Ntak Ọnọde Jehovah Enọ?
NTE utịn okosụhọrede ke ekpri obio Sidon eke Zarephath, ebeakpa kiet ama ọwọrọ an̄wa nditan̄ ifia. Enye okoyom ndibara ikan̄ man anam ekpri udia—ekeme ndidi akpatre udia oro enye ye ekpri eyeneren esie ẹdidiade. Enye ama esịn ukeme man enye ye eyeneren esie ẹka iso ẹdu uwem ẹbe anyan ini unana edịm ye akan̄, ndien ama edisịm mfụhọ mfụhọ utịt emi ke akpatre. Mmọ ẹketie biọn̄.
Eren kiet ama awaha aka. Enye ekekere Elijah, ndien ikebịghike ebeakpa oro ama ọfiọk ke enye ekedi prọfet Jehovah. Etie nte enye ama okop n̄kpọ aban̄a Abasi emi. Jehovah ama okpụhọde ye Baal, emi ibak ibak, oburobụt utuakibuot esie ọkọyọhọde Sidon emi ekedide obio esie. Ntre ke ini Elijah ọkọdọhọde enye ọnọ imọ mmọn̄ in̄wọn̄, enye ama ọsọsọp an̄wam. Ndusụk enye ekekere ke ndinam oro ayanam imọ inyene mfọn Jehovah. (Matthew 10:41, 42) Edi ekem Elijah ama eben̄e n̄kpọ efen efen—ekpri udia. Enye ama anam an̄wan̄a ete ke imọ ikenyene esisịt n̄kpọ ndidia ini kiet nte akpatre udia. Edi, Elijah ama eyịre, ọnọde enye nsọn̄ọ nte ke Jehovah ọyọnọ enye udia ke utịbe utịbe usụn̄ tutu ini unana edịm ebe efep. Nso ke enye akanam? Bible ọdọhọ ete: “Ndien n̄wan aka akanam ke uyo Elijah.” (1 Ndidem 17:10-15) Mmemmem ikọ ẹmi etịn̄ aban̄a edinam akwa mbuọtidem—etịmde okpon, ke akpanikọ, tutu Jesus Christ otoro ebeakpa oro ke se ikperede ndisịm tọsịn isua ke ukperedem!—Luke 4:25, 26.
Kpa ye oro, ekeme nditie esen esen nte ke Jehovah okpoyom se ikponde ntre oto n̄wan oro ekenyenede esisịt n̄kpọ ntre. Emi edi ntre akpan akpan ke ini nnyịn ikerede iban̄a akam oro ọwọrọiso owo kiet ọkọbọn̄de inikiet. Edidem David ndibọ mme etịbe mbon nnọ eyen esie Solomon man ada ọbọp temple ama edemede akwa ntatubọk. Ke ibat okụk eyomfịn, mme enọ oro ẹketịpde ẹma ẹsịm ediwak biliọn naira! Nte ededi, David ama ọdọhọ Jehovah ke akam ete: “Ami ndi anie, ikọt mi ẹnyụn̄ ẹdi mme anie, eke nnyịn ikemede nditat ubọk ntem? N̄kọm kpukpru n̄kpọ ẹto fi, nnyịn inyụn̄ inọ fi se itode fi ke ubọk.” (1 Chronicles 29:14) Nte David eketịn̄de, kpukpru n̄kpọ ẹnyene Jehovah. Ntre ini ekededi oro nnyịn inọde n̄kpọ man ẹda ẹnam edisana utuakibuot aka iso, nnyịn n̄kukụre inọ Jehovah n̄kpọ oro ama ekededi esie. (Psalm 50:10) Ntem, mbụme edemede, Ntak emi Jehovah oyomde nnyịn inọ n̄kpọ ke akpa ifet-e?
