Edisọn̄ọ Nyịre ke Akpan Ukpepn̄kpọ Atara Asuana

EDISỌN̄Ọ NYỊRE KE AKPAN UKPEPN̄KPỌ—isua ifan̄ ẹmi ẹkebede, emi ekedi sụk ekpri n̄ka ke ido ukpono Protestant. Mme n̄kpọ ẹkpụhọde didie ntem! Bruce B. Lawrence, etịn̄ n̄kpọ mban̄a ido ukpono, ama ewet ete ke isua 30 ẹmi ẹkebede, ibat ibat owo ẹkekeme ndida n̄kụt nte ke utịt ọyọhọ isua ikie 20 emi, edisọn̄ọ nyịre ke akpan ukpepn̄kpọa ayakabade edi akpan ye idem ebeubọk ibuot nneme ntre ọnọ ndutịm usuan mbụk n̄kpọntịbe ye ndụn̄ọde ufọkn̄wed ntaifiọk.

Edi, se iketịbede edi oro. Mme ntọt n̄wedmbụk n̄kpọntịbe ẹmi ẹban̄ade mme afai afai edinam uwụt iyatesịt ke mme efak, uwotowo, n̄ka akpande usion̄o idịbi, mme n̄ka ido ukpono ẹmi ẹnọhọde ke mbre ukara, ye an̄wan̄wa edifọp mme n̄wed ẹmi ẹkerede nte ẹdide n̄kpọ isụn̄i ẹdi mme n̄kpọ oro ẹnamde ẹti mme edinam mme andisọn̄ọ nyịre ke akpan ukpepn̄kpọ kpukpru ini. N̄wedmbụk okụk Italy eke urua ke urua, Mondo Economico, ama ọdọhọ ete ke ekpere ndidi edisọn̄ọ nyịre ke akpan ukpepn̄kpọ “akama enyịn̄ Abasi nte isọn̄ ndida n̄n̄wana en̄wan” ke kpukpru ebiet.

Ẹsiwak ndiwụt mme andisọn̄ọ nyịre ke akpan ukpepn̄kpọ nte ẹnamde n̄kpọ ẹbe ubọk ẹnyụn̄ ẹnyenede ukwan̄ ifiopesịt, ẹduakde idiọk uduak, ẹnyụn̄ ẹnamde mme edinam oyomonsia. Mme owo ẹkop ndịk ẹban̄a n̄kọri mme utọ otu nte Comunione e Liberazione ke Ido Ukpono Roman Catholic, Gush Emunim ke Ido Ukpono Mme Jew, ye N̄ka Christian ke Ido Ukpono Protestant ke Edem Edere America. Ntak emi edisọn̄ọ nyịre ke akpan ukpepn̄kpọ atarade asuana? Nso idemede enye? Nte enye ekpedi “usiene Abasi,” nte Gilles Kepel, owo France emi edide ekpep n̄kpọ mban̄a itie ebuana owo, ọnọde ekikere aban̄a?

[Mme Ikọ idakisọn̄]

[Ebiet Ẹdade Ndise Ẹto ke page 3]

Nina Berman/Sipa Press