Mmọ Ẹma Ẹnam Uduak Jehovah

Elijah Emenede Abasi Akpanikọ ke Enyọn̄

ENYE ekedi eren oro ẹkeyomde ẹkan ke Israel ndimụm. Ke akpanikọ ẹkpekewot enye edieke edidem okpokokụtde enye. Anie ekedi eren oro ẹkeyomde mi? Elijah prọfet Jehovah.

Edidem Ahab ye okpono ndem an̄wan esie, Jezebel, ẹma ẹnam utuakibuot nnọ Baal ọyọhọ Israel. Nte utịp, Jehovah ama anam edịm okûdep ke idụt oro, emi ekedide ọyọhọ isua inan̄ ke emi. Jezebel oro okokopde iyatesịt ama ọtọn̄ọ ndinam ẹwot mme prọfet Jehovah, edi Ahab ekenen̄ede oyom Elijah. Edi Elijah ọkọdọhọ Ahab ke se iwakde ikan isua ita ẹmi ẹkebede ete: “Mbara ye edịm ididụhe ke mme isua ẹmi, ke mîtoho ke uyo mi.” (1 Ndidem 17:1) Ndien unana edịm oro ama osụk aka iso.

Ke idaha oro akamade n̄kpọndịk mi, Jehovah ama asian Elijah ete: “Ka kowụt Ahab idemfo; ndien nyanam edịm edep ke iso isọn̄.” Ke esịnde idem ke ata itiendịk, Elijah ama anam ewụhọ Jehovah.—1 Ndidem 18:1, 2.

Mme Asua Iba Ẹsobo

“Nte edi afo odutụhọ Israel?” ntre ke Ahab okobụp, ke okụtde Elijah. Elijah ama ọbọrọ uko uko ete: “Idịghe ami ndutụhọ Israel; edi afo, ye ufọk usọ (ẹnam), koro mbufo ẹkpọn̄de mbet Jehovah, koro afo onyụn̄ etienede Baalim.” Ekem Elijah ama ọnọ uyo ete ofụri Israel ẹsop idem ke Obot Carmel, esịnede “mme prọfet Baal ikie inan̄ ye aba ye duop, ye mme prọfet Asherah owo ikie inan̄.” Ekem Elijah ama etịn̄ ikọ ọnọ otuowo oro ete: “Adan̄a didie ke mbufo ẹsọk ukot ke edem mbiba?a Edieke Jehovah edide Abasi, mbufo ẹtiene enye: edi amaedi Baal, ẹtiene enye.”—1 Ndidem 18:17-21.

Mme owo oro ẹma ẹdop uyo. Ndusụk mmọ ẹma ẹkụt ndudue mmọ ke ndikpu ndinọ Jehovah san̄asan̄a utuakibuot. (Exodus 20:4, 5) Mîdịghe ekeme ndidi nte ke esịt mmọ ama enen̄ede odoro ufiọn tutu mmọ ikekwe idiọkn̄kpọ ndomokiet ke ndibahade nsọn̄ọnda mmọ nnọ Jehovah ye Baal. Ke idaha ekededi, Elijah ama ọnọ mme owo uyo ete ẹda enan̄ iba ẹdi—kiet enyene mme prọfet Baal ndien enye eken enyene imọ. Ẹma ẹdiọn̄ enan̄ iba ẹmi ndida nnam uwa, edi owo ikenyeneke ndisịn ikan̄. Elijah ama ọdọhọ ete: “Mbufo ẹkot enyịn̄ abasi mbufo, ndien ami nyokot enyịn̄ Jehovah; ndien yak Abasi emi edidade ikan̄ ọbọrọ edi Abasi.”—1 Ndidem 18:23, 24.

Ẹmenede Jehovah ke Enyọn̄

Mme prọfet Baal ẹma ẹtọn̄ọ ‘ndinek unek n̄kanade itieuwa oro mmọ ẹkenamde.’ Mmọ ẹma ẹda ofụri usenubọk oro ẹfiori ẹte: “O Baal, yere nnyịn.” Edi Baal ikeyereke. (1 Ndidem 18:26) Ekem Elijah ama abian̄a mmọ ete: “Mbufo ẹsọn̄ uyo ẹkot: koro enye edide abasi.” (1 Ndidem 18:27) Mme prọfet Baal ẹma ẹkam ẹtọn̄ọ ndida ikwa ye akadan̄ n̄kpi idem mmọ—edinam oro mme okpono ndem ẹsiwakde ndinam man ẹdemede mbọm ke esịt mme abasi mmọ.b—1 Ndidem 18:28.