Akpan Ikpehe Utuakibuot Akpanikọ
Mmem n̄kan ibọrọ edi nte ke toto ke eset Jehovah ama anam edinọ enọ edi ubak edisana utuakibuot. Abel anam-akpanikọ owo oro ama awa ndusụk ke otu ọsọn̄urua ufene esie ọnọ Jehovah. Mme ete-ekpụk oro Noah, Abraham, Isaac, Jacob, ye Job ẹma ẹnam ukem uwa oro.—Genesis 4:4; 8:20; 12:7; 26:25; 31:54; Job 1:5.
Ibet Moses ama ọnọ uyo idem onyụn̄ owụkde nte ẹditịpde etịbe ẹnọ Jehovah. Ke uwụtn̄kpọ, ẹma ẹwụk kpukpru nditọ Israel ẹte ẹnọ ọyọhọ mbak duop, m̀mê ẹnọ mbahade n̄kpọ kiet ke itie duop ke mbun̄wụm in̄wan̄ ye ke udori ufene mmọ. (Numbers 18:25-28) Owo ikọnọhọ ketket ewụhọ ke mme etịbe eken. Ke uwụtn̄kpọ, ẹma ẹyom eyen Israel kiet kiet ọnọ Jehovah akpa mbun̄wụm ufene ye in̄wan̄ esie. (Exodus 22:29, 30; 23:19) Edi, Ibet ama ayak owo kiet kiet ndibiere udomo akpa mbun̄wụm esie emi enye edinọde, enye ama akam ọnọ mfọnn̄kan. Ibet n̄ko ama owụk ete ẹnọ uwa ekọm ye uwa imaesịt, ẹmi ẹkedide ke ata unyịmesịt. (Leviticus 7:15, 16) Jehovah ekesịn udọn̄ ọnọ ikọt esie ndinọ ke udomo oro enye ọkọdiọn̄de mmọ. (Deuteronomy 16:17) Nte ekedide ye edibọp ataya ndien ekem temple, owo kiet kiet ọkọnọ se esịt esie okonụkde enye ndinọ. (Exodus 35:21; 1 Chronicles 29:9) Ke akpanikọ mme utọ etịbe unyịmesịt oro ẹma ẹnen̄ede ẹnem Jehovah esịt!
Ke idak “ibet Christ,” kpukpru enọ ẹkenyene ndidi ke unyịmesịt. (Galatia 6:2; 2 Corinth 9:7) Oro ikọwọrọke ite ke mme anditiene Christ ẹma ẹtre ndinọ enọ m̀mê nte ke mmọ ẹkenọ se isụhọrede ikan. Ekedi ata isio isio! Nte Jesus ye mme apostle esie ẹkekwọrọde ikọ ke Israel, otu iban ẹma ẹsan̄a ye mmọ ẹda inyene idemmọ ẹnam n̄kpọ ẹnọ mmọ. (Luke 8:1-3) Apostle Paul ukem ntre ama ọbọ mme enọ oro ẹken̄wamde enye ke utom isụn̄utom esie, ndien enye ke n̄kan̄ eken ama esịn udọn̄ ọnọ ndusụk esop ẹtịp n̄kpọ ẹnọ mbon oro ẹkedude ke unana. (2 Corinth 8:14; Philippi 1:3-5) Otu ukara ke Jerusalem ama emek irenowo oro ẹkedotde ndikụt nte ke ẹdeme mme n̄kpọ oro ẹketịpde ẹnọ mbon unana. (Utom 6:2-4) Nte an̄wan̄ade, mme akpa Christian ẹkeda nte ke edi ifet mmimọ ndinọ edisana utuakibuot ibetedem ke mme utọ usụn̄ oro.
Kpa ye oro, nnyịn imekeme ndikam n̄kere ntak emi Jehovah anamde edinọ enọ edi ubak utuakibuot esie. Kere ban̄a ntak inan̄.
