Idatesịt Odu Ọnọ Mbon Oro Ẹkụtde Akpanikọ
OWO Finland ama okụt n̄wed oro The Divine Plan of the Ages ke itie ubonn̄kpọ ke ubet enyọn̄ esie. Enye ama ọtọn̄ọ ndikot enye ke ebe oro, ndien ikebịghike enye ama etịn̄ ye idemesie ete, ‘Akpanikọ edi emi; akpanikọ edi emi.’ Ke otode itie ubonn̄kpọ ke ubet enyọn̄ esie osụhọde, enye ama asian n̄wan esie ete, “Mmokụt ido ukpono akpanikọ.”
Ifiọk n̄kpọntịbe emi idịghe ọsọ n̄kpọ ke usụn̄ oro eren emi okokụtde akpanikọ, edi ediwak ke otu Mme Ntiense Jehovah ẹkeme nditịn̄ mban̄a ukem usụn̄ edinam emi. Kpukpru mmọ ẹkeme nditịn̄ nnọ fi idatesịt oro ẹsinyenede ke ndikụt akpanikọ. Mme ifiọkutom ẹtienede mi ẹsọn̄ọ emi.
Ukpepn̄kpọ Bible Ẹdide Akpanikọ Ẹda Idatesịt Ẹdi
Margarita Königer ọkọkọri okpon ke Munich, Germany, ke ini Ekọn̄ Ererimbot II. Ediduọk bọmb ye edifọp mme ufọk ẹkedi ndise oro ẹkụtde ndien ndien. Eyeneka esie eren ama akpa ke ekọn̄ oro. Nte enye ekesidụkde ederi ke ufọkabasi Catholic, enye ama esikop ẹbọn̄de akam ẹban̄a mbonekọn̄ Germany ye adausụn̄ oro, Hitler. Ke ekọn̄ ama okokụre, n̄wan emi ama ọbọ enọ uka n̄wed mfọn ndika akamba ufọkn̄wed ke United States nte ubak ndutịm edinọ nditọ ufọkn̄wed ẹka n̄wed ke idụt efen. Enye ama okụt nte mme owo ẹketiede ufan ufan ye enye, ntre enye ama eyịk m̀mê nso ikonụk mme owo, emi ndammana udọn̄ mmọ edide ndidu ke emem, ndinana mbuọtidem nnyụn̄ nsua kiet eken ke ini ekọn̄. Ke afiakde ọnyọn̄ Munich, enye ama osobo ye Mme Ntiense Jehovah, ndien ebede ke ndikpep Bible ye mmọ, enye ama enyene ibọrọ ọnọ mme mbụme esie. Enye ọdọhọ ete: “Ẹma ẹda Bible ẹwụt mi nte ke odudu mme idiọk spirit ẹbuana . . . Bible okot mmọ ‘mme andikara ererimbot,’ ndien, ke akpanikọ, etịn̄ ete ke Satan ‘ke abian̄a ofụri ererimbot.’ . . . Ke ẹbierede ẹto ndiọi edinam, unana uten̄e Abasi eke mme idụt ye mme owo, ibọrọ emi owụt ifiọk onyụn̄ ọnọ uyụhọ didie ntem!”—Ephesus 6:12; Ediyarade 12:9.
Margarita akaiso ete: “Ndikpep mban̄a ndutịm Abasi kaban̄a edikọk mme mfịna ke isọn̄ ama anam mi n̄kop idatesịt akamba akamba. Baba, emi idibehe ke ekikere m̀mê ukara owo, nte mme ọfiọkn̄wed ererimbot ẹkerede. Utu ke oro, Bible owụt ete ke obufa ukara eke heaven edise aban̄a mme mbubehe ke isọn̄. . . . Jesus Christ ama ekpep mme anditiene enye ndibọn̄ akam nte: ‘Yak obio ubọn̄ fo edi.’ . . . Mma ntọn̄ọ ndikụt nte ke obio ubọn̄ emi edi ata ukara ye nte ke ebede ke enye ikpọn̄ ke ẹdinyene ata emem ke ofụri ererimbot.” Ke se ikperede ndisịm isua 30, Margarita amanam utom nte isụn̄utom ke n̄kpọ nte idụt ition ke Africa—adade akpatre isua 19 ẹbede nditan̄a akpanikọ nnọ mme osụhọde idem mme owo ke Ouagadougou, Burkina Faso.
