Usụn̄ Oro Ọfọnde Akan
MME NTIENSE JEHOVAH ẹkere ẹban̄a nditaha eke spirit ke ererimbot ye oburobụt ido ye unana iwụk ke ido ukpono emi ọyọhọde n̄kaowo. Nte utịp, ẹsikot mmọ ndusụk ini nte mme andisọn̄ọ nyịre ke akpan ukpepn̄kpọ. Edi nte mmọ ẹdi? Baba. Ke adan̄aemi mmọ ẹnyenede mme ukpepn̄kpọ ido ukpono ẹmi ẹsọn̄ọde ẹnịm ke akpanikọ, mmọ idịghe mme andisọn̄ọ nyịre ke akpan ukpepn̄kpọ ke usụn̄ifiọk oro ẹdade ikọ oro ẹtịn̄ ikọ. Mmọ inyịkke mme andikara ndisịn udọn̄ nnọ ndusụk ekikere, ndien mmọ isịnke idem ke ndida mme usụn̄ ediwụt unana edinyịme ye afai n̄n̄wana ye mbon oro mînyịmeke ekikere mmọ. Mmọ ẹkụt usụn̄ oro ọfọnde akan. Mmọ ẹkpebe Adausụn̄ mmọ, Jesus Christ.
Mme Ntiense Jehovah ẹnịm ke akpanikọ ẹte ke akpanikọ ido ukpono odu, nte ke ẹkụt enye ke Bible. (John 8:32; 17:17) Edi Bible ekpep mme Christian ndifọn ido, ndinyene nti ido, nnyene ifụre ifụre ido, nnyụn̄ nnyene eti ibuot—mme edu oro mîyakke ẹnyene ukwan̄ ifiopesịt. (Galatia 5:22, 23; Philippi 4:5) Ke n̄wed James eke Bible, ẹsịn udọn̄ ẹnọ mme Christian ndinyene “eti ibuot emi otode ke enyọn̄,” emi ẹtịn̄de nte edide “edisana ke mbemiso, onyụn̄ etie emem-emem, onyụn̄ eme ime, awara ndikop n̄kpeubọk, onyụn̄ ọyọhọ ye mbọm ye nti mfri.” James ama adian do ete: “Ẹtọ mfri edinen ido ke emem ẹnọ mme [anam] emem.”—James 3:17, 18.
Mme Ntiense Jehovah ẹti ete ke Jesus ama enen̄ede ekere aban̄a akpanikọ. Enye ama asian Pontius Pilate ete: “N̄kamana kaban̄a ntak emi, n̄konyụn̄ ndụk ke ererimbot kaban̄a n̄kpọ emi, man ndi ntiense nnọ akpanikọ.” (John 18:37) Okposụkedi enye ekedide uko uko anditan̄a akpanikọ, enye ikodomoke ndinyịk mbon efen ẹnịm se enye ekenịmde ke akpanikọ. Utu ke oro, enye ekedemede ekikere ye esịt mmọ. Enye ama ọfiọk ete ke Ete esie eke heaven, kpa Abasi emi ‘ọfọnde onyụn̄ enende,’ eyebiere usụn̄ ye ini emi enye edisiode nsu ye ukwan̄ido ifep ke iso isọn̄. (Psalm 25:8) Ntem, enye ikoyomke ndinyenyịk mbon oro mîkadaha ye enye. Ke edide isio, akakam edi mme adaiso ido ukpono eset eke eyo esie ẹkedomo ndinyịk Jesus.—John 19:5, 6.
Mme Ntiense Jehovah ẹnen̄ede ẹnịm mme ukpepn̄kpọ ido ukpono ke akpanikọ, ndien mmọ ẹwụt nti ido ke n̄kpọ aban̄ade ido uwem. Ukem nte apostle Paul, mmọ ẹnen̄ede ẹnịm ke akpanikọ ẹte ke ‘Ọbọn̄ kiet, mbuọtidem kiet, baptism kiet’ kpọt odu. (Ephesus 4:5) Mmọ n̄ko ẹfiọk mme ikọ Jesus ẹmi: “Inua-otop emi adade owo esịm uwem afafaha, usụn̄ onyụn̄ esịre; ndien mme andikụt enye iwakke.” (Matthew 7:13, 14) Kpa ye oro, mmọ idomoke ndinyịk mbon en̄wen ẹnịm se mmọ ẹnịmde ke akpanikọ. Utu ke oro, mmọ ẹkpebe Paul ẹnyụn̄ ‘ẹkpe ye’ kpukpru mbon oro ẹyomde ‘ndikabade ntie ke emem ye Abasi.’ (2 Corinth 5:20) Emi edi usụn̄ oro ọfọnde akan. Enye edi usụn̄ Abasi.
