Ntọt M’ọkwọrọ Obio Ubọn̄

Mme Erọn̄ Jesus Ẹkop Uyo Esie

NTE utom ukwọrọikọ atarade odụk kpukpru ikpehe isọn̄, Jehovah ebe ke mme angel esie esida mme asan̄autom esie usụn̄ ndika mbịne mbon mbieterọn̄. Mmọ ẹkop uyo Jesus ẹnyụn̄ ẹkpep ndinam n̄kpọ esie ye nsinsi uwem ke ekikere. Jesus ọkọdọhọ ke John 10:27, 28 ete: “Mme erọn̄ Mi ẹkop Mi uyo, Ami mmonyụn̄ mfiọk mmọ, mmọ ẹnyụn̄ ẹtiene Mi. Ami nnyụn̄ nnọ mmọ nsinsi uwem.” Tịmfiọk nte mbon esịt-akpanikọ ke Madagascar ẹkekopde uyo Jesus.

Owo kiet ke otu Mme Ntiense Jehovah ama ọnọ abia ibọkusọbọ emi ekedide ndise ete esie emi ọkọdọn̄ọde mme n̄wed Afo Emekeme Ndidu Uwem ke Nsinsi ke Paradise ke Isọn̄ ye Uyen Fo—Ndibö se Itimde Ifön Ikan nto Enye.

Dọkta oro ekedi owo Protestant onyụn̄ ọbiọn̄ọ Mme Ntiense ata etieti, edi enye ama okot n̄wed oro onyụn̄ okot mme itien̄wed ke Bible esie. N̄wan esie, edide owo Catholic onyụn̄ edide dọkta n̄ko, ama okot n̄wed Uyen ediwak ini koro enye ọdọhọde ke etie nte ẹkewet enye san̄asan̄a ẹnọ imọ. Edinam an̄wan̄a emi ọkọn̄ọde ke Bible oro N̄ka anamde nte 1914 edide akpan n̄kpọ an̄wan̄a ama otụk mmọ mbiba ke idem. Ebe ama osobo ye Ntiense oro ọkọnọde enye mme n̄wed oro. Ntiense oro ama ọnọ enye Life—How Did It Get Here? By Evolution or by Creation? onyụn̄ anam ndutịm ndika n̄kese eren emi ye n̄wan esie man ọbọrọ mme mbụme mmọ. Ke ini eren emi akakade okosobo mmọ, enye ama ọtọn̄ọ ukpepn̄kpọ Bible ofụri ini ye ebe ye n̄wan emi ye nditọ mmọ ita. Ẹma ẹnam n̄kọri usọp usọp ke ifiọk Bible.

Ke ẹma ẹkekụre akpa ukpepn̄kpọ, ofụri ubon ẹma ẹtọn̄ọ ndidụk mme mbonoesop ke Ufọkmbono Obio Ubọn̄ ndien ibịghike ke oro ebede ẹma ẹsịn enyịn̄ ke Ufọkn̄wed Utom Ukara Abasi. Edu nditọ ẹmi ama okpụhọde akamba akamba. Otode ke ukpepn̄kpọ Bible mmọ, mmọ ẹma ẹkpep nte ke edinịm usọrọ usen emana ye mme usen nduọkodudu ido ukpono idịghe eke Christian; ntre, mmọ ẹma ẹtre ndinịm mmọ. Ebe ama etre ndinọ iyịp esie ẹkịm ẹsịn iman esie ke idem, kpa ye oro mmọ mîkenemeke emi kan̄a ke ukpepn̄kpọ Bible mmọ. Ibịghike ọfọn̄ en̄wan esie ama osop ke itie ukọn̄ ọfọn̄ esie; enye ama ọnọ ẹda ẹsọk okịmọfọn̄ man akada okịm ọfọn̄ ọnọ nditọ esie. Enye ama ọfọp kpukpru magazine ye n̄wed ukpepn̄kpọ esie mban̄a ntantaọfiọn̄. Ọfiọn̄ ita kpọt ke mmọ ẹma ẹketọn̄ọ ndikpep n̄kpọ, ebe ye n̄wan ẹmi ẹma ẹsịn n̄wed ẹkpọn̄ nsio nsio ufọkederi mmọ ẹnyụn̄ ẹwụt udọn̄ oro mmọ ẹnyenede nditiene mbuana ke utom ukwọrọikọ. Mmọ ẹna baptism idahaemi.