Ifiọkutom Margarita idịghe esen n̄kpọ. Ediwak owo ẹsinam n̄kpọ ke ukem in̄wan̄în̄wan̄ usụn̄ oro ke ini mmọ ẹkụtde nte mme ọkwọrọ ederi Christendom ke edem mbiba ẹmi ẹn̄wanade ekọn̄ ẹbọn̄de akam ẹnọ Abasi ẹyom edikan. Mbon esịt akpanikọ ẹkụt nte ke eti ibuot odu ke se Bible anamde an̄wan̄a nte ke Abasi inyeneke ubọk ke mme ekọn̄ owo edi nte ke mmọ ẹtịbe koro ‘ofụri ererimbot esịnede ke ubọk andidiọk.’ Mbon oro ẹyomde akpanikọ mi ẹkpep nte ke mme ata Christian inyeneke ndidi “eke ererimbot” edi ẹnyene ndida san̄asan̄a ke mme mbubehe esie. Ke ẹdiọn̄ọde ẹte ke Mme Ntiense Jehovah ẹda utọ idaha oro, mbufa mbon ẹmi ẹnyenede udọn̄ mi ẹnịm nte ke mmimọ imokụt akpanikọ. Mme utọ mbon oro ẹsikọri ke idotenyịn ye idatesịt nte mmọ ẹkọde ntatara ifiọk kaban̄a ntak emi Abasi ayakde idiọkido akaiso ye nte enye edidade emem ye ndinen idaha edi ke isọn̄ ebe ke Obio Ubọn̄ esie.—1 John 5:19; John 17:16; Matthew 6:9, 10.
Mme Ata Edumbet Bible Ẹda Idatesịt Edi
Daniel Rosero otode Ecuador ekekere ete ke uwem inyeneke se ọwọrọde, ntre enye ama ọtọn̄ọ ndin̄wọn̄ mmịn. Ufọkabasi oro enye okodụkde ama ekpep enye nte ke n̄kukụre se enye ekemede ndidori enyịn mban̄a ekedi n̄kpa ye ikan̄ ikan̄ hell. Enye ama ọbọrọ ete, “Ikan̄ eyeta mi, ntre yak n̄n̄wọn̄ mmịn!” Owo itiaita ẹkedu ke ubon esie oro enye mîkotịmke n̄kpọ inọ, ndien enye ama esin̄wana ye Delia, n̄wan esie, kpukpru ini. Ukpụhọde ama ada itie ke usenubọk Sunday kiet ke ini Mme Ntiense Jehovah ẹkekade ẹkese mmọ ẹnyụn̄ ẹtọn̄ọde ukpepn̄kpọ Bible. Akpa ini emi Daniel okodụkde mbono circuit eke Mme Ntiense Jehovah, enye ama ọfiọk ete ke imọ imokụt akpanikọ. Enye etịn̄ ete: “Uten̄e esop emi ama ofụk mi. Mme owo, ata ediwak owo, ẹma ẹdu ọtọkiet ke emem. Afo emekeme ndikụt ima ke otu emi. Baba owo kiet in̄wọn̄ke sika. Owo itịn̄ke idiọk ikọ. . . . Mmeti nte n̄kekerede nte, ‘Akpanikọ edi emi!’ Ikedịghe ndịk n̄kpa m̀mê ndịk kaban̄a utịt ererimbot okonụk mi. Ekedi edisana idaha esop emi.”
Ofụri ubon Rosero ẹma ẹkabade ẹdi Mme Ntiense Jehovah. Uwem ubon mmọ ye idaha ndutịm uforo mmọ ẹma ẹkpụhọde nte mmọ ẹkedade mme edumbet Bible ẹsịn ke edinam. Delia Rosero etịn̄ ete: “Afo ọmọfiọk ete ke kpukpru ukpụhọde ke uwem mi oto akpanikọ Bible. Anie ọfiọk ebiet nditọ mi ẹkpedude ke mîkpedịghe Ikọ Abasi? Kpukpru mmọ mbitiaba ẹna baptism ẹnyụn̄ ẹnyene nsọn̄ọnda. Akpanikọ omosụn̄ọ ke ọyọhọ obufa uwem, obufa inemesịt, ọnọ mi.”