Ntak Emi Nnyịn Inọde Enọ
Akpa, Jehovah anam edinọ enọ edi ubak utuakibuot akpanikọ koro ndinam ntre edi ke ufọn nnyịn. Emi owụt esịtekọm oro inyenede inọ eti ido Abasi. Ke uwụtn̄kpọ, edieke eyen edepde m̀mê ọnọde ete m̀mê eka n̄kpọ, ntak emi ete m̀mê eka oro esituakde inua imam ye inemesịt? Nte enọ oro ekem ndida nse mban̄a akpan n̄kpọ oro ẹyomde emi ete m̀mê eka mîkpekemeke ndise mban̄a ke usụn̄ efen? Ekeme ndidi ikemke. Utu ke oro, ete m̀mê eka okop inemesịt ndikụt nte eyen ọkọride edu ediwụt esịtekọm ye eke edinọ enọ. Ke ukem ntak oro Jehovah esịn udọn̄ ọnọ nnyịn ndinọ enọ ndien enye esikop inemesịt ke ini nnyịn inamde oro. Emi edi usụn̄ oro nnyịn iwụtde enye ke nnyịn imenen̄ede iwụt esịtekọm iban̄a akpakịp mfọnido ye ntatubọk esie kaban̄a nnyịn. Enye edi andinọ “kpukpru eti edinọ ye kpukpru enọ eke ẹfọnde ẹma,” ntre nnyịn idinanake ntak ndikọm enye tutu amama. (James 1:17) Ke akande kpukpru, Jehovah ama ọnọ edima Eyen esie, ayakde enye akpa man otodo nnyịn ikpodu uwem ke nsinsi. (John 3:16) Nte nnyịn imekeme ndikọm enye nte ekemde tutu amama?
Ọyọhọ iba, edieke inamde edi edu nnyịn ndinọ enọ, nnyịn ke ntem ikpep ndikpebe Jehovah ye Eyen esie, Jesus Christ, ke ata akpan usụn̄. Jehovah ọnọ enọ kpukpru ini, atat ubọk kpukpru ini. Nte Bible ọdọhọde, enye ọnọ nnyịn “uwem, ye ibifịk, ye kpukpru n̄kpọ.” (Utom 17:25) Nnyịn nte enende imekeme ndikọm enye kaban̄a kpukpru ibifịk oro nnyịn in̄wekde, kpukpru udia oro nnyịn idiade, kpukpru ini oro ikopde inemesịt ye uyụhọ ke uwem. (Utom 14:17) Jesus, ukem nte Ete esie, ama owụt edu unọ enọ. Enye ama ọnọ idem esie ye unana ibụk. Nte afo ama ọfiọk ete ke ini oro Jesus ekesinamde mme utịben̄kpọ, ke ama esitak enye n̄kpọ ke ndinam ntre? Ke se iwakde ikan inikiet N̄wed Abasi asian nnyịn ete ke ini enye ọkọkọkde mbon udọn̄ọ, odudu ‘ama oto enye ke idem ọwọrọ.’ (Luke 6:19; 8:45, 46) Jesus ama atat ubọk tutu enye akam ayak ukpọn̄ esie, uwem esie, ọnọ ke n̄kpa.—Isaiah 53:12.
Ntre ke ini nnyịn inọde enọ, edide ini nnyịn, ukeme nnyịn, m̀mê inyene nnyịn, nnyịn ikpebe Jehovah inyụn̄ inam esịt esie adat. (Mme N̄ke 27:11; Ephesus 5:1) Nnyịn n̄ko itiene mfọnmma uwụtn̄kpọ kaban̄a eduuwem owo oro Jesus Christ ọkọkpọn̄de enịm ọnọ nnyịn.—1 Peter 2:21.
Ọyọhọ ita, ndinọ enọ ọyọhọ mme ataata ye mme akpan udọn̄. Edi akpanikọ, Jehovah ekeme ndinyene mme n̄kpọ oro ẹyomde kaban̄a ufọn n̄kpọ Obio Ubọn̄ mmemmem mmemmem ye unana ediyom un̄wam nto nnyịn, kpa nte enye ekemede ndinam mme itiat ẹsioro uyo utu ke ndida nnyịn man ikwọrọ ikọ. (Luke 19:40) Edi enye emek ndida mme ifetutom emi nnọ nnyịn ukpono. Ntre ke ini nnyịn inọde inyene nnyịn man ẹnam udọn̄ n̄kpọ Obio Ubọn̄ ẹkọri, nnyịn imokop akamba uyụhọ ndifiọk nte ke nnyịn imenen̄ede inyene udeme ke ata akpan utom oro akade iso ke ererimbot emi.—Matthew 24:14.
