Ubịnikọt Edinọ Ikọ Ntiense Oro Okụtde Unen Ke Greece

MME NTIENSE JEHOVAH ke anyanini ẹmesobo ubiọn̄ọ ke Greece. Ndusụk bodisi, esop ikpe, ye ikpọ owo ukara ẹmekọbọ Mme Ntiense, ediwak ini ke ntak mfịghe otode mme ọkwọrọ ederi Greek Orthodox. Ndusụk ini ntak ẹsinọde esidi ibet Greece oro akpande edinam owo okpụhọ ido ukpono, ke mme ini en̄wen edisịn oro ọkọn̄ọde ke Bible oro Mme Ntiense ẹsịnde ndika ekọn̄ m̀mê ndibọ mme edikịm iyịp nsịn ke idem.—Isaiah 2:2-5; Utom 15:28, 29.

Ke ndidomo ndinam mme n̄kpọ ẹnen̄ede ẹn̄wan̄a mme andikara oro ẹnyenede esịt akpanikọ ke Greece, n̄kpọ nte Mme Ntiense 200 ẹmi ukara Greece ọdiọn̄ọde nte mme asan̄autom ido ukpono, ọkọrọ ye ndusụk owo ẹmi ukpeibet edide ubọkọkọ mmọ, ẹma ẹbuana ndondo emi ke ubịnikọt eke ofụri idụt oro. Mmọ ẹma ẹnọ ediye uduot ekpri n̄wed oro ẹketịmde san̄asan̄a, oro ẹkotde Jehovah’s Witnesses in Greece, ọkọrọ ye n̄wed oro Jehovah’s Witnesses—Proclaimers of God’s Kingdom. Mmọ n̄ko ẹma ẹnọ mme ekwo n̄wed ẹmi ẹwụtde ẹte ke akpan isọn̄ ndomokiet oro ibet onyịmede idụhe ke ndikọbọ Mme Ntiense Jehovah. Mme Ntiense oro ẹma ẹka ẹbịne mme etubom bodisi, mbọn̄ obio, mme okot ikpe, ye ikpọ owo eken.

Didie ke ẹkenam n̄kpọ? Nti mbụkutom ke mme itie ikie. Kere ban̄a ndusụk uwụtn̄kpọ.

Etubom ke itieutom mme bodisi ke Edem Usoputịn Macedonia ama adara nditọete oro onyụn̄ ọdọhọ ete: “Mmọdiọn̄ọ mbufo ke anyanini, . . . mmonyụn̄ mma unana ndutịme mbufo. . . . Nnyịmeke ye ibet akpande edinam owo okpụhọ ido ukpono, ndien ke ekpedide mmenyene odudu, n̄kpabiat enye mfep.”

Mme etubom ke nsio nsio itieutom mme bodisi ke ediwak ikpọ obio ẹma ẹtịn̄ mme utọ ikọ nte: “Mmotoro mbufo kaban̄a utom n̄kaowo oro mbufo ẹnamde.” “Akananam ikọt mbufo idaha mfịna isọk mme bodisi; mbufo ẹmeyọhọ utom n̄kaowo.” “Nnyịn ke akpanikọ inyeneke mfịna ndomokiet ye mbufo. Nnyịn imokpono mbufo inyụn̄ ima mbufo.”

Ke Piraeus akwa owo kiet ke bodisi mbon ukpeme ama asian nditọete, ye mmọn̄eyet ke enyịn esie, ete ke imọ imọfiọk ndibọn̄ akam nnọ Jehovah Abasi ikotde enye enyịn̄ ebe ke Jesus Christ. Enye ama akam ototịm anam idem akpa Mme Ntiense oro ke ini enye ọkọdọhọde mmọ ete ke imọ imọfiọk ke mmọ ke ẹkedori enyịn ndibọ ndusụk ukọbọ mbemiso Armageddon, ndien ke imọ ima idori enyịn ite ke Abasi eyeda imọ an̄wam mmọ ke ini oro! Enye ama onyịme ikot oro nditọete ẹkenọde ndinyene nneme efen efen ye enye.

