Mme Ọsọn̄urua Odu-Uwem N̄kpọ Ẹdu ke Namibia!

Mme Ọsọn̄urua Odu-Uwem N̄kpọ Ẹdu ke Namibia!

NAMIBIA anyanade ana ke se ikperede ndisịm kilomita 1,500 ke n̄kan̄ mbenesụk edem usụk ye edem usoputịn Africa. Ofụri mbenesụk oro ọyọhọ ye utatan, itiat itiat obot, ye unaisọn̄ emi ọyọhọde ye ikpọ n̄kwa itiat mbenesụk. Mme ọsọn̄urua itiat ẹnyenede kpukpru uduot oro ẹkemede ndikere mban̄a ẹbuaha ke otu mme itiat ke n̄kwa itiat mbenesụk Namibia. Ẹkam ẹsikụt daimọn ke ini ke ini do. Edi idụt emi enyene n̄kpọ emi enen̄erede ọsọn̄ urua akan mme itiat ẹmi. Namibia enyene mme ọsọn̄urua odu-uwem n̄kpọ—mme owo eke ediwak ekpụk esie.

Mme akpa andidụn̄ Namibia ẹkesem otu usem ẹkotde Khoisan. Ẹda akprak-kprak uyom esie ẹdiọn̄ọ ikọ mmọ. Mbon Damara ẹdide mbubịt ikpọkidem, mbon Nama ẹdide mfia ikpọkidem ẹmi ẹdide n̄kpri n̄kpri ke idaha, ye mme ọwọrọetop atautop mbon usụk usụk Africa ẹsịne ke otu mme andisem usem Khoisan mfịn. Ediwak mbon obubịt ekpụk ẹmedụk ẹdi Namibia n̄ko ke mme isua ikie ndondo emi. Ẹbahade mmọ ẹmi ẹsịn ke akpan ekpụk ita: Ovambo (n̄kponn̄kan ekpụk ke Namibia), Herero, ye Kavango. Mbon Europe ẹketọn̄ọ ndidụn̄ ke Namibia ke isua ikie 19. Ediwak mme ọwọrọidụn̄ ẹma ẹdibehe ke ẹma ẹkefiọhọ daimọn ke ntan desat.

Mme andidụn̄ Namibia ẹdi ọsọn̄urua koro mmọ ẹdide ubak ererimbot ubonowo oro Abasi ọkọnọde Eyen esie, ntem eberede usụn̄ ọnọ edidu nsinsi uwem. (John 3:16) Ediwak mbon Namibia ke mme itie ikie ẹtode ediwak ekpụk ẹmekam ẹnam n̄kpọ ẹban̄a etop edinyan̄a. Ẹkeme ndimen mmọ ẹmi ndomo ye mme ọsọn̄urua odu-uwem n̄kpọ koro mmọ ẹdude ke otu “se mme idụt ẹyomde” oro ẹtan̄de ẹbok idahaemi ke ufọk utuakibuot Jehovah.—Haggai 2:7.

Ẹtọn̄ọ Ndidọk Nyom N̄kpọuto eke Spirit

Ẹketọn̄ọ ndidọk nyom mme ọsọn̄urua n̄kpọ eke spirit ke Namibia ke 1928. Ke isua oro n̄kọk itieutom Watch Tower Society eke South Africa ama ọnọ mme n̄wed Bible 50,000 ẹsọk mme owo ẹkesuanade ẹyọhọ ofụri idụt oro. Ke isua oro eketienede Christian kiet oro ẹyetde aran emi otode South Africa ekerede Lenie Theron ama etiene udọn̄ oro ẹkewụtde. Ke ufan̄ ọfiọn̄ inan̄ enye ama asan̄a akanade akamba idụt emi ikpọn̄, enịmde se ibede n̄wed un̄wam ukpepn̄kpọ Bible 6,000 ke usem Afrikaans, Ikọmbakara, ye German. Kpukpru utom emi ke akpanikọ ikedịghe ke ikpîkpu.

Ke uwụtn̄kpọ, kere ban̄a Bernhard Baade, owo Germany edide ọdọk n̄kpọuto. Ke 1929 enye ama ọbọ nsenunen oto ọtọin̄wan̄ oro akadade ikọn̄n̄wed Watch Tower ọbọp nsenunen kiet kiet. Bernhard ama esikot kpukpru ikọn̄n̄wed oro ye ọkpọsọn̄ udọn̄, ekerede m̀mê mmanie ẹkewet n̄wed oro. Ke akpatre enye ama esịm akpatre ikọn̄n̄wed oro, emi ọkọnọde adres Watch Tower Society ke Germany. Bernhard ama ewet eben̄e mme n̄wed efen efen onyụn̄ akabade edi akpa owo Namibia ndida nnọ akpanikọ.

Mme Anamutom Uyọhọ Ini Ẹdibehe

Ke 1950, isụn̄utom inan̄ oro ẹkenọde ukpep ke Ufọkn̄wed Enyọn̄-Ukpeme Ukpep Bible eke Gilead ẹma ẹdibehe ke Namibia. Ibat mme isụn̄utom ama ọdọk esịm itiaita ke 1953. Mmọ ẹma ẹsịne Dick ye Coralie Waldron, ebe ye n̄wan ẹtode Australia oro ẹsụk ẹnamde utom mi ke edinam akpanikọ. Ediwak mme anditan̄a Obio Ubọn̄ efen efen ẹtode South Africa ye esenidụt ẹmebuana n̄ko ke ndidọk ọsọn̄urua n̄kpọ eke spirit ke Namibia. Ẹnọ mme isụn̄utom efen ọkọrọ ye mme andikụre ukpep ke Ufọkn̄wed Unọ Mme Asan̄autom Ukpep ẹka Namibia.