Iyomke ẹtetịn̄ nte ke ẹyom okụk ndida nnam utom ofụri ererimbot eke Mme Ntiense Jehovah. Ke isua utom 1995, N̄ka ama abiat se ikperede ndisịm miliọn $60 n̄kukụre ke ndise mban̄a mme akpan asiakusụn̄, mme isụn̄utom, ye mme esenyịn oro ẹsan̄ade-san̄a ke mme utom an̄wautom mmọ. Nte ededi, oro edi esisịt ubiatokụk ke ẹmende ẹdomo ye utom ubọpn̄kpọ ye edise mban̄a mme ọfis n̄kọk itieutom ye mme itie umịn̄n̄wed ke ofụri ererimbot. Edi, ẹkeme ndinam kpukpru ẹmi ebe ke mme etịbe unyịmesịt!
Ikọt Jehovah nte ido edide ikereke ite ke edieke mmimọ mînyeneke n̄kpọ, mmimọ imekeme ndisana mbiomo emi nyak nnọ mbon en̄wen ẹmen ẹbiom. Utọ edu emi ekeme ndida nnyịn n̄kesịm editaba ikpehe utuakibuot nnyịn enyeemi. Nte apostle Paul etịn̄de, mme Christian ke Macedonia ẹkedu ke “akwa ukụt.” Kpa ye oro, mmọ ẹma ẹben̄e ẹte ẹnọ mmimọ ifet ndinọ enọ. Ndien se mmọ ẹkenọde, nte Paul eketiede ntiense aban̄a, ama “ebe nte ukeme mmọ edide”!—2 Corinth 8:1-4.
Ọyọhọ inan̄, Jehovah anam edinọ enọ edi ubak utuakibuot akpanikọ koro edinọ enọ ayanam nnyịn ikop inemesịt. Jesus ke idemesie eketịn̄ ete: “Inemesịt odu ke ndinọnọ akan ke ndibọbọ.” (Utom 20:35, NW) Ntre ke Jehovah okobot nnyịn. Emi edi ntak efen efen emi nnyịn ikemede ndikere nte ke se ededi oro nnyịn inọde enye, nnyịn ikemeke ndinọ se ikemde ye esịtekọm oro nnyịn inyenede inọ enye ke esịt nnyịn. Nte ededi, ke inemesịt, Jehovah iyomke n̄kpọ ikan se nnyịn ikemede ndinọ. Nnyịn imekeme ndinyene mbuọtidem nte ke enye okop inemesịt ke ini nnyịn inọde se nnyịn ikemede ke inemesịt!—2 Corinth 8:12; 9:7.
Mme Edidiọn̄ Ẹsisụn̄ọ Ẹto Ediwụt Edu Edinọ Enọ
Ke ndifiak n̄ka akpa uwụtn̄kpọ nnyịn, da nte ke ebeakpa Zarephath ama ekere ete ke owo en̄wen ekeme ndise mban̄a edinọ Elijah udia. Nso edidiọn̄ ke enye akpakataba ntem!
Eyịghe idụhe nte ke Jehovah esidiọn̄ mbon oro ẹwụtde edu unọ enọ. (Mme N̄ke 11:25) Ebeakpa Zarephath ikọbọhọ ufen ke ntak emi ọkọnọde se enye ekekerede nte edide akpatre udia imọ. Jehovah ama ọnọ enye utịp ke utịbe utịbe usụn̄. Nte Elijah ọkọn̄wọn̄ọde, ndomuyo ke aban̄ ye aran ke ekpeme esie ikokụreke tutu edịm ọtọn̄ọ ndidep. Edi enye ama ọbọ utịp oro akakam okponde akan. Ke ini eyen esie ọkọdọn̄ọde onyụn̄ akpade, Elijah, owo ata Abasi, ama anam enye eset ọnọ n̄wan oro. Didie ke enyene ndidi oro ama ọbọp enye ntem ke n̄kan̄ eke spirit!—1 Ndidem 17:16-24.
