Ibọrọ Oro Akamade N̄kpọ-Ata

CATHOLIC HERALD, n̄wedmbụk n̄kpọntịbe Roman Catholic eke mbon Britain, ke ndondo emi ama emịn̄ leta oro etienede mi aban̄a andikot kiet ke Wales: “Okoneyo kiet, Mme Ntiense Jehovah iba ẹma ẹwaha enyịnusụn̄ mi. Mma n̄n̄wana ndọhọ ke edi Ufọkabasi Catholic ọsọn̄ọ owụt nte Obufa Testament oro mmọ ẹkekotde ẹto edide akpanikọ. Ke n̄kpaidem mi, owo mmọ kiet ama enyịme. ‘Ih,’ enye ama ọdọhọ, ‘mbufo ẹmesọn̄ọ ẹwụt enye edi mbufo inamke enye. Jesus ọkọdọhọ, “mbufo ẹma kiet eken kpa nte n̄kamade mbufo,” edi mbufo ẹmesiwot kiet eken. Ke ekọn̄ oro okokụrede, mbon Catholic ẹma ẹwot mbon Catholic, edi owo Ntiense Jehovah ndomokiet ikowotke [ekemmọ] Ntiense.’ Nso ke n̄kekeme ndinam akan ndinyịme? Nnyịn ikeme didie ndibọn̄ akam nyom edidianakiet ye ‘nditọete [nnyịn] oro mîdịghe ikọt nnyịn’ ke ini ata edidianakiet mîdụhe ke otu idem nnyịn? Nte nnyịn ikpebemke iso inen̄ede idiọk enyịn̄ emi?”—John 15:12.

Ekọn̄ ererimbot mbiba eke ọyọhọ isua ikie 20 emi ẹketọn̄ọ ke Christendom ndien ẹma ẹda n̄kpọ nte uwem owo miliọn 50 esịm 60. Ẹkeme nditịn̄ ke akpanikọ, nte ededi, ẹte ke Mme Ntiense Jehovah iketieneke ibuana ke mme ekọn̄ oro, m̀mê mmọ nditiene mbuana ke mme en̄wan ekededi oro ẹkade iso idahaemi. Didie ke emi ekeme nditịbe? Ọkpọfọn afo odụn̄ọde ekese efen efen aban̄a okopodudu mbọbọ ima ye edidianakiet Christian ẹmi se ibede Mme Ntiense Jehovah miliọn ition ẹnyenede ke ofụri ererimbot.—Men Isaiah 2:4 domo.

[Ebiet Ẹdade Ndise Ẹto ke page 32]

U.S. National Archives photo