Nso Ke Abasi Oyom Oto Nnyịn?
“Ndima Abasi edi emi, ete, nnyịn inịm mbet Esie; ndien mbet Esie ibiakke owo idem.”—1 JOHN 5:3.
1, 2. Ntak emi mîdịghe n̄kpọ n̄kpaidem nte ke Abasi enyene mme n̄kpọ oro oyomde oto mbon oro ẹyomde ndituak ibuot nnọ enye ke usụn̄ oro enye enyịmede?
“IDO UKPONO mi ọfọn ye ami!” Ndi idịghe se mme owo ẹsiwakde ndidọhọ edi oro? Nte ededi, ke nditịm ntịn̄, mbụme ekpedi, “Nte ido ukpono mi enem Abasi esịt?” Ih, enyene mme n̄kpọ oro Abasi oyomde oto mbon oro ẹyomde ndituak ibuot nnọ enye ke usụn̄ oro enye enyịmede. Nte oro akpakpa nnyịn idem? Ikpanaha akpa. Yak idọhọ ke afo emenyene ediye ufọkidụn̄, kiet oro afo akafiakde ọdiọn̄ ndondo emi ke akamba ekọmurua. Ndi afo akpayak owo ekededi odụn̄ do? Ke akpanikọ ukpayakke! Owo ekededi oro oyomde ndidụn̄ ekpenyene ndisịm mme n̄kpọ oro afo oyomde.
2 Ukem ntre, Jehovah Abasi akanam ebietidụn̄ eke isọn̄ emi ọnọ ubon owo. Ke idak ukara Obio Ubọn̄ esie, ke n̄kpet n̄kpet ini iso ‘ẹyefiak ẹdiọn̄’ isọn̄—ẹnam akabade edi ediye paradise. Jehovah edinam emi. Ke akpade enye ekese n̄kpọ, enye ama ọnọ ikpọn̄îkpọn̄ edibon Eyen esie man ekeme ndinam emi. Ke akpanikọ, anaedi Abasi enyene mme n̄kpọ oro oyomde oto mbon oro ẹdidụn̄de do!—Psalm 115:16; Matthew 6:9, 10; John 3:16.
3. Didie ke Solomon eketịn̄ se Abasi oyomde oto nnyịn ke ibio ibio usụn̄?
3 Didie ke nnyịn ikeme ndifiọk se mme n̄kpọ oro Abasi oyomde ẹdide? Jehovah ama ọnọ enyene-ọniọn̄ Edidem Solomon odudu spirit nditịn̄ se Enye oyomde oto nnyịn ke ibio ibio usụn̄. Ke ama eketie ekere kpukpru se enye ekebịnede—esịnede inyene, utom ubọpn̄kpọ, mme ikwọ, ye ima ntụk—Solomon ama edi edifiọk emi: “Yak nnyịn ikop utịt ofụri n̄kpọ emi: bak Abasi, nyụn̄ nịm mbet esie: koro emi edi eke kpukpru owo.” (Sịghisịghi ubọkn̄wed edi eke nnyịn.)—Ecclesiastes 12:13.
“Mbet Esie Ibiakke Owo Idem”
4-6. (a) Nso ke ikọ Greek oro ẹkabarede nte “ibiakke owo idem” ọwọrọ ke ataata usụn̄? (b) Ntak emi nnyịn ikemede ndidọhọ ke mme mbet Abasi ibiakke owo idem?
4 “Nịm mbet esie.” Oro enen̄erede edi se Abasi oyomde oto nnyịn. Ndi oro okpon akaha enye ndiyom? Baba-o. Apostle John asian nnyịn n̄kpọ oro enen̄erede ọnọ nsọn̄ọ aban̄a mme mbet, m̀mê mme n̄kpọ oro Abasi oyomde. Enye ekewet ete: “Ndima Abasi edi emi, ete, nnyịn inịm mbet Esie; ndien mbet Esie ibiakke owo idem.” (Sịghisịghi ubọkn̄wed edi eke nnyịn.)—1 John 5:3.
