“Kpukpru Nnyịn Ito Ubon Kiet”

KE MME isua ndondo emi usua eke ido ukpono ye eke orụk amatara asuana ke ofụri ererimbot. Asari eke ekpụk emedemede uwotowo, ndutụhọ, ye mme esuene esuene afai eken. Nte ntọt otode Amnesty International ọdọhọde, edibiat mme unen oro owo enyenede ama enyịk se ibede owo miliọn 23 ke ofụri ererimbot ndifehe n̄kpọn̄ ufọk mmọ ke 1994.

Ke Rwanda ikpọn̄, ẹma ẹwot n̄kpọ nte owo 500,000 ndien se iwakde ikan owo 2,000,000 efen ẹma ẹkabade ẹdi mme oyom ubọhọ ke esenidụt ke ntịme ama akasiaha ke ufọt mbon Tutsi ye Hutu. N̄wedmbụk n̄kpọntịbe Belgium oro Le Soir ọtọt ete: “Ẹma ẹnen̄ede ẹkọbọ Mme Ntiense Jehovah ke mmọ ndikesịn ndikama n̄kpọ en̄wan.” Mme Ntiense Jehovah isitieneke ibuana ke en̄wan. Edi, ẹma ẹwot ediwak mmọ ke itie ikie ke afai oro. Emi eti nnyịn mme ikọ oro Jesus eketịn̄de ọnọ mme mbet esie ete: “Edi sia mbufo mîdịghe mbon ererimbot, . . . ererimbot asua mbufo.”—John 15:19.

Ubon Ntiense kiet—Eugène Ntabana, n̄wan esie, ye nditọ iba—ẹkedụn̄ ke ibuot obio, Kigali. Ke ini anamde edida san̄asan̄a Christian an̄wan̄a mme mbọhọidụn̄ esie, Eugène ama esiwak nditịn̄ mban̄a bougainvillea, kpa vine oro esidọkde eto, emi ọkọride ke ikpehe emi eyo ofiopde.—Matthew 22:21.

“Mi ke Kigali,” Eugène esinam an̄wan̄a ete, “bougainvillea esision̄o flawa ẹdide ndatndat, pin̄k pin̄k, ndien ndusụk ini mfia. Edi, kpukpru mmọ ẹto ubon kiet. Kpasụk ntre ke edi ye mme owo. Okposụkedi nnyịn ikemede ndikpụhọde ke orụk, uduot ikpọkidem, m̀mê idaha eke ekpụk, kpukpru nnyịn ito ubon kiet, kpa ekpụk ubonowo.”

Ke ndiọkiso, kpa ye emem emem edu ye edida san̄asan̄a mmọ, otu mbon ntịme emi udọn̄ mmọ ekedide ndiduọk iyịp ẹma ẹwot ubon Ntabana. Kpa ye oro, mmọ ẹkekpa ke edinam akpanikọ. Nnyịn imekeme ndinịm ke akpanikọ nte ke Jehovah Abasi ayanam un̄wọn̄ọ esie kaban̄a utọ mbon oro osu, ndien mmọ ẹyeset man ẹdidụn̄ ke ererimbot emi asari mîdidụhe aba. (Utom 24:15) Adan̄aoro, “ediwak emem ẹyenyụn̄ ẹnem” ubon Ntabana, ọkọrọ ye mmọ eken, “esịt.”—Psalm 37:11.