Mme Mbụme Ẹtode Mme Andikot
Nso ke ikọ mbet oro James ọkọwọrọ ke ini enye ọkọdọhọde ete: “Nditọete mi, ediwak ke otu mbufo ẹkûdi mme anditeme sia ẹfiọkde ẹte, ikpe nnyịn ẹmi idide mme anditeme eyesọn̄ akan”?—James 3:1.
James ke akpanikọ ikakpanke mme Christian ndikpep mbon en̄wen akpanikọ. Ke Matthew 28:19, 20, Jesus ama ọnọ mme mbet esie ewụhọ ete “ẹkenam kpukpru mme idụt ẹdi mbet . . . ẹkpep mmọ ẹnam kpukpru n̄kpọ eke n̄ketemede mbufo.” Ntem, kpukpru mme Christian ẹkpenyene ndidi mme andikpep. Apostle Paul ọkọnọ mme Christian ẹkedide mbon Hebrew item koro mmọ mîkedịghe kan̄a mme andikpep. Enye ekewet ete: “Ke ini mbufo ẹkpedide mme anditeme owo efen adan̄aemi, mbufo ẹtọn̄ọ ntak ẹyom owo ekpep mbufo akpa editọn̄ọ ukpepn̄kpọ Abasi.”—Mme Hebrew 5:12.
Nso, ndien, ke James eketịn̄ aban̄a? Enye eketịn̄ otụk mbon oro ẹnyenede san̄asan̄a ifet unọ ukpep ke esop. Ke N̄wed Mbon Ephesus 4:11, nnyịn ikot ite: “Enye [Jesus Christ, kpa Ibuot esop] ọkọnọ ndusụk owo nte mme apostle; onyụn̄ ọnọ ndusụk owo nte mme asiak uduak Abasi, onyụn̄ ọnọ ndusụk owo nte mme ọkwọrọ gospel, onyụn̄ ọnọ ndusụk owo nte mme andikpeme ye mme anditeme.” Mme ifet unọ san̄asan̄a ukpep ẹma ẹdu ke otu mme esop akpa isua ikie nte ẹdude mfịn. Ke uwụtn̄kpọ, Otu Ukara ada ke ibuot “asan̄autom emi anamde akpanikọ, onyụn̄ enyenede ọniọn̄” onyụn̄ enyene san̄asan̄a mbiomo ndise mban̄a unọ ukpep ke esop ofụri ererimbot. (Matthew 24:45) Mme esenyịn oro ẹsan̄ade-san̄a ye mbiowo esop n̄ko ẹnyene san̄asan̄a mbiomo unọ ukpep.
Ndi James ọkọdọhọ Christian iren ẹmi ẹdotde ete ke mmọ ikpenyeneke ndinyịme utom andikpep ke ntak ọkpọsọn̄ ubiomikpe Abasi? N̄wan̄ansa-o. Itie ebiowo edi akwa ifetutom, nte ẹwụtde ke 1 Timothy 3:1, emi ọdọhọde ete: “Edieke owo oyomde ndida idaha ufọk Abasi enye oyom eti utom.” Kiet ke otu n̄kpọ oro ẹyomde man ẹmek owo nte ebiowo esop edi nte ke owo enyene “[ndidot] ndikpep owo n̄kpọ.” (1 Timothy 3:2) James ikanamke ntuaha odu ye mme ikọ Paul eke odudu spirit emi.
Nte ededi, etie nte ke akpa isua ikie E.N., ndusụk owo ẹma ẹnịm idemmọ nte mme andikpep, okposụkedi mmọ mîkodotke owo mîkonyụn̄ imekke mmọ. Eyedi mmọ ẹma ẹkere ke ndusụk uwọrọetop odu ke utom oro, ndien mmọ ẹma ẹyom ndinyene ọkpọkpọ ubọn̄. (Men Mark 12:38-40; 1 Timothy 5:17 domo.) Apostle John ama asiak Diotrephes, emi ‘akamade ndidi ebeiso, edi mînyịmeke ndibọ n̄kpọ ndomokiet eke otode John ye ukpono.’ (3 John 9) Akpa Timothy 1:7 etịn̄ aban̄a ndusụk owo ẹmi ‘ẹkeyomde ndidi mme ekpep ibet edi emi mîkotịmke ifiọk se mmọ ẹdọhọde m̀mê se mmọ ẹsọn̄ọde uyo ẹtịn̄ ẹban̄a.’ Mme ikọ James 3:1 odot akpan akpan ye irenowo ẹmi ẹyomde ndidi mme andikpep edi ẹmi ẹnyenede idiọk uduakesịt. Mme utọ mbon oro ẹkeme ndinọ otuerọn̄ unan idiọk idiọk ẹnyụn̄ ẹkeme nte odotde ndinyene ọkpọsọn̄ ubiomikpe.—Rome 2:17-21; 14:12.
James 3:1 n̄ko edi eti n̄kpọ editi ọnọ mbon oro ẹdotde ẹnyụn̄ ẹnamde utom nte mme andikpep. Sia ẹma ẹkeyak ekese ẹsịn mmọ ke ubọk, ẹyeyom ekese ẹto mmọ. (Luke 12:48) Jesus ọkọdọhọ ete: “Ke usen ikpe mme owo ẹyenọ mbụk ẹban̄a kpukpru ikpîkpu ikọ eke mmọ ẹtịn̄de.” (Matthew 12:36) Emi edi akpanikọ akpan akpan ye mbon oro ikọ mmọ esinyenede odudu, kpa mbiowo oro ẹmekde.
Mbiowo ẹyenam ibat kaban̄a usụn̄ nte mmọ ẹnamde n̄kpọ ye erọn̄ Jehovah. (Mme Hebrew 13:17) Se mmọ ẹtịn̄de otụk uwem. Ntem, ebiowo ekpenyene ndikpeme mbak okûmenede mme ekikere idemesie m̀mê edinam n̄kpọ ye mme erọn̄ ke idiọk usụn̄ nte mme Pharisee ẹkenamde. Ana enye odomo ndiwụt ukem ntotụn̄ọ ima oro Jesus okowụtde. Ke kpukpru idaha unọ ukpep, ndien akpan akpan ke ini abuanade ke mbubehe ikpe, ebiowo ekpenyene nditịm n̄kpeme ikọ esie, itịn̄ke mme ikọ oro mîwụtke usọ m̀mê nditịn̄ mme ekikere idemesie. Ebede ke ndiberi edem ofụri ofụri ke Jehovah, Ikọ esie, ye mme ndausụn̄ esie ebe ke esop esie, ekpemerọn̄ oro eyebọ edidiọn̄ Abasi uwak uwak, idịghe ‘ọkpọsọn̄ ubiomikpe.’