5 Ikọ Greek oro ẹkabarede nte “ibiakke owo idem” ke ataata usụn̄ ọwọrọ “ndodobi.” Enye ekeme ndida mban̄a n̄kpọ oro ọsọn̄de ndisịm m̀mê oro edide ọkpọsọn̄ n̄kpọ ndinam. Ke Matthew 23:4, ẹda enye nditịn̄ mban̄a ‘ndidobi mbiomo,’ mme ibet ye mme ido edinam ẹmi mme owo ẹnamde, oro mme scribe ye mme Pharisee ẹkebọpde ẹdori mme owo. Ndi ubiere oro akanieren apostle John esịmde mi an̄wan̄a fi? Mbet Abasi idịghe ndodobi mbiomo, m̀mê mmọ ndisọn̄ n̄kaha nnyịn ndinịm. (Men Deuteronomy 30:11 domo.) Ke edide isio ye oro, ke ini nnyịn imade Abasi, ndisịm mme n̄kpọ oro enye oyomde anam nnyịn ikop inemesịt. Enye ọnọ nnyịn ọsọn̄urua ifet ndiwụt ima oro imade Jehovah.
6 Man iwụt ima oro nnyịn inyenede inọ Abasi, oyom nnyịn inen̄ede ifiọk se enye oyomde oto nnyịn. Ẹyak nnyịn kemi ineme iban̄a ition ke otu mme n̄kpọ oro Abasi oyomde. Nte nnyịn inamde ntre, nyene se John ekewetde ke ekikere: ‘Mbet Abasi ibiakke owo idem.’
Nyene Ifiọk Abasi
7. Edinyan̄a nnyịn ọkọn̄ọ ke nso?
7 Akpa n̄kpọ oro ẹyomde edi ndinyene ifiọk Abasi. Kere ban̄a mme ikọ Jesus oro ẹwetde ke John ibuot 17. Ini n̄kpọntịbe ekedi akpatre okoneyo eke uwem Jesus nte owo. Jesus ama abiat ekese ini ke mbubịteyo oro nditịm mme apostle esie idem nnọ unyọn̄ esie. Enye ama enyene udọn̄ aban̄a ini iso mmọ, kpa nsinsi ini iso mmọ. Ke emenerede enyịn esie ke enyọn̄, enye ama ọbọn̄ akam aban̄a mmọ. Ke ufan̄ikọ 3, nnyịn ikot ite: “Ndien nsinsi uwem oro edi ndifiọk Fi, ata Abasi kierakiet, ye Enye emi Afo ọkọdọn̄de, kpa Jesus Christ.” Ih, edinyan̄a mmọ ọkọkọn̄ọ ke mmọ “ndifiọk” Abasi ye Christ. Oro abuana nnyịn n̄ko. Man inyene edinyan̄a, ana nnyịn inyene orụk ifiọk oro.
8. Nso ke ‘ndinyene ifiọk’ Abasi ọwọrọ?
8 Nso ke ọwọrọ “ndifiọk” Abasi? Ikọ Greek oro ẹkabarede mi “ndifiọk” ọwọrọ “ndidi ndifiọk, ndidiọn̄ọ” m̀mê “ndifiọk ọyọhọ ọyọhọ.” Tịm fiọk, n̄ko, nte ke edikabade oro “ndifiọk” owụt ete ke emi edi edinam oro akade-ka iso. Ke ntem ndifiọk Abasi ọwọrọ ndidi ndidiọn̄ọ enye idịghe enyọn̄ enyọn̄ edi ata ntotụn̄ọ ntotụn̄ọ, ikọride itie ufan oro itịmde idiọn̄ọ enye. N̄kaiso itie ebuana ye Abasi anam inyene ifiọk oro ọkọride-kọri iban̄a enye. Edinam emi ekeme ndika iso ke nsinsi, koro tutu amama nnyịn idikemeke ndikpep kpukpru n̄kpọ oro anade ẹfiọk ẹban̄a Jehovah.—Rome 11:33.