N̄kpọ efen oro etịpde n̄kpọ esịn ke n̄kọri eke spirit ke Namibia edi edikabade ye edimịn̄ mme n̄wed Bible ke mme akpan usem n̄kann̄kụk, utọ nte Herero, Kwangali, Kwanyama, Nama/Damara, ye Ndonga. Ọtọn̄ọde ke 1990, ediye ọfis ukabade n̄wed ye ebietidụn̄ mme anamutom unyịmesịt uyọhọ ini omodu ke Windhoek, ibuot obio oro. Karen Deppisch, oro abuanade anam utom ukwọrọikọ uyọhọ ini ye ebe esie ke nsio nsio ikpehe Namibia, ọdọhọ ete: “Ediwak owo ẹsikop n̄kpaidem ke ini inọde mmọ n̄wed ke usem mmọ, akpan akpan ke ini ata ibat ibat n̄wed ekededi ẹdude ke usem oro.”

Nditụk Mme Ọsọn̄urua Itiat Ẹsem

Ke ediwak tọsịn isua, oyobio ye ntan ẹtụk ndusụk ata ata itiat Namibia tutu ẹsem. Edi, ke akpanikọ, utọ oto-obot edinam oro ision̄oke mme ọsọn̄urua odu-uwem itiat idi. Oyom ukeme man mme anana mfọnmma owo “ẹsio akani owo ẹduọk” ẹnyụn̄ ẹsịne obufa edu emi ebietde eke Christ. (Ephesus 4:20-24) Ke uwụtn̄kpọ, edikpono mme ete ete oro ẹma ẹkekpan̄a edi okopodudu ido edinam ke otu ediwak ekpụk ke Namibia. Mbonubon ye mme mbọhọidụn̄ ẹsiwak ndikọbọ mbon oro mînamke edinam edituak ibuot nnọ mme ete ete. Ke ini mme owo ẹkpepde ke Bible nte ke mme akpan̄kpa “ifiọkke baba n̄kpọ kiet,” mmọ ẹsisobo idomo. (Ecclesiastes 9:5) Ke nso usụn̄?

Ntiense kiet edide owo Herero anam an̄wan̄a ete: “Ekedi akamba n̄kpọ-ata ndisụk ibuot nnọ akpanikọ. Mma nnyịme ukpepn̄kpọ Bible ye Mme Ntiense Jehovah, edi ama ada ini mbemiso ndade mme n̄kpọ n̄kekpepde nsịn ke edinam. Akpa kan̄a, n̄kenyene ndidomo nse m̀mê nyodu ke ifụre edieke mmenamke mme ido edinam obio. Ke uwụtn̄kpọ, nyawat mbe ndusụk itie ke Namibia ye unana edituak nda ndori itiat ke udi m̀mê ndiyarade itam ke idiọn̄ọ edikọm mme akpan̄kpa. Sụn̄sụn̄, mma ndinịm ke akpanikọ nte ke n̄kpọ ndomokiet idinamke mi ke nditre ndituak ibuot nnọ mme ete ete oro ẹma ẹkekpan̄a. N̄kop inemesịt didie ntem nte ke Jehovah ọmọdiọn̄ ukeme mi ndin̄wam ubon mi ye mbon en̄wen oro ẹnyenede udọn̄ ekpep akpanikọ!”

Ẹyom Mme Ọdọk-N̄kpọuto eke Spirit

Mbemiso mme isụn̄utom ẹkedide ẹdibehe ke 1950, asuanetop eti mbụk kiet kpọt okodu ke Namibia. Ibat oro ọmọkọri ye iwụk esịm n̄wakn̄kan ibat edide 995. Kpa ye oro, ekese utom ke osụk ododu ndinam. Ke akpanikọ, owo ikam itụkke-tụk ndusụk ikpehe. Nte afo omodu ke idaha ndinam utom ke ebiet emi ẹnen̄erede ẹyom mme ifịk ifịk anditan̄a Obio Ubọn̄? Do, mbọk, be di ke Namibia din̄wam ndiyom nnyụn̄ ntụk mme ọsọn̄urua itiat eke spirit efen efen ẹsem.—Men Utom 16:9 domo.

[Ndise obio/Mme ndise ke page 26]

(Ama oyom ndikụt nte enye enen̄erede etie, se n̄wed)

AFRICA

NAMIBIA

[Mme ndise]

Ẹkwọrọ eti mbụk ẹnọ kpukpru ekpụk ke Namibia

[Mme Ebiet Ẹdade N̄kpọ Ẹto]

[Mme ndise ke page 26]

Namibia edi idụt ndiye ọsọn̄urua itiat

[Ndise ke page 28]

Nte afo emekeme ndinam utom ke ebiet emi ẹnen̄erede ẹyom mme anditan̄a Obio Ubọn̄?