Ntọt M’ọkwọrọ Obio Ubọn̄
“Ọfọfọn Ọnọ Owo eke Osịmede Eti Ibuot”
ẸMA ẹkụt nte n̄ke emi edide akpanikọ ke Korea, ke ebiet emi enyenede se iwakde ibe Mme Ntiense Jehovah 71,000 ẹmi ẹdude ke inemesịt idahaemi. (Mme N̄ke 3:13) Ndien kam kere, mbahade 42 eke ikie ke otu mme asan̄autom ẹmi ẹdu ke utom uyọhọ-ini! Mme ifiọkutom ẹmi ẹtienede mi ẹyewụt nte ke inemesịt edi udeme mmọ oro ẹyomde ata eti ibuot.
N̄wan kiet ke Pusan ama esika kiet ke otu ufọkabasi Christendom ke isua 16. Enye ama okụt ediwak edinam oro mîkemke ye N̄wed Abasi tutu enye ọtọn̄ọ ndikere ke Abasi idụhe. Ke n̄kan̄ eken, enye ikekemeke ndifan̄a nte ke Abasi idụhe, ntre enye ama ọbọn̄ akam ke esịt akpanikọ ọnọ Abasi man enye okpokụt ufọkabasi akpanikọ edieke edide utọ n̄kpọ oro odu. Ke nde emi enye ama ọsọsọp ekere aban̄a Mme Ntiense Jehovah, ndien enye ama eti ete ke ufọkabasi imọ ama esise mmọ ke usụhọde onyụn̄ ọnọ mme aka ufọkabasi ntọt aban̄a mmọ sia Mme Ntiense mînịmke Abasi-Ita-ke-Kiet, ikan̄ hell, ye mme ukpepn̄kpọ Christendom eken ke akpanikọ. Ekeme ndidi mmọ edi ufọkabasi akpanikọ? Ye un̄wam mbọhọidụn̄ kiet n̄wan emi ama okụt ebiet oro Ufọkmbono Obio Ubọn̄ odude. Ke ndan̄nsiere oro, enye ama odụk mbonoesop.
N̄wan oro ama okop n̄kpaidem ke nte ẹkenamde n̄kpọ ke nde ke nde ke mbonoesop. Idat idat mfiori m̀mê ikwọ nduaidem ikodụhe nte ẹkam ẹsinamde ke ufọkabasi esie. Ẹma ẹda enye ẹkewụt Ntiense kiet oro okonyịmede ndikpep Bible ye enye, ndien akpa ukpepn̄kpọ ama ebịghi ke ediwak hour ke ntak ekese mbụme esie. Ke udiana ukpepn̄kpọ, enye ama ọtọt ete ke imọ imọn̄ isịn n̄wed iwọrọ ke ufọkabasi imọ ndien ikabade idi Ntiense. Enye ama etịn̄ ọnọ eyenete an̄wan oro ete ke imọ idiyomke ukpepn̄kpọ aba, sia edide imọ iyekam isidụk mme mbonoesop. Nte ededi, ẹma ẹwụt enye ufọn ndinyene ọkpọkpọ ukpepn̄kpọ Bible ke adianade ye edidụk mme mbonoesop. Enye ama onyịme ekikere oro, esịn idem ke ukpepn̄kpọ esie, onyụn̄ ana baptism ke mîbịghike.
Idahaemi enye enen̄ede okop inemesịt nte ke imọ imokụt eti ibuot oro enyenede Abasi akpanikọ, Jehovah, onyụn̄ enyene idotenyịn ndidu uwem ke nsinsi ke obufa ererimbot Abasi.
Akwa Owoekọn̄ Oro Ama Ọkọkpọn̄ Utom Ekpep Akpanikọ
N̄wan akwa owoekọn̄ kiet akana baptism ke 1962. Ebe esie ama esibiọn̄ọ enye ke akpa, edi nte ini akade enye ama etre ndibiọn̄ọ enye, ndien ke ini ke ini ke ufan̄ isua 28 oro eketienede, nsio nsio nditọete iren ẹma ẹsikpep n̄kpọ ye enye, ẹdomode ndinam enye enyene udọn̄ ke akpanikọ. Enye ama esidụk ndusụk mbonoesop ye ikpọ mbono, edi enye ekedi kiet ke otu mme owo oro eketrede ndida akpanikọ ke akpan n̄kpọ. Ke 1990 enye ye n̄wan esie ẹma ẹnam isan̄ ẹka Japan, ke ebiet emi mmọ ẹkedụkde mbono district. Ke ifet oro enye ama enen̄ede ọnọ ntotụn̄ọ n̄kpan̄utọn̄ ke utịn̄ikọ—n̄kpọ oro akanam enye mînamke. Enye ama okop n̄kpaidem aban̄a mme uko uko utịn̄ikọ oro ẹkeyararede nsunsu ido ukpono, edi ẹmi ẹma ẹnen̄ede ẹtat enye enyịn kaban̄a mbubịk oro odude ke Christendom. Nte n̄kpọ akasan̄ade ke nde ke nde ye inemesịt oro ikọt Abasi ekenyenede ke Japan, emi okonyụn̄ edide ata ukem ye se enye okokụtde ke Korea ama otụk enye ke idem. Ke afiakde ọnyọn̄ Korea, enye ama ọtọn̄ọ ndida ukpepn̄kpọ Bible esie ke akpan n̄kpọ onyụn̄ ana baptism ke akpatre.
Ntre nso ke enye akpanam ke ama akana baptism? Enye ama ọkpọn̄ itieutom esie nte adaibuot ke ọwọrọetop ufọkisen onyụn̄ adiana ye n̄wan esie ke utom usiakusụn̄ uyọhọ-ini. Enye ekere ke ndidi asiakusụn̄ ofụri ini edi mfọnn̄kan usụn̄ ndikpe utịp isua 28 oro akatakde enye ke ini enye okosụk anamde ubịghi.
Enye idahaemi edidiọn̄ọ ete ke n̄ke oro, “ọfọfọn ọnọ owo eke osịmede eti ibuot” enyene n̄kpọ n̄ko ndinam ye imọ!