9. Nso ke nnyịn ikeme ndikpep mban̄a Jehovah nto n̄wed obot?
9 Nnyịn isan̄a didie ifiọk Abasi? Odu n̄wed iba oro ẹkemede ndin̄wam nnyịn. Akpa edi n̄wed obot. Mme n̄kpọ oro Jehovah okobotde—mme oduuwem ye mbon oro mînyeneke uwem—ẹnọ nnyịn ndusụk ikike ẹban̄a orụk owo emi enye edide. (Rome 1:20) Kere ban̄a ndusụk uwụtn̄kpọ. Uyom akamba aya, uyom mbufụt inyan̄ ke ini oyobio, ikpaenyọn̄ ọyọhọde ye ntantaọfiọn̄ ke okoneyo emi enyọn̄ an̄wan̄ade—ndi mme utọ n̄kpọ oro ikpepke nnyịn nte ke Jehovah edi Abasi emi ‘ọsọn̄de odudu’? (Isaiah 40:26) Eyenọwọn̄ asakde imam nte enye esede eyen ebua nte ebrede mbre ye isịm esie m̀mê eyen an̄wa ebrede mbre ye eboho mfrukịm—nte oro inọhọ ekikere nte ke Jehovah, “Abasi inemesịt,” enyene edu mbubru? (1 Timothy 1:11, NW) Inem inem udia, inem inem ufuọn̄ flawa ke ebiet emi awawa ikọn̄ ọyọhọde, nyayama ndiye uduot ọfọn̄ekpo, uyo inuen ẹmi ẹkwọde ikwọ ke ini utọ, ufiop ufiop mfari owo ima—nte nnyịn idaha mme utọ n̄kpọ oro ifiọk nte ke Andibot nnyịn edi Abasi ima, emi oyomde nnyịn idara uwem?—1 John 4:8.
10, 11. (a) Nso mme n̄kpọ ẹban̄ade Jehovah ye mme uduak esie ke nnyịn mîkemeke ndikpep nto n̄wed obot? (b) Ibọrọ mbụme ewe ke ẹkụt ke Bible kpọt?
10 Nte ededi, se nnyịn ikemede ndikpep mban̄a Jehovah nto n̄wed obot enyene adan̄a. Ke ndinọ uwụtn̄kpọ: Nso idi enyịn̄ Abasi? Ntak emi enye okobotde isọn̄ onyụn̄ esịnde ubonowo ke esịt? Ntak emi Abasi ayakde idiọkido odu? Nso ke ini iso akama ọnọ nnyịn? Man inyene ibọrọ inọ mme utọ mbụme oro, ana nnyịn ika ibịne n̄wed en̄wen emi ọnọde ifiọk Abasi—kpa Bible. Ke mme page esie, Jehovah ayarade mme n̄kpọ ẹban̄ade idemesie, esịnede enyịn̄ esie, edu esie, ye mme uduak esie—kpa mme ntọt ẹmi nnyịn mîkemeke ndinyene nto ebiet efen ekededi.—Exodus 34:6, 7; Psalm 83:18; Amos 3:7.
11 Ke N̄wed Abasi, Jehovah n̄ko ọnọ akpan ifiọk aban̄ade mme owo efen oro oyomde nnyịn idiọn̄ọ iban̄a. Ke uwụtn̄kpọ, anie edi Jesus Christ, ndien nso udeme ke enye enyene ke ndisu mme uduak Jehovah? (Utom 4:12) Anie edi Satan kpa Devil? Ke mme usụn̄ ewe ke enye otụn mme owo usụn̄? Didie ke nnyịn ikeme ndifep ndidi se enye otụnde usụn̄? (1 Peter 5:8) Ẹkụt mme anyan̄a-uwem ibọrọ ke mme mbụme ẹmi ke Bible kpọt.
12. Didie ke afo ekeme ndinam an̄wan̄a ntak mîbiakke owo idem ndinyene ifiọk mban̄a Abasi ye mme uduak esie?
12 Nte edi se ibiakde owo idem ndinyene orụk ifiọk oro mban̄a Abasi ye mme uduak esie? Idịghe ndomo esisịt! Nte afo emekeme nditi nte eketiede fi ke idem ke ini afo ke akpa ini ọkọfiọkde ete ke enyịn̄ Abasi edi Jehovah, nte ke Obio Ubọn̄ esie ayafiak owụk Paradise ke isọn̄ emi, nte ke enye ama ọnọ edima Eyen esie nte ufak kaban̄a mme idiọkn̄kpọ nnyịn, ọkọrọ ye mme ọsọn̄urua akpanikọ eken? Ndi iketiehe nte ediyarade n̄kpan̄ unana ifiọk ke enyịn mfep nnyụn̄ n̄kụt mme n̄kpọ in̄wan̄în̄wan̄ ke akpa ini? Ndinyene ifiọk Abasi ibiakke owo idem. Enye edi n̄kpọ idatesịt!—Psalm 1:1-3; 119:97.
