Ntọt Mme Anditan̄a Obio Ubọn̄

Kûtre Ndikwọrọ Eti Mbụk

KE INI mme anam ndụn̄ọde mbon Europe ke akpa ini ẹkekade Itụn̄ Inyan̄ibom Venezuela ye N̄kpọdiọhọ Mmọn̄ Maracaibo, n̄kpri ufọk n̄kanya ẹmi ẹbọpde ke nnyan eto ẹmi ẹwụkde ke edisa mmọn̄ oro ẹkeyọhọ mbenesụk. Ndise oro ama anam owo eti Venice, Italy, emi mme owo ẹbọpde ufọkidụn̄ mmọ ke mben mmọn̄. Mme anam ndụn̄ọde oro ẹsemde Spanish do ẹma ẹnọ ikpehe oro enyịn̄ oro Venezuela, emi ọwọrọde “Ekpri Venice.”

Mfịn, orụk ubọpn̄kpọ efen, eke spirit, ke aka iso ke ediye idụt emi. Mme Ntiense Jehovah ẹsịn idem do ke nditọ n̄kpasịp Obio Ubọn̄ ke kpukpru idaha oro odotde. Utịp edide idọk eke spirit ada ekese itoro ọsọk “Enyene-idọk,” kpa Jehovah Abasi.—Matthew 9:37, 38.

Ke ini esenyịn oro asan̄ade-san̄a akakade ekese esop ke stet Zulia ke edere edere n̄kan̄ edem usoputịn Venezuela, Mme Ntiense n̄kann̄kụk ẹma ẹnam ndutịm ẹnọ enye ye n̄wan esie ndika n̄kese n̄kpet n̄kpet ekpri isuo ẹkotde Toas. Ke adan̄aemi ẹdade ke udịm ẹbet nsụn̄ikan̄ emi edikade isuo oro ke tụhitụhi usenubọk, n̄wan esenyịn oro asan̄ade-san̄a do, Mery, ama ọdọhọ nsan̄a esie, eyenete an̄wan oro edide asiakusụn̄ ofụri ini, ete yak mmimọ inyene nneme ye ndusụk mme anamutom ke nsụn̄ikan̄ oro. Eyenete an̄wan oro edide asiakusụn̄ do ama enyịme.

Ke asan̄ade ekpere ọdiọn̄ n̄kpọ kiet, Mery ama ọnọ n̄wed oro Ifiọk Oro Adade Osịm Nsinsi Uwem. Enye ama owụt eren oro ibuotikọ oro “Ndibọp Ubon Oro Okponode Abasi,” oro eketiede nte ke eren oro ama ama. Ekem Mery ama anam an̄wan̄a nte ke ebede ke ndikama n̄wed emi, ẹkeme ndikpep enye n̄kpọ ke Bible ke ufọk esiemmọ. Enye ama ọbọ n̄wed oro, ndien ẹma ẹnam ndutịm man owo aka ebịne enye ke ufọk.

Esisịt ini ke oro ebede, akpan mbono usen kiet ama odu ke ikpehe oro. Nso n̄kpọ n̄kpaidem ke ekedi ntem ọnọ Mery ndikụt ọdiọn̄ n̄kpọ emi, Ete Nava, do, ke adianade ye n̄wan ye n̄kpri nditọ esie iban iba! Mery ama obụp n̄wan se enye ekekerede aban̄a ukpepn̄kpọ Bible ubon mmọ. Ibọrọ esie ama enen̄ede akpa owo idem.

Enye ọkọdọhọ ete: “Mmọkọm Jehovah mban̄a nnyịn ndikpep akpanikọ.” Ekem enye ama anam an̄wan̄a. “Ke ini afo ekenyenede nneme ye ebe mi, enye ndikosụk n̄kpọn̄ mi mbịne n̄wan en̄wen ekedi oro. Enye ekedi ọn̄wọn̄-n̄kpọ-owo n̄ko. Ndusụk ini ke enye akpade mmịn, enye ama esitọk owo, emi ekpri obio isuo emi mîkamaha. Enye ama esibụp ekpo n̄ko. Nte ededi, ifiọk Bible oro enye enyenede oto ukpepn̄kpọ esie aman̄wam enye anam ikpọ ukpụhọde ke uwem esie. Enye ọmọkpọn̄ ofụri ndedehe edinam esie. Ete ye eka esie, ẹmi ẹdide mbon Catholic, ẹmenen̄ede ẹkop inemesịt ẹban̄a mme ukpụhọde ẹmi. Mmọ ẹkop inemesịt nte ke idahaemi enye edi ebe ye ete oro ọdiọn̄ọde idem.”

Ete Nava ama ana baptism ke 1996 onyụn̄ anam utom idahaemi nte asan̄autom uyọhọ ini. N̄wan esie, Jenny, ama ana baptism ke 1997. Ọbọn̄ obio oro ama enen̄ede okop inemesịt aban̄a mme ukpụhọde oro ọdiọn̄ nsụn̄ikan̄ emi akanamde tutu enye etiene oyom ukpepn̄kpọ Bible. Nditọete iban ẹmi ẹkop inemesịt didie ntem nte ke mmimọ iketreke ndikwọrọ eti mbụk ke adan̄aemi ikadade ibet nsụn̄ikan̄ usenubọk oro!

[Mme ndise ke page 7]

Ndibuana eti mbụk ye ọdiọn̄ nsụn̄ikan̄ ama ada mme utịp oro ẹkamade inemesịt edi