Mme Ntiense Jehovah ke Ofụri Ererimbot​—⁠Colombia

COLOMBIA edi n̄wọrọnda idụt ke South America. Akwa akpa Atlantic ye Pacific ẹkanade mbenesụk obio obot nsụn̄ikan̄ emi ẹkụk. Idaha ufiopeyo emi odude ke n̄kan̄ mbenesụk emi ye unaisọn̄ emi okpụhọde ye mfụt emi odude ke enyọn̄ enyọn̄, etịn̄e Obot Andes oro snow ofụkde.a

Okposụkedi ẹdiọn̄ọde Colombia ke ntak gold ye mme emerald, mme owo ẹdi ata ọsọn̄urua inyene esie. Mfịn, Jehovah ke esịn ubọn̄ ke ufọk esie eke spirit ọyọhọ. Ndiye mme andituak ibuot oro ẹyomde ke ẹbụn̄ọ ẹdụk enye ke ofụri ikpehe isọn̄, esịnede Colombia.​—⁠Haggai 2:7.

Ama Otụk Ikpọ Mbon Mbubehe

Sunday, November 1, 1992, ekedi usen ediyak obufa ọfis n̄kọk itieutom ye ufọkutom umịn̄n̄wed Watch Tower Society ke Facatativá, kilomita 42 ke n̄kan̄ ufọt edem edere ye edem usoputịn Bogotá, nnọ. Edisan̄a nse n̄kọk itieutom emi ama enyene akamba odudu ke idem isenowo. Ke ama akafiak ọnyọn̄ ufọkutom emi enye anamde utom, esenowo kiet ke nduaidem ama akpak mme etubom utom esie ẹka ẹkese esop emi edide ‘utịbe ke ukeme unam utom, ke ndutịm, ye mbuọtidem ẹnyenede ke idem mbonutom.’ Ke udiana edisan̄a nse mmọ, ikpọ mbon mbubehe oro ẹma ẹwụt ata ntotụn̄ọ udọn̄ ẹnyụn̄ ẹbụp ediwak mbụme.

Ikpọ mbon mbubehe ẹmi ẹma ẹyom ndinọ ikpọ esenyịn utom mmọ, mme esenyịn ndutịm utom, ye mme etubom utom​—⁠ke akpanikọ, kpukpru mme anamutom mmọ⁠—​ẹka ẹkesan̄a ẹse. Kpukpru urua, mmọ ẹyediomo mme anamutom ọtọn̄ọde ke 15 osịm 25 ndika n̄kasan̄a nse tutu kpukpru mme anamutom 1,300 ẹkeme ndikụt utọ ukeme utịm utom oro.

Mme anamutom mmọ ke mme itie ikie ẹma ẹka ẹkesan̄a ẹse mme ufọkutom n̄kọk itieutom emi ẹnyụn̄ ẹse video oro Jehovah’s Witnesses​—⁠The Organization Behind the Name. Ke edide se udomo esop emi ye udomo utom edikwọrọ Obio Ubọn̄ otụkde, mmọ ẹma ẹkop n̄kpaidem ẹban̄a ikpọ ukwakutom oro ẹdade ẹnam utom N̄ka. Ke ẹkpọn̄de, ẹma ẹkop ediwak owo ẹdọhọde ke etie mmimọ ke idem nte ‘ikọkpọn̄ Paradise ifiak ika ererimbot ndutịme.’

Akpanikọ Osịm Kpukpru Orụk Owo

Ẹda eti mbụk ẹsịm kpukpru orụk owo. (1 Timothy 2:​3, 4) Ke uwụtn̄kpọ, akani otịm ikwọ ye adaiso otu ikwọ ata n̄kpọsọn̄ n̄kukwak rọk ama onyịme akpanikọ Bible, anam mme ukpụhọde ke uwem esie, ndien ke mîbịghike akabade edi asiakusụn̄ ofụri ini. Nte ini akade ẹma ẹmek enye asan̄autom unamutom. Ekese owo emi ẹkedide mme andibuana ke mme n̄ka ukpụhọ ukara ẹmekpep ndikọn̄ mbuọtidem ye idotenyịn mmọ ke Obio Ubọn̄ Jehovah. Mmọ ke ẹbuana ifịk ifịk idahaemi ke ndikwọrọ etop emem emem obufa ererimbot.

Mme enyene mbumehe uda n̄kpọsọn̄ ibọk ye mme anyam n̄kpọsọn̄ ibọk oro mîkemke ye ibet ẹmewọn̄ọde n̄ko ẹbịne akpanikọ. Akparawa kiet emi edide Ntiense idahaemi ama ese enyịn aban̄a in̄wan̄ ẹtọde n̄kpọsọn̄ ibọk ye itie ubuak ibọk cocaine ke akai ke isua ition mbemiso enye ekekịbede ọbọhọ utọ uwem oro. Enye omokụt inemesịt ke edikpep ye edida mme edumbet Bible nsịn ke edinam. Ke ẹdide se ukpepn̄kpọ Bible esịt akpanikọ onụkde, mme owotowo oro ẹbiomde ikpe, ẹdude ke ufọk-n̄kpọkọbi ke ẹbọn̄ akam esịt akpanikọ ẹte Jehovah efen mme idiọkn̄kpọ mmimọ onyụn̄ onyịme mmimọ nte mme asan̄autom esie.

Ntre ke edi nte ke mme owo eke kpukpru orụk ke ẹnam n̄kpọ ẹban̄a etop Obio Ubọn̄. Ke Colombia, ukem nte edide ke mme ebiet efen, Jehovah ke ntem ke esịn ubọn̄ ke ufọk esie ọyọhọ.

[Mme Ikọ idakisọn̄]

[Ekebe ke page 8]

IDAHA IDỤT ORO

Isua Utom 1993

N̄WAKN̄KAN IBAT ẸMI ẸNỌDE IKỌ NTIENSE: 60,854

MBAHADE: Ntiense 1 ke owo 558

MME ANDIDỤK EDITI: 249,271

UKEM MBAHADE MME ASUANETOP ẸDIDE MME ASIAKUSỤN̄: 8,487

UKEM MBAHADE UKPEPN̄KPỌ BIBLE: 100,927

IBAT ẸKENADE BAPTISM: 5,183

IBAT ESOP: 751

ỌFIS N̄KỌK ITIEUTOM: FACATATIVÁ

[Ndise ke page 9]

Mme anamutom ke ọfis n̄kọk itieutom ye mme isụn̄utom ke 1956

[Ndise ke page 9]

Ndise ọfis n̄kọk itieutom ẹdade ke enyọn̄ ẹsio