄kụk mîdịghe wet mme andimịn̄ magazine emi. Nsiondi Enyọn̄-Ukpeme eke May 1 ama akama mme adres kpukpru itiembono ke Nigeria.