‘Mme Edinam Esie Ẹtiene Enye’

KE N̄KANIKA 8:50 usenubọk ke Thursday, July 28, 1994, George D. Gangas ama okụre utom esie eke isọn̄. Enye ekedi isua 98 ke emana. Nte kiet ke otu mbon oro ẹyetde aran, George Gangas ekedi owo Otu Ukara eke Mme Ntiense Jehovah ọtọn̄ọde ke October 15, 1971.

Kpukpru owo ẹmi ẹkemehede ye Brọda Gangas ọkpọkpọ ẹma ẹfiọk ẹban̄a ima oro enye akamade edinen ido ye usua oro enye akasuade idiọkido. Mmọ ẹtịm ẹti usụn̄ oro enye ekesitịn̄de ndien ndien aban̄a Satan nte akwa, ubi ubi, obukpo, idiọk, ye ndek ndek osu nsu. Ke edide isio, enye ama esitịn̄ aban̄a Jehovah nte ima ima, ọfọnido, atua owo mbọm, okop mbọm, ye Ete oro ekerede aban̄a. Ediwak owo n̄ko ẹti nte enye ekesimade ndibụp mme mbụme Bible. Ke nneme ekededi, enye ikesitreke ndibụp mme mbụme​—⁠ndusụk mmọ ẹkesidi mmemmem, ndusụk mmọ ẹma ẹsinen̄ede ẹsọn̄. Ke akpanikọ, enye ama ama akpanikọ Bible.

Brọda Gangas akana baptism ke July 15, 1921. Enye ọkọtọn̄ọ ubọkọkọ esie ke utom ukwọrọikọ uyọhọ ini (usiakusụn̄) ke March 1928. Ntem, enye okodu ke utom uyọhọ ini ke ofụri isua 66. Enye akakabade edi owo utom ibuot itieutom Brooklyn eke Watch Tower Bible and Tract Society ke October 31, 1928.

Mbụk eyouwem esie ama odu ke nsiondi Enyọn̄-Ukpeme (Ikọmbakara) eke October 15, 1966. Enye etịn̄ aban̄a ataata owo Abasi eke spirit. Ke ibuotikọ oro, enye ama etịn̄ inem inem ikọ emi etienede mi: “Ami mmama uwem nnyụn̄ nyom nditọete mi ẹnyene uwem. Ami n̄kere, ukem nte apostle Paul, nte ke kpukpru n̄kpọ eken ẹdi ‘ntakurua, man mbọ akan ifiọk Christ Jesus.’”​—⁠Philippi 3:8.

Brọda Gangas ama owụt ke edinam esie nte ke imọ ke akpanikọ imama uwem, ndien enye ke ọkpọsọn̄ udọn̄ ama abuana “ifiọk Christ Jesus” esie ye mbon efen. Ẹyetaba enye, edi nnyịn idara didie ntem nte ke enye ọmọbọ utịp esie eke heaven kemi! Kemi, ‘enye eyeduọk odudu ke utom esie, koro mme edinam esie ẹtiene enye.’​—⁠Ediyarade 14:13, New International Version.