Ndida Ekekem ye Mme Idaha Abasi
13, 14. (a) Nte nnyịn ikọde ifiọk iban̄a Abasi, nso mme ukpụhọde ke oyom nnyịn inam ke uwem nnyịn? (b) Abasi oyom nnyịn idianade idem ke mme ndek ndek edinam ewe?
13 Nte nnyịn ikọde ifiọk Abasi, nnyịn imọfiọk ke oyom nnyịn inam mme ukpụhọde ke uwem nnyịn. Emi ada nnyịn edisịm udiana n̄kpọ ẹyomde. Ana nnyịn ida ikekem ye mme idaha Abasi kaban̄a eti eduuwem inyụn̄ inyịme akpanikọ esie. Nso idi akpanikọ? Ndi se nnyịn inịmde ke akpanikọ ye se nnyịn inamde ẹnen̄ede ẹnyene se ẹwọrọde ẹnọ Abasi? Ediwak owo mfịn nte an̄wan̄ade ikereke ntre. Ntọt oro Ufọkabasi England ekemịn̄de ke 1995 ama ọnọ ekikere ete ke owo ikpenyeneke ndise edidụn̄ ọtọkiet ye unana edidọ ndọ nte idiọkn̄kpọ. “Ubak udịmikọ oro ‘ndidụn̄ ọtọkiet ye unana edidọ ndọ’ ananam owo bụt inyụn̄ in̄wamke-n̄wam owo,” ntre ke bishop ufọkabasi kiet ọkọdọhọ.
14 Ntre, ndien, nte “ndidụn̄ ọtọkiet ye unana edidọ ndọ” idịghe aba idiọkn̄kpọ? Jehovah asian nnyịn ata in̄wan̄în̄wan̄ nte enye esede utọ eduuwem oro. Ikọ esie, kpa Bible, ọdọhọ ete: “Yak kpukpru owo ẹbat ndọ ke n̄kpọ eke ẹkponode ẹkûnyụn̄ ẹsabade bed ndọ; koro Abasi eyekpe ikpe ye mbon use ye mme esịn-efịbe.” (Mme Hebrew 13:4) Idan̄ mbemiso ndọ ekeme nditre ndidi idiọkn̄kpọ ke iso mme ọkwọrọ ederi ye mme aka ufọkabasi oro ẹnanade ukpan, edi enye edi akwa idiọkn̄kpọ ke enyịn Abasi! Kpasụk ntre ke edi ye efịbe, idan̄ iman, ye idan̄ ukemuduot. (Leviticus 18:6; 1 Corinth 6:9, 10) Abasi oyom ete nnyịn itre mme utọ edinam oro, emi enye esede nte ndek ndek uwem.
15. Didie ke mme n̄kpọ oro Abasi oyomde ẹbuana usụn̄ nte nnyịn inamde n̄kpọ ye mbon en̄wen ye se nnyịn inịmde ke akpanikọ?
15 Nte ededi, nditre mme edinam oro Abasi esede nte idiọkn̄kpọ ikemke. Mme n̄kpọ oro Abasi oyomde ẹbuana n̄ko usụn̄ nte nnyịn inamde n̄kpọ ye mbon en̄wen. Ke ubon, enye oyom ebe ye n̄wan ẹma ẹnyụn̄ ẹkpono kiet eken. Abasi oyom mme ete ye eka ẹse ẹban̄a mme udọn̄ eke obụk, eke spirit, ye eke ntụk nditọ mmọ. Enye ọdọhọ nditọ ẹkop uyo ẹnọ mme ete ye eka mmọ. (Mme N̄ke 22:6; Colossae 3:18-21) Ndien nso kaban̄a mme n̄kpọ oro nnyịn inịmde ke akpanikọ? Jehovah Abasi oyom nnyịn ifep mme edinịm ke akpanikọ ye mme ido edinam ẹmi ẹtode nsunsu ido ukpono m̀mê ẹmi ẹtuahade ye mme in̄wan̄în̄wan̄ akpanikọ oro ẹkpepde ke Bible.—Deuteronomy 18:9-13; 2 Corinth 6:14-17.