◻ N̄wan kiet ke Thailand ke okoyom akpanikọ. Okposụkedi ekedide owo Ido Ukpono Buddha, enye akananam isịnke idem ke ido ukpono esie ke ntak emi enye okokụtde ekese mbubịk ye idiọkitọn̄. Ke ẹsiode oro ẹfep, nsio nsio edinam ẹma ẹdu oro enye mîkamaha. Enye ama akpa mba aban̄a kpukpru emi.

Ekem, mbọhọidụn̄ kiet ama otoro ete yak enye odomo mme Christian ese onyụn̄ ada enye aka ufọkederi Pentecostal kiet. Ke ini ederi akade iso, nte ededi, n̄wan emi ama enyene ọkpọsọn̄ udọn̄ ndiwọrọ nnyọn̄ ke ntak uyom, sia ofụri mbon oro ẹkedude do ẹkebọn̄de akam ke ọkpọsọn̄ uyo. Oro ekedi akpatre ini emi enye akakade ufọkederi oro.

Nte ini akade, n̄wan emi ama odomo ufọkederi Roman Catholic. Nte ededi, ke ama akaka ke ediwak ini, enye afiak okụt mbubịk ye idiọkitọn̄, ọkọrọ ye okpụm okpụm usụn̄uwem oro oku okodude. N̄wan emi ama okop itekesịt onyụn̄ etre ndika do. Oku ama enyene ọkpọsọn̄ udọn̄ aban̄a ntak emi enye ọkọkpọn̄de. Ke ama okokop ntak, enye ke nsahi ama ọdọhọ ete: “Edieke afo oyomde ndibuana ye mbon emi ẹnen̄erede ẹtie ukpan ukpan, ka bịne Mme Ntiense Jehovah.” N̄wan emi ama obụp ete: “Mmọ ẹdu m̀mọ̀n̄?” Oku oro ama ọbọrọ ete: “Mmọ ẹdu ẹkpere itieutom unọ mmọn̄ oko.” Ke ndan̄nsiere enye ama oyom mmọ edi ikekwe. Kpa ye oro okokụtde edikpu, n̄wan emi ama akaiso ndikere mban̄a Mme Ntiense Jehovah kpukpru ini.

Usen kiet enye ama ada okop mbọhọidụn̄ esie kiet ke nsahi ọdọhọde owo efen ete: “Ibịghike afo eyekabade edi kiet ke otu Mme Ntiense Jehovah!” Ke okopde emi, n̄wan emi ama efehe ebịne mbọhọidụn̄ emi onyụn̄ okobụp ete: “Nte Mme Ntiense Jehovah ẹdu ẹkpere mi?” “Ih,” ekedi ibọrọ. “Ndusụk mmọ ẹyedi ẹdikwọrọ ikọ ke ufọk ke ufọk ke mbọhọ emi. Afo eyeda usanaidem ye eti usụn̄ usịnen̄kpọ mmọ ọdiọn̄ọ mmọ.” Ke okopde emi n̄wan emi ama efehe ọwọrọ ndikoyom mmọ. Ke akpa enye ikekwe mmọ, edi ke ini enye akasan̄ade afiak ọnyọn̄ ufọk esie, enye ama okụt iban iba ẹsịnede ọfọn̄ ediye ediye nte ẹnemede nneme ye owo. Enye ama asan̄a ekpere onyụn̄ obụp m̀mê mmọ ẹdi Mme Ntiense Jehovah. Ke ini mmọ ẹkebọrọde ih, enye ama ekpe ye mmọ ete: “Mbọk ẹdi ufọk mi. Nyom ndinyene nneme ye mbufo.”

Ukpen̄kpọ Bible ama ọtọn̄ọ, ndien kpa ye ubiọn̄ọ ye nsahi otode mbonubon, eyenan̄wan emi ama ọtọn̄ọ ndidụk mme mbonoesop nnyụn̄ nnọ mme iman esie ikọ ntiense.

Jesus ke akpanikọ ọdiọn̄ọ mme erọn̄ esie ndien ke atan̄ mmọ obok ke esop esie kaban̄a edibọhọ ndụk edinen obufa ererimbot esie.