Ifiọk n̄kpọntịbe aban̄ade ubon Rosero idịghe esen n̄kpọ. Ediwak owo ke eyo nnyịn ẹnyene editịmede esịt ẹto mme mfịna. Ntak kiet edi nte ke mme owo ke ofụri ofụri ikponoke aba mme idaha ido uwem oro Bible onịmde, nte ẹkekponode ke eset. Ata ediwak ido ukpono ẹtiene usụn̄ edinam emi, edide ke enyịn̄ editua mbọm mîdịghe koro mmọ ẹkerede ẹte ke nte ini okpụhọrede anam n̄kani ido uwem inyeneke ufọn aba. Ntre, ukem nte mbon eken, ẹma ẹyak ubon Rosero ẹyo ye unana ndausụn̄ Bible. Nte ededi, ke ini utọ mbon nsụhọdeidem oro ẹdide ẹdifiọk ekikere Abasi kaban̄a ido uwem ye uwem ubon, mmọ ẹsida se mmọ ẹkpepde ẹsịn ke edinam ye unana ubiatini. Ọkọn̄ọde ke mbụk mmọ nnyịn imekeme ndikụt nti utịp ẹmi ẹsụn̄ọde ẹto edinam ntre.
Ẹnyene Ndikọri Idatesịt
Nte ededi, emi iwọrọke ite ke edidi Christian edi idaha oro etiede inem inem kpukpru ini. Nte an̄wan̄ade, mme mfịna oro mme owo ke ofụri ofụri ẹsobode, utọ nte unana utom, udọn̄ọ, ye n̄kpa, ẹtụk mme Christian n̄ko. Mme Christian n̄ko ẹnyene ndikaiso n̄n̄wana ye unana mfọnmma ye mme mmeme idemmọ. Mbụk Bible ọdọhọ ete ke Lot ama “[ofụhọ] aban̄a obukpo ido mme anamidiọk” ke obio Sodom. Mme anam-akpanikọ Christian ikemeke ndifep ndinyene ukem ntụk oro ke ini ẹkụtde idiọk idaha akade iso.—2 Peter 2:7, 8.
Nte ededi, mbon oro ẹkụtde akpanikọ ẹbọ ufọn. Ke uwụtn̄kpọ, andinịm ke akpanikọ oro ofụhọde aban̄a owo oro akpade inyeneke “[ndifụhọ] nte mmọ eken eke mînyeneke idotenyịn.” Mfụhọ esie ididịghe ke nsinsi. Emi edi akpanikọ aban̄a mme mfịna eken n̄ko. Owo oro okụtde akpanikọ ọfiọk ete ke nsọn̄ọn̄kpọ odude idahaemi edi ke ibio ini kpọt. Idotenyịn anam ẹkeme ndiyọ ke idak nsọn̄ọn̄kpọ. Usụn̄uwem oro adade ukem ukem edi se in̄wamde n̄ko.—1 Thessalonica 4:13.
Paul ama ọnọ mme Christian item emi ete: “Ẹdat esịt ke Ọbọn̄ kpukpru ini; nyetọn̄ọ ntak ndọhọ, Ẹdat esịt.” (Philippi 4:4) Emi owụt ete ke adan̄aemi kpukpru nnyịn ikemede ndidat esịt, imekeme nditre ndinyene enye n̄ko. Editịmede esịt eke akani editịm n̄kpọ emi ekeme ndidi n̄kpọ ubiọn̄ọ. Ke adianade do, Bible etịn̄ ọnọ nnyịn ete ke nnyịn inyene ndikọri idatesịt, kiet ke otu mbun̄wụm spirit Abasi. (Galatia 5:22) Edieke afo akade iso ndibọ ifiọk akpanikọ nnyụn̄ nti idemfo mban̄a mme uforo eke spirit oro enye akadade edi onyụn̄ osụk adade edi, idatesịt fo idisụhọkede. Enye eyedọdiọn̄ okop odudu akan nte nnyịn isan̄ade ikpere ini emi Abasi ‘edikwọhọrede kpukpru mmọn̄eyet’ ke enyịn mme owo efep ye ke ini “eseme ye ntuan̄a ye ubiak” mîdidụhe aba.—Ediyarade 21:4.
[Ndise ke page 8]
Esinem ediwak owo ndikụt idatesịt ye eti ndutịm oro odude ke mme mbono Mme Ntiense Jehovah