Nte Afo Emeti?

Nte afo ọmọnọ ntịn̄enyịn ke mme nsiondi Enyọn̄-Ukpeme eke ndondo emi? Ke edide ntre, afo oyokụt nte edide inem n̄kpọ nditi se itienede mi:

◻ Didie ke ediwak mme ọdọ ndọ mfịn ẹtiene eti uwụtn̄kpọ oro Aquila ye Priscilla ẹkenịmde?

Aquila ye Priscilla ẹma ẹnam utom ke ediwak nsio nsio esop. Ukem nte mmọ, ediwak mme Christian eyomfịn ẹmenọ idemmọ ndiwọrọ n̄ka ebiet emi udọn̄ okponde akan. Mmọ n̄ko ẹnyene idatesịt ye uyụhọ oro otode edikụt nte mme udọn̄ n̄kpọ Obio Ubọn̄ ẹkọride ye edikeme ndikọri ọsọn̄urua itie ufan Christian.—12/15, page 24.

◻ Nso idi ekikere Bible kaban̄a n̄kpọsọn̄ mmịn?

Ekikere Bible kaban̄a n̄kpọsọn̄ mmịn ada ukem ukem. Ke n̄kan̄ kiet, Bible ọdọhọ ete ke wine edi enọ otode Abasi. (Psalm 104:1, 15) Ke n̄kan̄ eken, enye akpan edisịn idem n̄kaha. (Luke 21:34; 1 Timothy 3:8; Titus 2:3; 1 Peter 4:3)—12/15, page 27.

◻ Nso idi n̄wọrọnda n̄kpọ ke n̄wed Haggai eke Bible?

Okposụkedi n̄wed Haggai esịnede ufan̄ikọ 38 kpọt, enyịn̄ Abasi odu utịm ike 35. Utọ prọfesi oro inyeneke uwem ke ini ẹdade udorienyịn̄ oro “Ọbọn̄” ẹkpụhọ ye ọsọn̄urua enyịn̄ Jehovah.—1/1, page 6.

◻ Nso ukpepn̄kpọ ke ẹkeme ndikpep nto idiọkn̄kpọ David ye eke Manasseh?

Kpa ye oro Jehovah ekefende David ye Manasseh, irenowo ẹmi—ọkọrọ ye Israel—ẹkenyene ndiyọ mme utịp ndiọi edinam mmọ. (2 Samuel 12:11, 12; Jeremiah 15:3-5) Ke ukem usụn̄ oro, ke adan̄aemi Jehovah efende mme anamidiọk oro ẹkabarede esịt, mme utịp edinam oro mmọ mîkemeke ndibọhọ ẹkeme ndidu.—1/1, page 27.

◻ Ke ewe usụn̄ ke ‘ikpat mmọ eke ẹkwọrọde eti mbụk’ Obio Ubọn̄ Abasi “eye”? (Isaiah 52:7)

Edi ikpat ẹsinam owo asan̄a nte enye akade ndikwọrọ ikọ nnọ mbon en̄wen. Utọ ikpat oro enen̄ede ẹda ẹban̄a owo oro. Ntre ye mbon oro ẹkopde ẹnyụn̄ ẹnamde n̄kpọ nte ọfọnde ẹban̄a eti mbụk Obio Ubọn̄, utọ ikpat mme isụn̄utom oro ke akpanikọ ẹdi ediye n̄kpọ.—1/15, page 13.

◻ Nso idi adiana-iba utom oro esịnede ke ‘ndikwọrọ eti mbụk’? (1 Corinth 9:16)

Akpa, ana nnyịn itan̄a eti mbụk Obio Ubọn̄. Udiana ikpehe utom emi esịne ndikpep mbon oro ẹnamde n̄kpọ nte ọfọnde ẹban̄a editan̄a Obio Ubọn̄ emi.—1/15, page 23.

◻ Nso ọkpọkpọ ufọn ke ẹnyene ẹto edikwọ mme ikwọ Obio Ubọn̄ ke mme mbonoesop?

Edikwọ ikwọ ọnọ nnyịn ifet ndiwụt mme ntụk oro nnyịn inyenede iban̄a Andibot nnyịn. (Psalm 149:1, 3) Ke ini nnyịn in̄wan̄ade esịt nnyịn ke ndikwọ ikwọ ke esop, emi ekeme ndinam nnyịn idu ke nnennen idaha ekikere ye esịt kaban̄a ndutịm oro etienede. Enye ekeme ndidemede nnyịn ndinyene ebuana oro okponde akan ke utuakibuot Jehovah.—2/1, page 28.

◻ Didie ke ẹkeme ndidọhọ ke usen n̄kpa ọfọn akan usen emana? (Ecclesiastes 7:1)

Usen n̄kpa ekeme ndifọn n̄kan usen emana edieke edide etisịm ini oro owo enyene eti enyịn̄ ye Jehovah, emi ekemede ndinam mme anam-akpanikọ oro ẹkekpan̄ade ẹset. (John 11:25)—2/15, page 12.

◻ Ntak emi n̄wed Ecclesiastes akpan̄wamde nnyịn ke idem nnyịn?

Enye ekeme ndin̄wam nnyịn owo kiet kiet inyene nnennen ekikere ke uwem ye se idade ke akpan n̄kpọ. (Ecclesiastes 7:2; 2 Timothy 3:16, 17)—2/15, page 16.

◻ Nte Mme Ntiense Jehovah ẹdi mme andisọn̄ọ nyịre ke akpan ukpepn̄kpọ?

Baba. Ke adan̄aemi mmọ ẹnyenede mme ukpepn̄kpọ ido ukpono ẹmi ẹsọn̄ọde ẹnịm ke akpanikọ, mmọ idịghe mme andisọn̄ọ nyịre ke akpan ukpepn̄kpọ ke usụn̄ifiọk oro ẹdade ikọ oro ẹtịn̄ ikọ. Mmọ isịnke idem ke ndida mme usụn̄ ediwụt unana edinyịme ye afai n̄n̄wana ye mbon oro mînyịmeke ye ekikere mmọ. Mmọ ẹkpebe Adausụn̄ mmọ, Jesus Christ.—3/1, page 6.

◻ Nditre ndifiọk nnennen ini emi Jesus edidide ndinọ ubiereikpe Abasi enyene nso utịp ke idem mme Christian?

Emi anam mme Christian ẹdu ke ukpeme onyụn̄ ọnọ mmọ ifet ke usen ke usen ndiwụt ke mmimọ inam n̄kpọ Jehovah ye unana ibụk.—3/1, page 13.

◻ Nso ke nnyịn ikpenyene ke ekikere mbemiso idade ekemmọ eyenete oro owode nnyịn ika esop?

Nnyịn ikpenyene ndikere mban̄a mme utịp oro emi ekemede ndinyene ke idem nnyịn, ke idem mbon efen oro ẹbuanade, ke idem esop, ye ke idem mbon an̄wa. (1 Corinth 6:7)—3/15, page 22.

◻ Didie ke ẹkeme ndinyene ata inemesịt?

Ata inemesịt edi idaha oro otode esịt, ọkọn̄ọde ke ata mbuọtidem ye eti itie ebuana ẹnyenede ye Jehovah. (Matthew 5:3)—3/15, page 23.

◻ Nso ke Christian akpanam ke ini ẹkotde ete edinam utom ukpe ikpe?

Ana Christian kiet kiet oro ẹkotde edinam utom ukpe ikpe ebiere se enye akpanamde, ọkọn̄ọde ke ifiọk oro enye enyenede ke Bible ye ubieresịt esie. (Galatia 6:5)—4/1, page 29.