Nte Ikpọ Owo Ukara Ẹnamde N̄kpọ

Ọbọn̄ obio kiet ke Thessaly eketịn̄ ntem aban̄a n̄wed Proclaimers ete: “Enye odot ndinyene itie ke itie ubonn̄wed ikpehe ukara n̄kann̄kụk—kpa akpa itie!” Enye ke ntre ama osion̄o mme n̄wed ke itie udori n̄wed oro onyụn̄ emen n̄wed Proclaimers odori do man ẹkeme ndikụt ikpaedem esie.

Ke edere edere Greece ọbọn̄ obio kiet ama adara nditọete oro ufiop ufiop onyụn̄ ọdọhọ ete: “Mbufo ẹdi mfọnn̄kan mme owo ẹmi n̄kpamade ndinyene ke ikpehe ukara n̄kann̄kụk mi.” Ọfọn ido ọbọn̄ obio kiet ke edem edere Euboea ama ọdọhọ nditọete ete: “Ndi akani akwa owoekọn̄. Edi ama edi mbufo—mmama mbufo ata etieti.” Enye ama onyịme ufiop ufiop ye mme akpan n̄kpọ oro Mme Ntiense ẹkenemede. Ke ini mmọ ẹkewụtde enye mme n̄wed oro ẹsatde-sat ke otu n̄wed emi Watch Tower Society emịn̄de, enye ama ọdọhọ ete: “Edieke n̄n̄wọn̄ọde ndikot kpukpru mmọ, ndi mbufo ẹyeyak mmọ ẹnọ mi?” Mmọ ẹma ẹbọrọ ẹte: “Edi ke akpanikọ—mmọ ẹdi okwo!” Enye ama okop inemesịt etieti ikonyụn̄ iyomke nditọete oro ẹnyọn̄.

Ke esịt obio kiet ke Attica, ọbọn̄ obio kiet ke inemesịt ama ọbọ mme n̄wed ẹmi nditọete ẹkenọde onyụn̄ ọdọhọ yak mmọ ẹka iso ẹda mme n̄wed N̄ka ẹsọk imọ. Nte mmọ ẹkeyomde ndinyọn̄, enye ama ọdọhọ mmọ ete: “Mme ebre mbre ukara ẹkpu mme owo ata idiọk idiọk mmọ ẹnyụn̄ ẹyom ata akpanikọ ẹto ebiet en̄wen. Mmonịm nte ke ọtọn̄ọde kemi ke mbufo ẹyenyene ekese utom koro mbufo ẹmenyene akpanikọ.”

Nte Mme Okot Ikpe Ẹnamde N̄kpọ

Nditọete ẹmi ẹkekade ẹbịne udiana akwa okot ikpe ke edere edere Greece ẹma ẹti ẹte: “Mme n̄wed nnyịn ye se iketịn̄de ama otụk enye, ọkọrọ ye mme ukeme oro ikesịnde ndikụt nte ke ikọt nnyịn inanake un̄wam ke ini ẹsobode akpan eneni aban̄ade edikịm iyịp nsịn ke idem. Ke akpatre enye ama ọkọm nnyịn onyụn̄ otoro nnyịn ufiop ufiop ke edibem iso n̄waha nnyụn̄ nnam n̄kpọ an̄wan̄a imọ. Ke ukperedem, nnyịn ima ididiọn̄ọ ite ke isua inan̄ ke mbemiso enye ama okot mme bodisi onyụn̄ ọdọhọ ẹmụm nditọete iba ẹmi ẹkenamde utom an̄wautom.”

Ekpeibet iba ẹdide Mme Ntiense oro ẹkekade ọfis mme okot ikpe ke Athens ẹma ẹkop n̄kpaidem ndikụt akani okot ikpe oro ẹtịmde ẹdiọn̄ọ oro ẹnyụn̄ ẹkponode ke kpukpru ebiet nte asan̄ade ebịne mmọ. Enye ama ada mmọ ọwọn̄ọde ada onyụn̄ asian mmọ ete ke ibet oro akpande edikpụhọ ido ukpono inyeneke isọn̄ omonyụn̄ esịn ndutịme ke ndutịm esop ikpe mbon Greece. Enye ama ọkọm mmọ ubọk ye idatesịt.

