Un̄wana Mmọ Ikenịmeke

KE MME ini Bible, mme anam-akpanikọ Mme Ntiense Jehovah ẹma ẹdu ẹmi ẹkeduọde ẹnyụn̄ ẹsobode mme mfịna. Mmọ ẹma ẹsobo ubiọn̄ọ ye mme in̄wan̄în̄wan̄ edikpu. Edi, mmọ ikakpaha mba ke ntak mmemidem. Ke nditịm ntịn̄, un̄wana mmọ ikenịmeke.

Ke uwụtn̄kpọ, ẹma ẹnọ prọfet Jeremiah utom ndidi prọfet Abasi nnọ ọsọn̄ibuot idụt Judah. Enye ama atan̄a ntọt nsobo Jerusalem oro ekedide. (Jeremiah 1:11-19) Nte utịp, Jeremiah ama enyene ekese mfịna ye mme ekemmọ mbio obio esie, ẹmi ẹkedade enye nte anditan̄a nsobo.

Oku oro Pashhur, akpan etubom ke ufọk Abasi, inikiet ama amia Jeremiah ke ntak se enye eketịn̄de prọfesi aban̄a onyụn̄ esịn enye ke ebuka. Ke se itiede nte iduọ mi, Jeremiah ama ọdọhọ ete: “Ami n̄kabade ndi n̄kpọ eke ẹsakde ofụri usen, kpukpru owo ẹbian̄a mi. Koro toto ke ini oro n̄kọdọhọde, mfiori, nseme afai ye mbụme; koro uyo Jehovah akabade edi se ẹdade ẹsuene mi, ẹnyụn̄ ẹsịn mi ke ndek kpukpru usen.” Ẹma ẹkam ẹnam idem emem prọfet oro okosịm udomo oro ọkọdọhọde ete: “Ndisiakke aba enye [Jehovah], ndinyụn̄ ndọhọke aba ke enyịn̄ esie.”—Jeremiah 20:1, 2, 7-9.

Nte ededi, Jeremiah ikayakke idem inọ mmemidem. Ke etịn̄de “uyo Jehovah,” enye ama atan̄a ete: “Ndien n̄kpọ odu mi ke esịt nte ikan̄ eke asakde, esịne mi ke ọkpọ, ndien n̄n̄wana ndimụm idemmi n̄kama, tutu akak.” (Jeremiah 20:8, 9) Ke enyenede ọkpọsọn̄ uduakesịt nditan̄a mme etop Abasi, edisana spirit ama ọsọn̄ọ Jeremiah idem enye ama onyụn̄ ọyọhọ utom esie.

Apostle Paul n̄ko ama enyene ekese ntak ndikop mmemidem, ke ekpedide enye ama ayak idem ọnọ mmọ. Enye ama ọyọ oto-obot afanikọn̄, ubom ndisịp, ukọbọ, ye umia. Ke adianade do, ‘se itode-to isịm enye ekedi ọkpọsọn̄ ekikere kaban̄a kpukpru esop.’ (2 Corinth 11:23-28) Ih, Paul ekenyene ndiyọ mme mfịna kpukpru usen, ekerede aban̄a mbufa esop ẹmi enye akan̄wamde ẹtọn̄ọ. Akan oro, enye ekedi anana-mfọnmma owo ama onyụn̄ an̄wana ye “n̄kukịm ke obụkidem,” ndusụk edide n̄kịmenyịn. (2 Corinth 12:7; Rome 7:15; Galatia 4:15) Ndusụk owo ẹma ẹsikam ẹtịn̄ n̄kpọ ẹbiat Paul ke edem, ndien enye ama esikop emi.—2 Corinth 10:10.

Edi, Paul ikayakke mmemidem akan enye ubọk. Baba, enye ikedịghe owo enyenede akakan odudu. (2 Corinth 11:29, 30) Nso ikanam ‘ikan̄ esịtidem’ esie akaiso asak? N̄kpọ kiet edi, enye ama enyene mme nsan̄a oro ẹkenọde ibetedem, ndusụk ẹma ẹkam ẹsan̄a ye enye ẹka Rome ke ebiet emi ẹkesịnde enye ke ufọk ukpeme. (Utom 28:14-16) Udiana, apostle oro ekese itie esie ke usụn̄ adade ukem ukem. Mme andikọbọ ye mme andibiọn̄ọ enye ẹkedue, idịghe Paul. Ke utịt utịt uwem esie eke isọn̄, enye ama odụn̄ọde utom ukwọrọikọ esie ke in̄wan̄în̄wan̄ usụn̄ onyụn̄ ọdọhọ ete: “Ẹma ẹnịm anyanya eti ido ẹben̄e mi, emi Ọbọn̄, kpa Edinen Ebiereikpe, edinọde mi ke usen oro.”—2 Timothy 4:8.

Ke akande kpukpru n̄kpọ, Paul ama esika ebịne Jehovah Abasi ke akam kpukpru ini, ndien ‘Ọbọn̄ ama ada enye ke n̄kan̄ onyụn̄ ọsọn̄ọ enye idem.’ (2 Timothy 4:17) Paul ọkọdọhọ ete: “Mmenyene ukeme ndinam kpukpru n̄kpọ ke odudu Andisọn̄ọ mi idem.” (Philippi 4:13) Ndinyene nneme ye Abasi ye ekemmọ mme Christian, adianade ye edinam in̄wan̄în̄wan̄ ndụn̄ọde mban̄a utom ukwọrọikọ esie, ama an̄wam Paul ndikaiso ke utom Jehovah.

Abasi ama ọnọ Paul odudu ndiwet ete: “Ẹyak ikûkpa mba ke edinam eti n̄kpọ; koro ke edikem ini nnyịn iyedọk mbun̄wụm, edieke nnyịn mîyakke idem emem nnyịn.” (Galatia 6:7-9) Ididọk nso? Nsinsi uwem. Ntre, ndien, tie nte Jeremiah, Paul, ye ediwak mme anam-akpanikọ mme ntiense Jehovah eken oro ẹsiakde ke N̄wed Abasi. Ih, tie nte mmọ, kûyak idem unọ mmemidem. Kûnyụn̄ uyak un̄wana fo enịme.—Men Matthew 5:14-16 domo.

[Ndise ke page 25]

Paul ye Jeremiah ikayakke un̄wana mmọ enịme