Mme Mbụme Ẹtode Mme Andikot
Nte ekemde ye Matthew 17:20, mme apostle ikekemeke ndikọk eyeneren oro okokụtde ukụt ‘ke ntak ekpri mbuọtidem mmọ.’ Nte ededi, ke Mark 9:29 ẹyịri unana ukeme mmọ ndikọk ye ufọn edibọn̄ akam. Ntak emi ẹnọde nsio nsio ntak ke nsio nsio mbụk Gospel?
Ke nditịm ntịn̄, mbụk iba ẹmi ẹnam kiet eken ọyọhọ, ituahake-tuaha. Akpa, se Matthew 17:14-20. Eren kiet ama ọtọt ete ke eyen imọ ọdọn̄ọ ndisi edi ke mme mbet Jesus ikekemeke ndikọk enye. Ekem Jesus ama ọkọk enye ebe ke ndibịn demon oro okotụhọrede enye nsio. Mme mbet ẹbụp ntak emi mmimọ mîkekemeke ndibịn demon oro nsio. Nte ekemde ye mbụk Matthew, Jesus ama ọbọrọ ete: “Oto ke ntak ekpri mbuọtidem mbufo. Koro ke akpanikọ ke ndọhọ mbufo, Edieke mbufo ẹkpenyenede mbuọtidem nte n̄kpasịp mustard, mbufo ẹkpedọhọ obot emi ete, daha kpọn̄ ọtọ emi, kowụhọ ko, ndien enye ayadaha: baba n̄kpọ kiet idinyụn̄ isọn̄ke ikan mbufo.”—Sịghisịghi ubọkn̄wed edi eke nnyịn.
Ke emi kụbọde ka Mark 9:14-29, ke ebiet ikụtde ọyọhọ ntọt efen efen. Ke uwụtn̄kpọ, Mark 9:17 ọnọ ọyọhọ ntọt ete ke idaha enye emi orụk ediduọ ndisi emi okoto idiọk spirit. Odot ẹtịm ẹfiọk nte ke Bible ọdọhọ ke ebiet en̄wen nte ke Jesus ama ọkọk mbon ndisi ye mbon oro ẹnyenede demon. (Matthew 4:24) Ke n̄wọrọnda idaha enye emi, ediduọ ndisi ẹmi okoto “spirit imụm ye inan,” oro edi, idiọk spirit, emi abiausọbọ oro Luke ọsọn̄ọde. (Luke 9:39; Colossae 4:14) Tịm fiọk ubak udịmikọ oro ke Mark 9:18, “ọtọ nte [demon] oro omụmde enye.” Ntre demon oro ikesifịnake eyen oro kpukpru ini, ekedi ke ini ke ini kpọt. Kpa ye oro, mme mbet ikekemeke ndibịn demon oro nsio nnyụn̄ n̄kọk eyen oro. Ke ini mmọ ẹkebụpde ntak, Jesus ama ọbọrọ ete: “Orụk emi ikemeke ndiwọrọ, ibọhọke ke akam.”
Ndikot mbụk Mark ye ntịn̄enyịn, nte ededi, owụt nte ke ntuaha ndomokiet idụhe ye se Matthew ekewetde. Ke Mark 9:19, nnyịn ikot ite ke Jesus ama ofụhọ aban̄a unana mbuọtidem emana oro. Ndien ke Mr 9 ufan̄ikọ 23, ẹwet nte ke enye ama ọdọhọ ete eyen oro ete: “Kpukpru n̄kpọ ẹkeme ndiwọrọ nnọ enye emi ọbuọtde idem.” Ntre Mark n̄ko odori nsọn̄uyo ke ufọn mbuọtidem. Edi n̄kukụre nte ke Mr 9 ufan̄ikọ 29, Mark ọnọ udiana ọyọhọ ntọt efen. Mark adian se Jesus eketịn̄de aban̄a akam, emi Matthew ye Luke mîkesịnke.
Nso, ndien, ke nnyịn ikeme ndidọhọ? Ke mme idaha efen apostle 12 ye mbet 70 ẹma ẹbịn ndiọi spirit ẹduọn̄ọ. (Mark 3:15; 6:13; Luke 10:17) Edi ke idaha enye emi mme mbet ikekemeke ndibịn demon oro nsio. Ntak-a? Edieke nnyịn idiande ọyọhọ ntọt oro ẹtịn̄de ke nsio nsio mbụk, inyene ndibiere nte ke mmọ iketịmke idem ndinam ntre ke idaha enye emi. Eyedi ubak mfịna ekedi ke ntak orụk demon oro akabuanade, sia etiede nte ke mme demon ẹsikpụhọde ke uduot, udọn̄, ye ke mme ukeme. Ke enye emi, ama oyom ata ọkpọsọn̄ mbuọtidem ye akam ofụri esịt kaban̄a un̄wam Abasi. Nte ededi, Jesus ama enyene orụk mbuọtidem oro. Enye n̄ko ama enyene ibetedem Andikop akam, Ete esie. (Psalm 62:2) Jesus ikenyeneke sụk ukeme ndikọk eyen oro okokụtde ukụt ke ndibịn demon oro nsio edi enye ama anam ntre.