Ke edem edere Greece, okot ikpe kiet eketie ata ufan ufan onyụn̄ ọbọ mme n̄wed. Nte enye okokụbọrede mme page n̄wed oro Questions Young People Ask—Answers That Work, idem ama akpa enye ndikụt nsio nsio ibuotikọ ke se isịnede. Enye ọkọdọhọ ete: “Se n̄wed emi enemede, akananam n̄kwe ke ofụri ufọkabasi Orthodox.”

Okot ikpe kiet ke Boeotia ama onyịme ete ke imọ, ke ini edem, ima inọ ewụhọ ite ẹnọ Mme Ntiense edikịm iyịp nsịn ke idem kpa ye atuahade ye uduakesịt mmọ. Edi ke nditọete ẹma ẹkekọk ibuot ye enye ẹban̄a n̄kpọ emi, enye ama ọdọhọ ete: “Tutu amama ndinọhọ utọ ewụhọ oro aba ke ini iso!” Enye ama ebiere ete ke ọfọn ẹka ẹbịne Kọmiti Unyene Nneme ye Mbon Ufọkibọk n̄kann̄kụk eke Mme Ntiense Jehovah man ẹkeme ndidiọn̄ọ kpukpru usọbọ oro ẹkpedade ke itie iyịp. Enye ke idatesịt ama ọbọ n̄wed Young People Ask.

Nte Mme Ese Itie Ubonn̄wed Ẹnamde N̄kpọ

Ẹma ẹneme n̄kpọ emi n̄ko ẹnọ ediwak mme ese itie ubonn̄wed. Ke itie ubonn̄wed kiet ke Athens, enyene ido owo oro esede enyịn ke itie ubonn̄wed ama ọbọ mme n̄wed onyụn̄ ọdọhọ ete: “Ọfọn etieti nte mbufo ẹdade mme n̄wed mbufo ẹsọk nnyịn koro ata ediwak n̄wed oro nnyịn inyenede ke itie ubonn̄wed emi ẹtetịn̄ n̄kpọ ẹbiat mbufo. . . . Oku kiet ama ayat esịt etieti ndikụt mme n̄wed mbufo ke itie ubonn̄wed. . . . Inamke n̄kpọ. Ẹkpenyene ndikop kpukpru ekikere.”

Akwa owo ukara kiet ke itie ubonn̄wed ikpehe ukara n̄kann̄kụk kiet ke Crete, emi ekedide edidiọn̄ọ Mme Ntiense Jehovah ke itienna ekọn̄, ama asian nditọete ete ke Mme Ntiense ndisịn ndibuana ke ekọn̄ ama otụk imọ. Enye ama esika iso obụp idemesie ete, ‘Ntak emi mbon ẹmi ẹkpebọde ufen-e?’ Enye ama ọbọ mme n̄wed oto nditọete oro onyụn̄ etịn̄ ntem aban̄a ubịnikọt mmọ eke ndondo emi: “Mbufo ẹnam ata eti utom ndien ẹkpekenyene ndinam emi ediwak isua ẹmi ẹkebede. . . . Ke Greece ekese asari odu.” Enye ama ọdọhọ yak nditọete oro ẹsọp ẹfiak ẹdise imọ.

Ke ini akpan ubịnikọt emi, nditọete oro ẹma ẹnịm se iwakde ikan n̄wed Proclaimers 1,000, ediye uduot ekpri n̄wed oro Jehovah’s Witnesses in Greece 1,600, ọkọrọ ye mme n̄wed ye mme magazine ke mme itie ikie. Ke ọfọnde akan, mmọ ẹma ẹnyene nneme iso ye iso ye ikpọ owo ukara Greece. Idahaemi idotenyịn mme anam-akpanikọ asan̄autom Jehovah ke Greece ye ke ofụri ererimbot edi nte ke mbon ukara ẹmi ẹnyenede esịt akpanikọ ke Greece ẹyetịm ẹkere ẹban̄a Mme Ntiense Jehovah ye unana asari.