Ebe ufọt uwemeyo ke emi, ndien mme andituak ibuot nnọ Baal ke ẹka iso “ẹdama nte idat”—kpa ikọ ke udọn̄ikọ emi ọnọde ekikere aban̄a idat idat edinam ye unana mfara idem. Ke utịt uwemeyo, Elijah ke akpatre ama ọdọhọ kpukpru owo ete: “Mbufo ẹsan̄a ẹkpere mi.” Kpukpru owo ẹma ẹwụk enyịn ẹse nte Elijah ọdiọn̄de itieuwa Jehovah, etịbi isọn̄ akanade enye, abak enan̄ mbai mbai, onyụn̄ odori enye ke itieuwa ye ifia ndida mbara ikan̄. Ke oro ebede, ẹma ẹn̄wan̄a mmọn̄ ẹduọk ke enan̄, itieuwa, ye ifia, ndien ukpe ama ọyọhọ ye mmọn̄ (nte eyịghe mîdụhe ekedide mmọn̄ inyan̄ ẹkebọde ẹto Inyan̄ Mediterranean). Ekem, Elijah ama ọbọn̄ akam ọnọ Jehovah ete: “Ke ami nnyụn̄ ndi owo fo, ke nnyụn̄ nnam kpukpru n̄kpọ ẹmi ke uyo fo. Yere mi, O Jehovah, yere mi, man mbio ẹmi ẹfiọk ẹte ke afo edi Jehovah Abasi mmimọ, ẹte ke afo onyụn̄ akabade esịt mmọ ẹfiak.”—1 Ndidem 18:29-37.

Ke mbuari, ikan̄ ama oto ke enyọn̄ osụhọde “ata uwa oro, ye ifia, ye itiat, ye ntọn̄, onyụn̄ edei mmọn̄ emi odude ke ukpe.” Mbon oro ẹkedade ẹse ẹma ẹduọn̄ọ inikiet inikiet ke isọn̄, ẹdọhọde ẹte: “Jehovah edi Abasi! Jehovah edi Abasi!” Ke uyo Elijah, ẹma ẹmụm mme prọfet Baal ẹnyụn̄ ẹda mmọ ẹsụhọde ke akpa Kishon, ke ebiet emi ẹkewotde mmọ.—1 Ndidem 18:38-40.

Ukpepn̄kpọ Odude ọnọ Nnyịn

Elijah ama owụt se ikpetiede nte uko oro akande odudu owo. Kpa ye oro, James andiwet Bible ọsọn̄ọ ọnọ nnyịn ete ke “Elijah ekedi owo emi enyenede mbiet uduot nnyịn.” (James 5:17) Enye ikọbọhọke ndusụk udomo ndịk ye editịmede esịt. Ke uwụtn̄kpọ, ke ini Jezebel ke ukperedem ọkọn̄wọn̄ọde ndisio usiene kaban̄a n̄kpan̄a mme prọfet Baal, Elijah ama efehe ndien ekem ofiori okot Jehovah ke akam ete: “Ekem ndien; O Jehovah, kam bọ mi uwem.”—1 Ndidem 19:4.

Jehovah ikadaha uwem Elijah ke n̄kpa. Utu ke oro, enye ke mbọm ama ọnọ un̄wam. (1 Ndidem 19:5-8) Mme asan̄autom Abasi mfịn ẹkeme ndinyene mbuọtidem nte ke Jehovah ayanam ukem oro ke ini mmọ ẹsobode mme ini n̄kpọsọn̄ editịmede esịt, ndusụk ke ntak ubiọn̄ọ. Ke akpanikọ, edieke mmọ ẹbọn̄de akam ẹyom un̄wam Jehovah, enye ekeme ndinọ mmọ “akwa ubom odudu,” man idem ọkpọkọm mmọ ẹkokop “mfịghe ke kpukpru edem,” mmọ ‘ididụhe ke mbaba.’ Ntem, ẹyen̄wam mmọ ndiyọ, nte ẹken̄wamde Elijah.—2 Corinth 4:7, 8.

[Mme Ikọ idakisọn̄]