16. Nam an̄wan̄a ntak emi mîbiakke owo idem ndidu uwem ekekem ye mme idaha oro Abasi enịmde kaban̄a eti eduuwem ye edinyịme akpanikọ esie.
16 Nte edi se ibiakde nnyịn idem ndida ekekem ye mme idaha Abasi kaban̄a eti eduuwem nnyụn̄ nnyịme akpanikọ esie? Idịghe ke ini nnyịn ikerede iban̄a mme ufọn—mme ndọ ẹmi ebe ye n̄wan ẹmade ẹnyụn̄ ẹbuọtde idem ke kiet eken utu ke ndọ ẹmi ẹwụrede ke ntak unana edinam akpanikọ; mme ufọk ẹmi nditọ ẹkerede ke mme ete ye eka ẹma ẹnyụn̄ ẹyom mmimọ utu ke mme ufọk ẹmi nditọ ẹkerede ke owo imaha, ke ẹfụmi, ke owo inyụn̄ iyomke mmimọ; eti ubieresịt ye eti nsọn̄idem utu ke ekikere ubiomikpe ye idem emi AIDS m̀mê ndusụk udọn̄ọ efen ẹmende ẹto idan̄ ọnọmọde. Ke akpanikọ, mme n̄kpọ oro Jehovah oyomde ibọhọ nnyịn n̄kpọ ekededi oro nnyịn iyomde man idara uwem!—Deuteronomy 10:12, 13.
Wụt Ukpono nọ Uwem ye Iyịp
17. Didie ke Jehovah ese uwem ye iyịp?
17 Nte afo odude uwem ke n̄kemuyo ye mme idaha Abasi, afo emedi edifiọk adan̄a nte uwem edide ọsọn̄urua n̄kpọ. Ẹyak nnyịn kemi ineme ọyọhọ n̄kpọ ita oro Abasi oyomde. Ana nnyịn iwụt ukpono inọ uwem ye iyịp. Uwem edi edisana n̄kpọ ọnọ Jehovah. Akpana edi, koro enye edi Ntọn̄ọ uwem. (Psalm 36:9) Kamse, idem uwem eyen oro mîmanake kan̄a ke idịbi eka edi ọsọn̄urua n̄kpọ ọnọ Jehovah! (Exodus 21:22, 23) Iyịp ada aban̄a uwem. Ke ntre, iyịp n̄ko edi edisana n̄kpọ ke enyịn Abasi. (Leviticus 17:14) Do, ikpedịghe n̄kpọ n̄kpaidem nte ke Abasi oyom nnyịn ise uwem ye iyịp nte imọ isede.
18. Nte Jehovah esede uwem ye iyịp oyom nso oto nnyịn?
18 Nso ke ndiwụt ukpono nnọ uwem ye iyịp oyom oto nnyịn? Nte mme Christian, nnyịn isịnke uwem nnyịn ke itiendịk nte mîdotke ke ntak nduaidem. Nnyịn imenyene udọn̄ ndidu ke ukpeme ndien ke ntre ikụt ite ke moto ye ufọk nnyịn ẹdu ke eti idaha. (Deuteronomy 22:8) Nnyịn isidaha un̄wọn̄, itaha isịp betel, m̀mê ndida akama-mbumehe m̀mê abiat owo ekikere n̄kpọsọn̄ ibọk kaban̄a inemesịt. (2 Corinth 7:1) Sia nnyịn ikpan̄de utọn̄ inọ Abasi ke ini enye ọdọhọde ‘ẹbet iyịp,’ nnyịn iyakke ẹkịm iyịp ẹsịn nnyịn ke idem. (Utom 15:28, 29) Okposụkedi nnyịn imade uwem, nnyịn ididomoke ndinyan̄a uwem nnyịn idahaemi ebe ke ndibiat ibet Abasi ndien ke ntem isịnde idotenyịn nsinsi uwem nnyịn ke itiendịk!—Matthew 16:25.