Mfịn nnyịn idorike enyịn ndibọ mme utịbe utịbe edidiọn̄. (1 Corinth 13:8) Edi Jehovah ọnọ nnyịn nsọn̄ọ nte ke imọ iyekpeme mbon oro ẹnamde n̄kpọ ẹnọ enye ke ofụri ukpọn̄. (Matthew 6:33) Ntre nnyịn imekeme nditie nte ebeakpa Zarephath ke afan̄ oro, inọde enọ ke ntatubọk, ye idotenyịn nte ke Jehovah eyekpeme nnyịn. Kpasụk ntre, nnyịn imekeme ndibọ ikpọ utịp eke spirit. Edieke edinọ enọ nnyịn edide ubak edinam ofụri ini, utu ke ndidi n̄kpọ oro ẹnamde ke ini ke ini etiene nte etiede owo ke idem, emi ayan̄wam nnyịn ndinam enyịn nnyịn edi mmemmem inyụn̄ iwụk ntịn̄enyịn ke mme udọn̄ n̄kpọ Obio Ubọn̄, nte Jesus okotorode. (Luke 11:34; men 1 Corinth 16:1, 2 domo.) Enye n̄ko ayan̄wam nnyịn ndikụt nte ikperede Jehovah ye Jesus nte mme nsan̄autom mmọ. (1 Corinth 3:9) Ndien enye eyedemede edu ntatubọk ye edinọ enọ oro enịmde mme andituak ibuot nnọ Jehovah ke ofụri ererimbot idiọn̄ọ.
[Ekebe ke page 31]
MME USỤN̄ ẸMI NDUSỤK OWO ẸMEKDE NDINỌ ENỌ
MME ETỊBE ẸNỌDE KE UTOM OFỤRI ERERIMBOT
Ediwak owo ẹsisio n̄kpọ ẹnịm mîdịghe ẹnam ndutịm ẹban̄a ibatokụk oro mmọ ẹdisịnde ke mme ekebe etịbe oro ẹdiande idiọn̄ọ: “Etịbe Kaban̄a Utom N̄ka Ofụri Ererimbot—Matthew 24:14.” Ke ọfiọn̄ kiet kiet mme esop ẹsinọ okụk emi aka edide ibuot itieutom ofụri ererimbot ke Brooklyn, New York, m̀mê ọfis n̄kọk itieutom n̄kann̄kụk.
Ẹkeme ndinọ okụk imaesịt nnennen ẹsọk Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, m̀mê ọfis N̄ka oro esede aban̄a idụt mbufo. Ẹkeme ndinọ n̄ko mme n̄kpọuto m̀mê mme ọsọn̄urua n̄kpọ eken ke etịbe. Mme utọ etịbe oro ẹkpenyene ndisan̄a ye ibio ibio leta oro owụtde in̄wan̄în̄wan̄ nte ke emi edi enọ.
NDUTỊM ẸNAMDE ẸNỌ SE ẸSỊNDE KE UBIỌN̄
Ẹkeme n̄ko ndinọ okụk ẹsọk Watch Tower Society man ẹtịm ẹnịm tutu esịm ini n̄kpa andinọ, ye ndutịm nte edieke andinyene oyomde ndida nnam mbubehe idemesie, ke ẹyefiak ẹkpọn̄ ẹnọ enye. Kaban̄a ntọt efen efen, mbọk nyene nneme ye Treasurer’s Office ke adres ẹwụtde ke enyọn̄ emi.
