Mme Ntiense Jehovah ke Ofụri Ererimbot—Puerto Rico
EDIYE, ufiop ufiop isuo Puerto Rico odu ke ufọt Inyan̄ Caribbean ye Inyan̄ibom Atlantic. Christopher Columbus akabat enye ọnọ Spain ke 1493 onyụn̄ osio enye enyịn̄ San Juan Bautista adian John Andinịm Owo Baptism. Ke anyanini ẹkekot n̄kponn̄kan akwa obio esie Puerto Rico, m̀mê “Obio Mbehe Uforo.” Nte ini akade, enyịn̄ emi ama akabade enyene ofụri isuo oro, ke adan̄aemi ẹkekotde akwa obio oro San Juan.
Puerto Rico edi obio mbehe uforo ke ediwak usụn̄. Ẹma ẹmen ekese gold mi ẹwọrọ ke ntọn̄ọ ntọn̄ọ isua ukara Spain. Isuo emi idahaemi esinọ mbọkọk, kọfi, ukọm, ye mme mfri oro ẹdude ke ubon sokoro ẹka idụt efen, okposụkedi usiakifia unam n̄kpọurua ye eke mme utom eken ẹtịpde ekese ẹsịn ke ndutịm uforo mfịn. Nte ededi, Puerto Rico edi obio mbehe uforo ke usụn̄ifiọk oro otịmde edi akpan n̄kpọ akan oro.
Ẹketọn̄ọ ndikwọrọ eti mbụk Obio Ubọn̄ Abasi mi ke iduọk isua 1930. Mfịn, se iwakde ikan mme asuanetop eti mbụk 25,000 ẹdu ke Puerto Rico. Ke 1993 ibat mbonutom ke n̄kọk itieutom Watch Tower Society emi ama ọdọk oto 23 osịm se iwakde ikan 100. Ama oyom ẹmenede ibat emi man n̄kọk itieutom emi ekeme ndise enyịn ke edikabade mme n̄wed Bible nsịn ke Spanish, anamde mme utọ n̄wed oro ẹdu ẹnọ n̄kpọ nte owo 350,000,000 ẹmi ẹsemde Spanish ke ofụri ererimbot.
Obufa Efakutom
Ọfis n̄kọk itieutom oro ọtọt n̄ko ete: “Obufa efakutom emeberede ke Puerto Rico koro nnyịn ke ikesịn ukeme ndida etop Obio Ubọn̄ nsọk mme inan. Eyenete an̄wan kiet obụk ifiọkutom etienede mi: ‘Ami n̄kanam utom ke otu mme inan nnyụn̄ n̄waha ntiene n̄wan kiet enyenede n̄kpri nditọ iba. Ke ini enye ọkọfiọkde ete ke ami ndi Ntiense, enye ama esịn mi usọp usọp sia ebe esie, emi n̄ko ekedide inan, mîkamaha Mme Ntiense Jehovah.
“‘Ọfiọn̄ ifan̄ ke ukperedem n̄wan emi ama aka ekese ufan esie oro ekekpepde Bible ye Mme Ntiense. Enye ama etiene abuana onyụn̄ okop inem etieti. Mma mfiak n̄waha ntiene n̄wan oro, ndien enye ama afiak etịn̄ ete ke ebe imọ imaha Mme Ntiense. Nte ededi, enye ama oyom ndifiọk Bible ama onyụn̄ akpa mba aban̄a ufọkabasi esie sia mmọ mîkekpepke baba n̄kpọ kiet. Nnyịn ima itọn̄ọ ndikpep n̄kpọ, ikamade tract. Usen kiet enye ama ọdọhọ ete mfiak ndi ke Saturday koro ebe imọ eyedu do. Mma mbụp nte: “Edi enye imaha nnyịn, ndi ama?” Enye ama ọbọrọ ete: “Enye oyom ndifiọk se kpukpru emi ọwọrọde.”
“‘Ke edem usen mmọ mbiba ẹma ẹkọn̄ usụn̄ufọk mi! Sia ebe esie ekenyenede ediwak mbụme, mma nnọ mmọ ikot ndidụk mme mbonoesop nnyịn oro ẹnịmde ẹnọ mme inan. Enye ama ebem mi iso osịm do inyụn̄ itabake mbonoesop ndomokiet tọn̄ọde ke ini oro. Enye ke ọkwọrọ ikọ ọnọ mme inan eken, ama odụk mbono kiet, ndien ke odori enyịn ndina baptism.’”
Ntọt n̄kọk itieutom oro akaiso ete: “Ke mbono district nnyịn isua emi, ẹma ẹnam ofụri edinam ke usem oro ẹdade idiọn̄ọ ẹtịn̄ ikọ, ntre ediwak mbon inan ẹma ẹdu ke otu mme andidụk ye mme ubon mmọ. Ata ini inemesịt ekedi ke ini akpatre utịn̄ikọ ke ini etịn̄ikọ eketịn̄de utom oro ẹnamde ke otu mme inan okonyụn̄ ọdọhọde ete ke n̄kpọ nte owo 70 ẹma ẹdu do. Ẹma ẹkwak ubọk ọkpọsọn̄ ọkpọsọn̄, edi, nte etịn̄ikọ okokụtde, mme inan oro ikokopke. Ntre ke ọdọhọde mme inan oro ẹse otuowo, etịn̄ikọ ama afiak obụp mbụme oro, ‘Nte mbufo ẹmenem esịt ndinyene nditọete mbufo ẹmi ẹdide mme inan mi ke otu mbufo?’ onyụn̄ ọdọhọ otuowo ete ẹkwak ubọk ebe ke ndifụn̄ ubọk mbiba. Ekedi utịben̄kpọ ndikụt nditọete iren ye iban 11,000 ẹkwakde ubọk ebe ke ndifụn̄ ubọk mmọ. Nditọete nnyịn iren ye iban ẹdide inan ẹma ẹyọhọ ye idatesịt onyụn̄ otụk mmọ ke idem nte ke idi ubak akwa otu nditọete. Mmọn̄eyet idatesịt ama asiaha ediwak owo ke enyịn.”
Nte Mme Ntiense Jehovah ẹbuanade ke utom idọk ke Puerto Rico, eyịghe idụhe nte ke enye eyekaiso edi obio mbehe uforo. “Mme erọn̄” Abasi, ẹmi enye okotde “se mme idụt ẹyomde,” ẹyekaiso ẹdụk ẹdi man otodo ẹsịn ubọn̄ ẹyọhọ ufọk Jehovah.—John 10:16; Haggai 2:7.
[Ekebe ke page 9]
IDAHA IDỤT ORO:
Isua Utom 1994
N̄WAKN̄KAN IBAT ẸMI ẸNỌDE IKỌ NTIENSE: 25,428
MBAHADE: Ntiense 1 ke owo 139
MME ANDIDỤK EDITI: 60,252
UKEM MBAHADE MME ASUANETOP ẸDIDE MME ASIAKUSỤN̄: 2,329
UKEM MBAHADE UKPEPN̄KPỌ BIBLE: 19,012
IBAT ẸKENADE BAPTISM: 919
IBAT ESOP: 312
ỌFIS N̄KỌK ITIEUTOM: GUAYNABO