Ntọt M’Ọkwọrọ Obio Ubọn̄

“Abasi Iten̄eke Owo Enyịn”

KE ISUA ikie efụtenan̄ ẹmi ẹkebede, apostle Peter oro ẹkenọde odudu spirit ama ọdọhọ ete: “Abasi iten̄eke owo enyịn: edi ke kpukpru idụt Enye adadara owo ekededi eke abakde Enye onyụn̄ anamde nti ido.” (Utom 10:​34, 35) Ke otu Mme Ntiense Jehovah ẹsikụt mme owo ẹtode kpukpru orụk ye mme idaha ido ukpono. Mmọ ẹyom edinen ido, mmọ ẹnyụn̄ ẹbak Abasi. Jehovah amadara kpukpru mmọ ke n̄ka obufa ererimbot, nte, ke uwụtn̄kpọ, enye akanamde ye n̄wan kiet ke Chad.

N̄wan emi ikokopke uyụhọ ke ido ukpono esie. Ke ediwak isua ẹmi ẹkebede enye ama ọbọ n̄wed Uyen Fo​—⁠Ndibö se Itimde Ifön Ikan nto Enye, emi Mme Ntiense Jehovah ẹmịn̄de, ndien enye ama ama nti item oro ẹdọn̄ọde ke n̄wed emi. Ẹma ẹtọn̄ọ ukpepn̄kpọ Bible, ndien enye ama esidu kpukpru ini ndikpep n̄kpọ. Nte ededi, ke ini ẹkesịnde udọn̄ ẹnọ enye ndidụk mme mbonoesop ke Ufọkmbono Obio Ubọn̄, enye ikanamke n̄kpọ iban̄a oro. Ntak-⁠a? Okposụkedi ebe esie mîkọbiọn̄ọke enye ndikpep n̄kpọ, enye ikonyịmeke n̄wan emi odụk mme mbonoesop ke Ufọkmbono Obio Ubọn̄.

Ke ini n̄wanndọ emi okoyomde ndidụk mbono circuit, Ntiense oro esinịmde ukpepn̄kpọ oro ama owụt ebe n̄wed ndutịm, onyụn̄ etịn̄ aban̄a nti item oro ẹdinọde. Enye ama onyịme n̄wan esie ndika “ini kiet kpọt.” N̄wan emi ama odụk onyụn̄ adara ndutịm oro mfọn mfọn. Ke enye ama eketịn̄ se enye ekekpepde ọnọ ebe esie, enye ikọbiọn̄ọke n̄wan emi ndidụk mme mbonoesop eken. Akpanikọ oro nte ke esop ekesịne mme owo ẹtode nsio nsio ekpụk ẹmi ẹkerede ẹban̄a kiet eken ama otụk enye ke idem. Ke ukperedem n̄wan emi ama odụk mbono district onyụn̄ odu ke akwa n̄kpaidem ndikụt nditọ esie ẹtiede ke ukot mme Ntiense ẹtode idụt efen. Mme Ntiense ẹma ẹbuana udia ye nditọ esie, ndien enye ama odu ke n̄kpaidem ndikụt ẹnyenede ima ẹnọ mmọ ke ofụri ofụri nte n̄kpọ eke edide akamba ubon kiet. Emi ekedi akpan ini edinam ukpụhọde ọnọ enye.

Edi ubiọn̄ọ ama etiene. Okposụkedi edide owo o-⁠bụt ke obot, enye ama ọtọn̄ọ ndinọ ibọrọ ke mme mbonoesop onyụn̄ esiyọ mme etikwo etikwo ndutịn̄ oro mme iman ye mme mbọhọidụn̄ ẹkesitịn̄de uko uko. Ke ofụri ediwak isua ẹmi enye odude ye ebe esie, mmọ n̄kukụre ẹkedọ ndọ oro mmọ mbiba ẹnyịmede. Didie ke enye editọn̄ọ nneme kaban̄a edidọ ndọ nte ekemde ye ibet? Ke ama ọkọbọn̄ akam ofụri esịt ọnọ Jehovah, enye ama eneme n̄kpọ emi ye ebe esie, emi ọkọdọhọde ke imọ iyese iban̄a oro. Ke akpatre enye ama anam ntre, ndien n̄wan ye ebe emi ẹma ẹdọ ndọ nte ekemde ye ibet.

Eyeneka ebe an̄wan emi okodụn̄de ye mmọ ama esịn ekese ntịme, edi ebe ama ọsọn̄ọ ada ke n̄kan̄ n̄wan esie. Ekem ete-ebe ama edi ndise mmọ. Enye ama ọnọ eyen esie uyo ete osio n̄wan esie ndọ, sia enye ama okokpụhọ ido ukpono esie. Ete ama asian eyen esie ete ke imọ iyekpe okụk n̄kpọ ndọ ke ibuot “n̄wan oro ọfọnde akan.” Ibọrọ eyen ekedi: “Baba, ndinamke oro. Enye edi eti n̄wan. Edieke enye oyomde ndinyọn̄, enyeoro edi isio isio n̄kpọ, edi ami ndidọhọke enye ọnyọn̄.” N̄wan emi ama enyene eti edu ye ete-ebe esie, ndien enye ama okop bụt aban̄a eduuwem esie. Nte ededi, ke enye ama akafiak ọnyọn̄ obio-in̄wan̄ esie, enye ama ewet eyen esie, isan̄ enyeemi onịmde ini. Enye ọkọdọhọ ete ke edieke eyen esie esịnde ndibịn n̄wan esie ọnyọn̄, ke enye ididịghe eyen imọ aba. Inikiet efen eyen emi ama ada ye n̄wan esie. Kere ban̄a idatesịt emi n̄wanndọ oro ekenyenede ndikụt ebe esie anamde utọ ubiere oro.

Idahaemi n̄kpri nditọiren mmọ iba ẹsima nditiene eka mmọ n̄ka Ufọkmbono Obio Ubọn̄. Mmọ ẹma ẹkam ẹdọhọ ete mmọ ọnọ mmimọ tai, sia mmọ ẹsikụtde kpukpru nditọete iren oro ẹnọde utịn̄ikọ ẹbọbọde mmọ. Mfịn n̄wan emi edi eyenete an̄wan oro ama akana baptism.

Enye edi kiet ke otu mme okop-inemesịt mme Ntiense 345 ke Chad ẹmi ẹkwọrọde eti mbụk Obio Ubọn̄ Jehovah ẹnyụn̄ ẹdarade ete, ke akpanikọ, “Abasi iten̄eke owo enyịn.”