19. Nam an̄wan̄a nte nnyịn ibọde ufọn ito uwem ye iyịp.
19 Nte edi se ibiakde nnyịn idem ndida uwem ye iyịp ke edisana? Idịghe ndomo esisịt! Kere ban̄a emi. Ndi edi se ibiakde owo idem ndibọhọ kansa obufre emi otode edin̄wọn̄ sika? Nte edi se ibiakde owo idem ndibọhọ mbumehe n̄kpọsọn̄ ibọk oro ẹnọde unan ke ekikere ye ke ikpọkidem? Nte edi se ibiakde owo idem nditre ndimen AIDS, udọn̄ọ edidiana ekpa, m̀mê ndusụk udọn̄ọ efen ẹmende ẹto edikịm iyịp nsịn ke idem? Nte an̄wan̄ade, nnyịn ndifep mme edinam ye edu oro ẹnọde unan edi ke mfọnn̄kan ufọn nnyịn.—Isaiah 48:17.
20. Didie ke ubon kiet ọkọbọ ufọn oto edinyene ekikere Abasi kaban̄a uwem?
20 Kere ban̄a ifiọkutom emi. Ke ndusụk isua ẹmi ẹkebede, iyịp ama ọtọn̄ọ ndiwọrọ n̄wan Ntiense kiet emi akasan̄ade ye idịbi ọfiọn̄ ita ye ubak ke mbubịteyo kiet ndien ẹma ẹsọp ẹmen enye ẹka ufọkibọk. Ke dọkta ama ekese enye idem, enye ama okop ke inọ utọn̄ nte enye ọdọhọde kiet ke otu mme nurse ete ke mmọ ẹnyene ndision̄o idịbi oro. Sia ọfiọkde nte Jehovah esede uwem eyen oro mîmanake kan̄a, enye ama ọsọn̄ọ esịn usion̄o idịbi, ọdọhọde dọkta oro ete: “Edieke enye odude uwem, yak enye odu do!” Enye ama aka iso ndiyọ uwọrọiyịp ke ndusụk ini, edi ọfiọn̄ ifan̄ ke ukperedem enye ama aman okopidem eyeneren ke ọfiọn̄ mîkemke, emi edide isua 17 idahaemi. Enye ama anam an̄wan̄a ete: “Ima isian eyen nnyịn kpukpru emi, ndien enye ama ọdọhọ ete ke imọ imokop inemesịt nte owo mîkotopke imọ isịn ke ifụm. Enye ọfiọk ete ke nnyịn ndinam n̄kpọ Jehovah edi n̄kukụre ntak emi akam anamde imọ idu uwem.” Ke akpanikọ, ndise uwem nte Abasi esede ikabiakke ubon emi idem!
Ndinam Utom Ọtọkiet ye Ikọt Jehovah Oro Ẹtịmde
21, 22. (a) Jehovah odori enyịn nnyịn ndinam n̄kpọ esie ye mmanie? (b) Ẹsan̄a didie ẹdiọn̄ọ ikọt Abasi oro ẹtịmde?
21 Nnyịn idaha ikpọn̄ ke ndinam mme ukpụhọde oro ẹyomde man idu uwem nnyịn ke n̄kemuyo ye mme idaha Abasi. Jehovah enyene mme owo ke isọn̄ emi, ndien enye oyom nnyịn inam utom ọtọkiet ye mmọ. Emi ada nnyịn edisịm ọyọhọ n̄kpọ inan̄ oro ẹyomde. Ana nnyịn inam n̄kpọ Jehovah ye esop esie oro spirit ọnọde ndausụn̄.
22 Nte ededi, didie ke ẹkeme ndifiọk ikọt Abasi oro ẹtịmde? Nte ekemde ye mme idaha oro ẹwụtde ke N̄wed Abasi, mmọ ẹnyene ata ima ke otu idemmọ, mmọ ẹnyene ntotụn̄ọ ukpono ẹnọ Bible, mmọ ẹkpono enyịn̄ Abasi, mmọ ẹkwọrọ ẹban̄a Obio Ubọn̄ esie, mmọ inyụn̄ idịghe eke idiọk ererimbot emi. (Matthew 6:9; 24:14; John 13:34, 35; 17:16, 17) Esop ido ukpono kiet kpọt odu ke isọn̄ emi oro enyenede kpukpru idiọn̄ọ ata Ido Ukpono Christ—Mme Ntiense Jehovah!
