Ntọt M’ọkwọrọ Obio Ubọn̄
Eti Mbụk Otode Norway
MME ọkwọrọ eti mbụk Obio Ubọn̄ ẹwakde ẹbe 9,500 ke ẹnyene ediwak nti ifiọkutom ke Norway. Mbọn esịt akpanikọ ẹdiọn̄ọ ẹtop Bible oro Mme Ntiense Jehovah ẹkwọrọde nte edide akpanikọ onyụn̄ edide ibọrọ akam mmọ, nte ẹwụtde ke mme ifiọkutom ẹtienede mi.
◻ N̄wan-ye-ebe ẹdide n̄kparawa owo ẹma ẹbọn̄ akam ẹnọ Abasi ndin̄wam mmọ ẹdu uwem oro enyenede uduak. Urua kiet oro ebede Mme Ntiense Jehovah ẹma ẹwaha, ndien n̄wan esie ama ada mmọ odụk ufọk. Ẹma ẹdụri ebe utọn̄ ẹte ekpeme idem ye Mme Ntiense, ntre enye ama ọwọrọ ọkpọn̄ ufọk aka ndiyet moto esie. N̄wan esie akamana ke Lebanon onyụn̄ enyene mfịna ke usem, ntre Mme Ntiense oro ẹma ẹwụt enye enyịn̄ Jehovah ke Bible esie eke usem Arabia. Urua iba ẹma ẹkebe Mme Ntiense oro ẹma ẹfiak ẹdi, ndien ebe esie inikiet efen ama ọwọrọ aka an̄wa ndiyet moto esie. Mme Ntiense ẹmi ẹma ẹbụp n̄wanndọ oro m̀mê enye ekere ke ebe esie ekeme ndidu ke itie ini efen oro mmimọ idide man otodo enye akpakabade se ẹtịn̄de, ndien n̄wan emi ama ọdọhọ ke iyebụp ebe imọ.
Ke ediwaha ọyọhọ ita, moto oro ama asana etieti tutu eren oro ikekwe nte enye ekemede ndida oro nte ntak ndiwọrọ, ntre enye ama osụhọde etetie onyụn̄ obụp ediwak mbụme man okụt ukpụhọde oro odude ke ufọt Mme Ntiense ye ufọkederi Idụt oro, Ediwaha oro ama ẹbịghi ke hour ita, ndien ẹma ẹkpọn̄ ekpri n̄wed ẹnọ mme ọdọndọ oro. Ke Mme Ntiense oro ẹma ẹkenyọn̄, n̄wan ama odụk idap edi ebe ama ọtọn̄ọ ndikot ekpri n̄wed oro onyụn̄ okụbọde aka kpukpru itien̄wed oro ẹkesiakde. Ke ufọt okoneyo oro enye ama edemede n̄wan esie ke idap onyụn̄ ọdọhọ ete: “Afo enyene ndikot n̄kpọ emi.” N̄wan oro ama adaha ada, ndien mmọ ẹma ẹkot n̄wed oro ọtọkiet tutu osịm n̄kanika ition usenubọk. Ke ẹfiọkde ẹte mmimọ imokụt akpanikọ, mmọ ẹma ẹtua ke ntak idara ẹnyụn̄ ẹbọn̄ akam ẹnọ Jehovah, ẹdade enyịn̄ esie. Ẹma ẹtọn̄ọ ukpepn̄kpọ Bible ye mmọ, ndien mmọ ẹma ẹtọn̄ọ ndidụk mme mbonoesop. Enye ama ọkpọn̄ utom ekọn̄ esie, ndien mmọ ẹma ẹwọrọ ẹkpọn̄ ufọkederi mmọ ẹnyụn̄ ẹtre ndin̄wọn̄ sika. Idahaemi mmọ ẹma ẹna baptism ke ẹnyụn̄ ẹnam n̄kpọ Jehovah idara idara ye nditọete mmọ iren ye iban ke ofụri ererimbot.
◻ Nditọete iban iba ke utom ukwọrọikọ mmọ eke ufọk-ke-ufọk ke Norway ẹma ẹsobo ye n̄wan kiet emi okowụtde udọn̄. Enye ama ọdọhọ mmọ ẹfiak ẹdi onyụn̄ obụp m̀mê imọ imekeme ndikot iban eken ẹdi. Ke ediwaha efen, iban inan̄ en̄wen ẹma ẹdu do. Kiet ke otu mmọ ama ọsọn̄ idem ata etieti ke ufọkederi. Enye ama ọdọhọ ete ke tọn̄ọ nte imọ ikedi eyenọwọn̄ imọ imesiyom ndikop uyo nnọ ewụhọ Jesus ndinam mme mbet. Emi ama ada imọ ye ebe imọ aka Africa ke ntak utom unọ un̄wam ke isenidụt. Kpukpru iban oro ẹma ẹnyene ediwak mbụme, ndien nditọete iban oro ẹma ẹnam ndutịm ndisiwaha n̄kese mmọ kpukpru urua iba. Ẹma ẹnọ mme mbọhọidụn̄ eken ikot, ndien ndusụk mmọ ẹma ẹkaiso ndidi ke adan̄aemi mbon eken ẹketrede, edi ọsọn̄idem owo ufọkederi oro ama ọdiọn̄ọ ete ke imọ ikekpep akpanikọ. Usen kiet, ke ini ọkwọrọikọ ufọkederi esie ọkọdọhọde ete ke imọ iyesịn un̄wam inọ ekọn̄ ye nte ke imọ imonịm ukpepn̄kpọ Abasi-Ita-ke-Kiet ke akpanikọ, n̄wan emi ama ọwọrọ ọkpọn̄ ufọkederi oro. Enye ama ọtọn̄ọ ndidụk mme mbonoesop Mme Ntiense Jehovah ndien ikebịghike ama ọtọn̄ọ ndibuana ke utom ukwọrọikọ. Ibio ini ke oro ebede enye ama ana baptism. Idahaemi ke akpatre, ke isua 30 ẹma ẹkebe, enye ke akpanikọ okop idatesịt ndikop uyo nnọ ewụhọ Jesus oro ọdọhọde ẹnam mme mbet.—Matthew 28:19.
Jehovah ke ọdiọn̄ nditọete ke Norway ke edisana utom mmọ ọkọrọ ye mbon oro ẹkpan̄de utọn̄ ẹnọ eti mbụk!