Edisọn̄ọ nyịre ke akpan ukpepn̄kpọ ido ukpono, nte ẹdade ikọ oro mfịn, edi ata isio isio n̄kpọ. Mme andisọn̄ọ nyịre ke akpan ukpepn̄kpọ ẹsida ediwak usụn̄ ẹnam n̄kpọ—esịnede afai—ndinyịk mme edumbet mmọ ndori n̄kaowo. Ke ndinam ntre, mmọ ẹkabade ẹdi akpan ubak ndutịm ukaraidem. Nte ededi, Jesus ama ọdọhọ ete ke mme anditiene enye ikpenyeneke ndidi ‘ubak ererimbot.’ (John 15:19; 17:16; James 4:4) Ke n̄kemuyo ye mme ikọ oro, Mme Ntiense Jehovah ẹda ata san̄asan̄a ẹkpọn̄ mme en̄wan ukaraidem. Ndien, nte n̄wedmbụk n̄kpọntịbe Italy oro Fuoripagina eketịn̄de, mmọ “inyịkke n̄kpọ ndomokiet idori owo ndomokiet; kpukpru owo ẹnyene ifụre ndinyịme m̀mê ndisịn se mmọ ẹtịn̄de.” Nso idi utịp? Emem emem etop Bible eke Mme Ntiense edemede udọn̄ kpukpru orụk owo, idem mbon oro ini kiet ko ẹkedide mme andisọn̄ọ nyịre ke akpan ukpepn̄kpọ.—Isaiah 2:2, 3.
Ererimbot Emi Enyenede Nti Ido Uwem
Mme Ntiense ẹfiọk nte ke mme owo ikemeke ndikọk mme mfịna oro ẹbuanade mme andisọn̄ọ nyịre ke akpan ukpepn̄kpọ. Afo ukemeke ndinyenyịk owo enịm Abasi ke akpanikọ m̀mê enyịme mme ukpepn̄kpọ ido ukpono fo. Ndikere ke ẹkeme ndinam utọ n̄kpọ oro ada ekesịm ndusụk ndiọk-n̄kan n̄kpọndịk ke mbụk, utọ nte Ekọn̄ Ido Ukpono, Ukara Ufịk Ido Ukpono eke ntọn̄ọ ntọn̄ọ eyo ntatenyịn, ye edinam oro ẹkenamde mbon India ẹtode America “ẹkabade esịt.” Nte ededi, edieke afo ọbuọtde idem ke Abasi, afo eyenyịme ndiyak mme n̄kpọ nsịn enye ke ubọk.
Nte Bible ọdọhọde, Abasi emenịm udomo ini emi enye ayakde mme owo ẹbiat ibet esie ndien ke ntem ẹnamde ẹkop ndutụhọ ye ubiak. Ini oro ekpere ndikụre. Kan̄a kemi, Jesus ke akara nte Edidem ke Obio Ubọn̄ Abasi eke heaven, ndien ibịghike Obio Ubọn̄ oro ayanam n̄kpọ ndisio mme ukara owo mfep nnyụn̄ nnyene ọyọhọ odudu ke edinọ ubonowo ndausụn̄ ke usen ke usen. (Matthew 24:3-14; Ediyarade 11:15, 18) Utịp edidi paradise ofụri ererimbot emi emem ye edinen ido ẹdidude barasuene. Adan̄aoro eyịghe ididụhe aba iban̄a usụn̄ nte ẹkpetuakde ibuot ẹnọ ata Abasi. “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (Psalm 37:29) Nti edu oro ẹbịghide utọ nte ima-mfọnido, akpanikọ, unenikpe, ye eti ido ẹyekan ke ufọn kpukpru mme okopitem ubonowo.
Ke asakde iso ese ini oro, andiwet psalm etịn̄ ke ido uto ete: “Ima ye akpanikọ ẹmesobo ọtọ kiet; edinen ye emem emetịm kiet eken inua. Akpanikọ emetịbe ke isọn̄; ndien edinen ido etie ke heaven otụk iso esie. Jehovah oyonyụn̄ ọnọ se ifọnde; ndien isọn̄ nnyịn ọyọnọ mbun̄wụm esie. Edinen ido ayasan̄a enye ke iso; oyonyụn̄ esịn nnyịn ke usụn̄ ikpat esie.”—Psalm 85:10-13.
Ke adan̄aemi nnyịn mîkemeke ndikpụhọde ererimbot, nnyịn nte mme owo kiet kiet imekeme ndikọri mme edu uten̄e Abasi idem mfịn emi. Ntem, nnyịn imekeme ndidomo ndidi mme utọ owo oro Abasi ediyomde nte mme andituak ibuot nnọ enye ke obufa ererimbot oro. Adan̄aoro nnyịn iyodu ke otu mbon nsụhọdeidem ẹmi andiwet psalm eketịn̄de aban̄a ete: “Mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.” (Psalm 37:11) Abasi an̄wam onyụn̄ ọdiọn̄ mbon oro ẹnamde uduak esie, ndien enye ọmọn̄wọn̄ọ mme utịbe utịbe n̄kpọ ọnọ mmọ ke ini iso. Apostle John ọkọdọhọ ete: “Ererimbot ke ebebe efep, ye mbumek esie; edi owo eke anamde se Abasi amade ododu ke nsinsi.”—1 John 2:17.
[Ndise ke page 7]
Mme Ntiense Jehovah ẹnọ kpukpru owo ikot ndimehe ye eti mbụk Obio Ubọn̄ Abasi
[Ebiet Ẹdade Ndise Ẹto ke page 6]
Utuenikan̄ ke page 3, 4, 5, ye 6: Printer’s Ornaments/eke Carol Belanger Grafton/Dover Publications, Inc.