23, 24. Didie ke nnyịn ikeme ndiwụt nte ke idịghe se ibiakde owo idem ndinam n̄kpọ Jehovah ọtọkiet ye ikọt esie oro ẹtịmde?
23 Nte edi se ibiakde owo idem ndinam n̄kpọ Jehovah ọtọkiet ye ikọt esie oro ẹtịmde? Ke akpanikọ, idịghe! Ke edide isio ye oro, edi ọsọn̄urua ifet ndinyene ima ye ibetedem ubon ofụri ererimbot eke nditọete iren ye iban Christian. (1 Peter 2:17) Kere nte ọbọhọde ke ubom oro esịpde onyụn̄ okụtde idemfo ke mmọn̄, an̄wanade ndifiọrọ ke enyọn̄ mmọn̄. Ke ini afo ekerede ke imọ ikemeke aba ndiyọ, owo oto ke ubom unyan̄a uwem omụm fi. Ih, mbon en̄wen oro ẹbọhọde ẹdu! Ke ubom unyan̄a uwem oro, afo awat ayak ọnọ mbon en̄wen nte ẹwatde ẹka obot, ẹmende mme andibọhọ eken nte mbufo ẹkade ke usụn̄.
24 Nte nnyịn idụhe ke ukem idaha oro? Ẹma ẹdụri nnyịn ẹsion̄o ke enyene-ndịk “mmọn̄” idiọk ererimbot emi ẹsịn ke “ubom unyan̄a uwem” edide esop Jehovah eke isọn̄. Ke esịt esie, nnyịn inam utom ọtọkiet nte nnyịn isan̄ade ika “obot” edinen obufa ererimbot. Edieke mme mfịghe uwem ẹkpenamde nnyịn ikpa mba ke usụn̄, nnyịn ikpowụt esịtekọm didie ntem kaban̄a un̄wam ye ndọn̄esịt mme ata nsan̄a Christian!—Mme N̄ke 17:17.
25. (a) Nso mbiomo ke nnyịn inyene kaban̄a mbon oro ẹsụk ẹdude ke “mmọn̄” idiọk ererimbot emi? (b) Nso n̄kpọ oro Abasi oyomde ke ẹdineme ke ibuotikọ emi etienede?
25 Nso kaban̄a mbon eken—mbon esịt akpanikọ ẹmi ẹsụk ẹdude ke “mmọn̄”? Nnyịn imenyene mbiomo ndin̄wam mmọ ẹdidụk esop Jehovah, nte idịghe ntre? (1 Timothy 2:3, 4) Mmọ ẹyom un̄wam man ẹkpep se Abasi oyomde. Emi ada nnyịn edisịm ọyọhọ n̄kpọ ition oro Abasi oyomde. Ana nnyịn idi mme anam-akpanikọ anditan̄a Obio Ubọn̄ Abasi. Iyeneme se emi abuanade ke ibuotikọ emi etienede.
Ndi Afo Emeti?
◻ Ntak emi mme mbet Abasi mîbiakke owo idem-e?
◻ Didie ke nnyịn ikọ ifiọk Abasi?
◻ Ntak emi mîbiakke owo idem ndidu uwem ekekem ye mme idaha Abasi kaban̄a eti eduuwem nnyụn̄ nnyịme akpanikọ esie?
◻ Nso ke nte Abasi esede uwem ye iyịp oyom oto nnyịn?
◻ Abasi oyom nnyịn idiana ye mmanie inam n̄kpọ esie, ndien didie ke ẹkeme ndifiọk mmọ?
[Mme ndise ke page 18]
Nnyịn ikpep n̄kpọ iban̄a Jehovah ito n̄wed obot ye Bible
[Mme Ebiet Ẹdade N̄kpọ Ẹto]
Ofiom: Ẹbọ ẹto Australian International Public Relations; bear: Safari-Zoo of Ramat-Gan, Tel Aviv