ENỌ EMI ẸDIOMIDE-DIOMI
Ke adianade ye edinọ okụk ye mme etịbe okụk oro ẹsịnde ke ubiọn̄ nnennen, mme usụn̄ enọ efen ẹdu oro ẹkemede ndinyene ufọn nnọ utom Obio Ubọn̄ ofụri ererimbot. Mmọemi ẹsịne:
Insurance: Ẹkeme ndiwet enyịn̄ Watch Tower Society nte andibọ ufọn insurance m̀mê okụk ukpọn̄ utom. Ẹkpenyene ndinam N̄ka ọfiọk aban̄a mme utọ ndutịm oro.
Ibatokụk Ban̄k: Ẹkeme ndinam ibatokụk ban̄k, n̄wed okụk oro ẹsịnde ke ban̄k ẹyom udori, m̀mê okụk ukpọn̄ utom owo ẹdu ke enyịn̄ mîdịghe ẹkpe ke ini ẹkpade ẹnọ Watch Tower Society, nte ekemde ye ndutịm ban̄k n̄kann̄kụk. Ẹkpenyene nditọt N̄ka mban̄a utọ ndutịm oro.
Inyene ye Mbubehe: Ẹkeme ndinọ Watch Tower Society inyene ye mbubehe edide ke ndinọ nte ata enọ m̀mê ke idak ndutịm anamde ẹka iso ẹkpe udori ẹnọ andinọ.
Isọn̄ ye Inyene: Ẹkeme ndinọ Watch Tower Society isọn̄ ye inyene oro ẹkemede ndinyam edide ke ndinọ nte ata enọ m̀mê ke ndimụm n̄kpọ akpa ke isọn̄ ye inyene n̄kama nnọ andinọ, emi ekemede ndisụk n̄ka iso ndụn̄ do ke eyouwem esie. Owo oro ekpenyene nditọt N̄ka mbemiso ayakde isọn̄ ye inyene ekededi ọnọ N̄ka.
Unen N̄kpọ Akpa ye Mme Ebuọt: Ẹkeme ndiyak inyene m̀mê okụk nnọ Watch Tower Society ke ndinọ enye unen ndidia n̄kpọ akpa oro ibet enyịmede mîdịghe ẹkeme ndiwet enyịn̄ N̄ka nte adia ufọn ke n̄wed ebuọt. Ebuọt oro adade ufọn ọsọk n̄ka ido ukpono ekeme ndinọ ndusụk ufọn ukpe tax. Ẹkpenyene ndinọ n̄wed unen m̀mê ebuọt emi ẹsọk N̄ka.
Mbon oro ẹnyenede udọn̄ ke ekededi ke otu enọ ẹmi ẹdiomide-diomi mi ẹkpenyene nditọt Itieutom Enọ Emi Ẹdiomide-Diomi ke adres oro ẹwetde ke idak emi m̀mê ọfis N̄ka oro anamde utom ke idụt emi afo odude. Itieutom Enọ Emi Ẹdiomide-Diomi ekpenyene ndibọ n̄wed ekededi oro enyenede ebuana ye ndutịm ẹmi.
N̄ka etịm ediye uduot ekpri n̄wed Planned Giving ke Ikọmbakara. Mbon oro ẹdude ke United States ẹmi ẹnamde ndutịm ndinọ N̄ka san̄asan̄a enọ idahaemi m̀mê ndikpọn̄ n̄kpọ akpa ke ini ẹkpade ẹkeme ndikụt ntọt emi nte enyenede ufọn. Oro enen̄ede edi ntre edieke mmọ ẹyomde ndiyọhọ ndusụk utịtmbuba ubon m̀mê ndutịm ẹnamde ẹnọ inyene ye isọn̄ ke adan̄aemi ẹbọde ufọn tax ndisụhọde ekọmurua enọ m̀mê n̄kpọ akpa oro. Ẹdinọ ediye uduot ekpri n̄wed emi ke ini ẹsịnde eben̄e, edide ke ndiwewet m̀mê ke ndikot ke urụk ukopikọ.
PLANNED GIVING DESK
Watch Tower Bible and Tract Society of Pennsylvania
100 Watchtower Drive, Patterson, New York 12563-9204
Telephone: (914) 878-7000